‘हृदय’को विशेष संस्करण लोकार्पण, नियमित संस्करण असोज पहिलो साता आउँदै

A+ A A-

तीन दशकदेखि मुटुको उपचारमा संलग्न डा. भगवान् कोइरालाको पुस्तक ‘हृदय’को विशेष सीमित संस्करण सोमबार लोकार्पण भएको छ । विशेष सीमित संस्करण एकपटकका लागि २५ सय प्रति मात्र मुद्रण गरिएको उक्त पुस्तक फाइन प्रिन्टले प्रकाशन गरेको हो ।

डा. कोइरालाको परिकल्पना गरेको विशिष्टीकृत केन्द्रीय अस्पताल ‘काठमाडौं इन्स्टिच्युट अफ चाइल्ड हेल्थ’ (किओच)लाई सघाउ पुर्‍याउने उद्देश्यले प्रकाशक फाइन प्रिन्टले उनको पुस्तक ‘हृदय’को विशेष संस्करण प्रकाशन गरेको हो ।

उक्त पुस्तकको अङ्कित मूल्य २५,००० हजार रुपैयाँ तोकिएको छ । विशेष सीमित संस्करणबाट प्राप्त हुने शतप्रतिशत रकम काठमाडौं इन्स्टिच्युट अफ चाइल्ड हेल्थ (किओच) निर्माण परियोजनामा खर्च गरिने फाइन प्रिन्टले जनाएको छ । प्रकाशकका अनुसार विशेष संस्करण खरिद गरी सहयोग पुर्‍याउने २५०० सहयोगीको नाम अस्पतालको शिलालेखमा समावेश गरिनेछ ।

डा. भगवान् कोइराला र बाल स्वास्थ्यमा समर्पित समूहले काठमाडौँसँगै सातै प्रदेशमा बाल अस्पताल निर्माणको लक्ष्य लिएको छ । यो बृहत् परियोजनालाई सफल पार्न आफूहरुले सानो पहल मात्र गरेको फाइन प्रिन्टले जनाएको छ ।

विशेष संस्करणलाई डा. कोइराला आफैंले प्रत्येक पुस्तकमा क्रमसङ्ख्या अङ्कित र हस्ताक्षर गरी प्रमाणित गर्नेछन् । ‘हृदय’को विशेष सीमित संस्करणले सीमित संस्करणको संस्कार र पद्धतिमा एउटा मानक खडा गर्ने फाइन प्रिन्टले विश्वास लिएको छ । हृदयको विशेष सिमित संस्करण fineprint.com.np मा गई अनलाइन अर्डर गर्न सकिने जनाएको छ ।

पुस्तकको नियमित संस्करण भने असोज पहिलो सातादेखि बजारमा उपलब्ध हुने फाइन प्रिन्टको भनाइ छ । नियमित संस्करण काठमाडौंका लागि प्रतिपुस्तक ६५० र काठमाडौं बाहिरका लागि ५७५ मूल्यमा उपलब्ध हुने फाइन प्रिन्टले बताएको छ ।

नियमित संस्करणको पनि ५० प्रतिशत लेखकस्व सोही बाल अस्पताल निर्माण कोषलाई हस्तान्तरण गर्ने डा. कोइरालाले निर्णय गरेका छन् । निर्माणाधीन बाल अस्पतालमा ‘हृदय’ पढ्ने हरेक पाठकको लगानी हुनेछ । ‘गंगालाल मुटुका लागि भर पर्दो संस्था बनेझैँ बालबालिकाका लागि किओच हुनेछ भन्ने हाम्रो विश्वास छ,’ फाइन प्रिन्टका नीरज भारीले भने ।

पुस्तकमा लेखक तथा डा. कोइरालाले आफूले जीवनमा भोगेका सङ्घर्षका अनुभव, उनले स्वास्थ्य क्षेत्रमा देखेका समस्या, सुल्झाउने उपाय र चिकित्सा शिक्षाका विविध विषयलाई समेत विश्लेषणात्मक रूपमा समेटिएको उनले बताए ।

भारीले भने, ‘नेपाल र विश्वभर छरिएर रहेका हामीभन्दा सक्षम, सबल र सचेत व्यक्ति एवम् संस्था आ–आफ्नो ठाउँबाट जुट्यौँ भने डा. कोइरालाले बालबालिकाका लागि बनाउने भनेको विशिष्टीकृत अस्पतालको सपना पूरा हुन पक्कै असम्भव छैन, यो उहाँहरु सबैलाई आह्वान पनि हो ।’

कार्यक्रममा योग विज्ञान तथा जीवनशैली प्रशिक्षण र पुस्तक लेखन एवम् वातावरण संरक्षणको क्षेत्रमा परिचित डा. राजु अधिकारीले ‘हृदय’ले धेरै ‘हृदय’ बचाउन सक्ने भएकाले डा. कोइरालाको पहलमा सबैले साथ दिन आग्रह गरे । साथै, स्वस्थ मानिसबाट मात्र स्वस्थ सिर्जना एवम् रचनात्मक काम हुन सक्ने उनको भनाइ थियो ।

कार्यक्रममा अनिल शाहीको विशेष साङ्गीतिक प्रस्तुतिसमेत थियो ।

प्रकाशित मिति: मंगलबार, भदौ २८, २०७९ १९:५४