फिनल्याण्डकी प्रधानमन्त्री सन्ना फेरि विवादमा, टपलेस पाहुनाको फोटोलाई लिएर मागिन् माफी

फिनल्याण्डकी प्रधानमन्त्री सन्ना फेरि विवादमा, टपलेस पाहुनाको फोटोलाई लिएर मागिन् माफी

A+ A A-

‘पार्टी डान्स काण्ड’पछि अर्को एक घटनामा फिनल्याण्डकी प्रधानमन्त्री सन्ना मरिनले सार्वजनिक माफी मागेकी छन् । उनले आफ्नो सरकारी निवासमा आएका पाहुनाको टपलेस तस्वीरलाई लिएर माफी मागेकी हुन् ।

केही दिनअघि एक पार्टीमा नाचेको प्रधानमन्त्री मरिनकाे भिडियो भाइरल बनेको थियो । सोसल मिडियामा छरपस्ट भिडियोमा उनी नाच्दै, गाउँदै केही पिउँदै गरेको देखिन्थिन् । रक्सी खाएर नाचेकाे भन्दै उनको खुबै आलोचना भएको थियो । पछि उनको ड्रग्स परीक्षणसमेत भएको थियो तर रिपोर्ट नेगेटिभ आयो ।

अहिले जुन तस्वीर बाहिरिएको छ, त्यसमा दुई गनेमानेका प्रभावशाली व्यक्ति प्रधानमन्त्री निवासमा देखिएका छन् । तस्वीर मंगलबारदेखि सामाजिक सञ्जालमा भाइरल छ । सन्ना मरिनले यो तस्वीरलाई अनुचित स्वीकार्दै माफी मागेकी हुन् । तस्वीरमा दुई महिला एकअर्कालाई चुमिरहेका छन् । उनीहरूले आफूलाई ढाक्नका लागि हातमा एक बोर्ड लिएका छन्, जसमा फिनल्याण्ड लेखिएको छ ।

को हुन् सन्ना मरिन् ?

सन्ना मरिन एक सामान्य परिवारबाट उदाएकी हुन् । उनका आमाबुवाको डिभाेर्स उनी सानै हुँदा भएको थियो । आमाबुबा अलग भएपछि उनलाई आमाले हुर्काएकी थिइन् । यस्तोमा उनले सानो छँदा आर्थिक अभाव झेल्नुपरेको थियो । मरिन हाईस्कुल पास गरेर युनिभर्सिटी जाने परिवारकी एक मात्र सदस्य हुन् ।

उनले २० वर्षको उमेरमा राजनीतिमा पाइला चालेकी थिइन् । त्यसको दुई वर्षपछि काउन्सलरको चुनावमा आफ्नो भाग्यको परीक्षण गरिन् । तर उनी हारिन् । त्यसको पाँच वर्षपछि उनी काउन्सलर मात्र बनिनन्, सबै काउन्सलरको नेतृत्व पनि गरिन् । एक ब्लगमा उनले आफूले सानो छँदा बेकरीमा काम गरेको र पत्रिका वितरकका रूपमा पनि काम गरेको लेखेकी थिइन् ।

प्रकाशित मिति: बुधबार, भदौ ८, २०७९ १८:१९