ओलीको प्रश्न- छिमेकी मारेर चुनाव जितेँ भनेर अबिर जात्रा गर्न सरम हुनुपर्दैन ?

ओलीको प्रश्न- छिमेकी मारेर चुनाव जितेँ भनेर अबिर जात्रा गर्न सरम हुनुपर्दैन ?

A+ A A-

नेकपा (एमाले) का अध्यक्ष केपी शर्मा ओलीले आफ्नो पार्टीका नेताहरूले छोरी-बुहारीहरूलाई माथि उठाउन काम नगरेको टिप्पणी गरेका छन् । पार्टीले आफ्नो अर्काको नहेरी समानताका आधारमा व्यवहार गर्ने उनको भनाइ छ ।

सोमबार पार्टी कार्यालय च्यासलमा आयोजित पार्टी प्रवेश कार्यक्रमलाई सम्बोधन गर्दै ओलीले भने, ‘यहाँका नेताहरू छोरी-बुहारीहरूलाई माथि उठाउनका लागि काम गरिरहेका छैनन् । यहाँका नेताहरू श्रीमती, साला, भाइ, भतिजा, आफन्त, परिवारका सदस्य, नातागोताहरूलाई माथि उठाउन लागिरहेका छैनन् ।’

ओलीले आफ्नो पार्टीका नेताहरू देश बनाउन लागेको पनि दाबी गरे । ‘देश बनाउन लागेका छन् नेकपा एमालेका नेताहरू । र, सिङ्गै पार्टीलाई देश बनाउने काममा केन्द्रित हुन हामी आग्रह गरिरहेका छौँ,’ ओलीले भने ।

उनले नेपालले आफ्नो जमिन फिर्ता मागेर भारतलाई गरेको पत्राचार मन नपराएको कुरा आफूले सुनेको ओलीले बताए । उक्त कुरा भारतले मन पराउनुपर्ने बताए ।

उनले गठबन्धनका नेताहरूले लिम्पियाधुरा, लिपुलेक, कालापानी नेपालको हो भनेर बोल्न सक्छन् भन्ने प्रश्न गरे । प्रधानमन्त्री शेरबहादुर देउवा र माओवादी केन्द्रका अध्यक्ष प्रचण्डले पनि लिम्पियाधुरा, लिपुलेक, कालापानी कसको हो भनेर बोल्न नसकेको ओलीको भनाइ थियो ।

उनले अहिलेसम्म पनि कांग्रेस नसप्रिएको टिप्पणी गरे । ‘उहिलेदेखि अहिलेसम्म नेपाली कांग्रेस नसप्रिएकोमा अचम्म लाग्छ,’ ओलीले भने, ‘सप्रिएको छैन कांग्रेस ।’

अहिलेको गठबन्धनले फरक विचार सुन्न नचाहेको बताए । गठबन्धनले प्रतिर्श्पर्धाको नभएर दुस्मनी र असहिष्णुताको राजनीति गरेको ओलीको आरोप थियो । गठबन्धनले राज्यशक्तिको चरम दुरुपयोग गरेको उनको टिप्पणी थियो ।

‘शेरबहादुर र प्रचण्डको नीति के हो ? निर्देशन के छ ? के छ सरकारको आदेश ? प्रहरीलाई आदेश के छ ? प्रशासनलाई आदेश के छ ?’ ओलीले प्रश्न गरे, ‘छिमेकी मारेर, भोट लुटेर उसको सार्वभौम अधिकारको आधारभूत कुरा खोसेर अनि चुनाव जितेको घोषणा ।’

गठबन्धनले मान्छे मारेर चुनाव जितेर अबिर जात्रा गरेको ओलीको आरोप थियो । ‘मतपत्र च्यात्ने मात्रै कहाँ हो र, चपाउने मात्रै कहाँ हो र ? बत्ती निभाउने मात्रै कहाँ हो र ? बाकस साट्ने मात्रै कहाँ हो र ? यहाँ त मान्छे मारेर, गएको निर्वाचनमा कति जना मान्छे मरे ?’ ओलीले भने, ‘मान्छे मारेर छिमेकी मारेर, छिमेकीकहाँ रुवाबासी छ, अनि जितेँ भनेर अबिर जात्रा गरेर, खसी काटेर, भोज लगाएर, सरम हुनुपर्दैन लोकतान्त्रिक हुँ भन्न ?’

प्रकाशित मिति: सोमबार, भदौ ६, २०७९ १६:४७