बालेन र हर्कबीच घोचपेच, स्वतन्त्रलाई लट्ठी

A+ A A-

प्रदेशसभा र प्रतिनिधिसभा चुनाव नजिकिँदै छ । कतिपय निर्वाचन क्षेत्रमा यसपालि दललाई चुनौती दिँदै स्वतन्त्र उम्मेदवारहरू मैदान उत्रिने तयारीमा छन् । स्वतन्त्र आकाङ्क्षीहरूले आफूलाई दलका नेताभन्दा अब्बल दाबी गरिरहेका छन् । उनीहरूमध्ये कतिपयले काठमाडौं महानगरपालिकाका मेयर बालेन्द्र साह, धरान उपमहानगरका मेयर हर्क साम्पाङ र धनगढी उपमहानगरपालिकाका मेयर गोपाल हमाललाई उदाहरणका रूपमा पेस गर्दैछन् । तर, हकिकतमा धरान र काठमाडौंका मेयरबीचकाे छेडछाड साेसल मिडियामा छरपस्ट छ ।

हुन पनि, गत स्थानीय चुनाव खासगरी हर्क सम्पाङ र बालेन्द्र साहका कारण विशेष बनेको थियो । भिन्दाभिन्दै पृष्ठभूमि र कार्यशैलीका हर्क र बालेनले चुनाव जितेर आ-आफ्नो पाराले स्थानीय सरकार चलाइरहेका छन् । उनीहरू एउटै चुनाव चिह्नबाट जितेर मेयर बनेका थिए ।

गत साता यिनै दुई मेयरबीच दोहोरी चल्यो । हर्क अझै राेकिएका छैनन् तर बालेनले खासै वास्ता गरेकाे देखिँदैन । हर्कले माओवादी केन्द्रका अध्यक्ष प्रचण्डलाई भेटेको दिनदेखि दुई मेयरबीच छेडछाड झन् चुलिएकाे थियाे ।

हुन त मेयर हर्कले दिनमै दर्जनभन्दा बढीसम्म स्टाटस राख्ने गरेका छन् । काठमाडौं आइपुगेकै दिउँसो उनले फेसबुकमा लेखेका थिए, ‘काठमाडौंको चिल्ला र फराकिला सडक किनारामा फोहोरको डङ्गुर देख्दा त खाल्डाखुल्डी बाटो भए पनि धरानै सफा लागो ! प्रधानमन्त्री र मन्त्रीहरू बस्ने शहरको यो बिजोग देख्दा श्रमदान गर्न मन लाग्यो !’

आफूजस्तै स्वतन्त्र जितेका हर्कबाट यस्तो टिप्पणी आएपछि बालेन चुप लागेर बस्न सकेनन् । अनि हर्कको पोस्टमा कमेन्ट लेखिदिए, ‘हिँड न केटा हो, ५-५ केजी फोहोर बोकेर बञ्चरे । किन चाहियो ट्रक, किन चाहियो बाटो, किन चाहियो व्यवस्थापन ?’

फेसबुकमा बालेनको नाममा आधिकारिक प्रोफाइल र एक पेज छ । प्रोफाइलमा बालेन साहकाे पूरा नाम छ । तर, पेजमा बालेन मात्र छ, जसमा हामी फेसबुकको ब्लु ब्याज पनि देख्न सक्छौँ । बालेनले आफ्नो प्रोफाइल अकाउण्टबाट कमेन्ट गरेका हुन् । यो प्रोफाइललाई १ लाख ६२ हजारभन्दा बढीले फलो गरेका छन् ।

उसै त जोरी खोजिरहेका हर्क बालेनकाे यस्ताे रिप्लाईले थप उत्तेजित भए । उनलाई उत्तेजित पार्न बालेनका समर्थकले गरेका कमेन्टहरूले पनि काम गरेकाे थियाे । कतिपय उक्साहट उनलाई आफ्नै समर्थकबाट पनि मिलेको थियो ।

भोलिपल्ट साँझ हर्कले बालेनलाई सिधै कटाक्ष गर्दै लेखे, ‘काठमाडौंको फोहोर व्यवस्थापनमा सख्तीका साथ प्रस्तुत हुनुपर्छ । गुलेलीले हान्यो, त्यसैले सकिएन भन्ने बहानाको कुनै तुक छैन । फोहोरी राजनीतिले फोहोरकै राजनीति गरेर झन् फोहोरी भो ।'

सम्बन्धित समाचार

सार्वजनिक कार्यक्रममा किन बाेल्न मान्दैनन् बालेन ?

हर्कले यस्तो स्टाटस शेयर गर्नुभन्दा डेढ घण्टाअघि बालेनले बञ्चरेडाँडामा फोहोर फाल्न आफूलाई राजनीतिक दलले नै अवरोध गरेको स्टाटस लेखेका थिए । ‘फोहोर लैजाने कुरा आज पनि सहज भएन । सत्तारुढ दलहरूकै स्थानीय नेताहरूको अगुवाइमा सडक अवरुद्ध गरियो, जसलाई विपक्षी दलहरू एमाले र राप्रपाका स्थानीय नेताहरूले पनि साथ दिएको देखियो । यद्यपि २०० भन्दा बढी प्रहरीकोे परिचालनबाट फोहोरका गाडीहरू बञ्चरे लगियो । तर केही समूहबाट लुक्दै गुलेली हानेर अवरोध सिर्जना गर्ने प्रयास गरियो । यसैकारण आज २०३ वटा मात्र फोहोरका गाडीहरू बञ्चरे डाँडा लैजान सकियो’, बालेनकाे गुनासाे थियाे ।

हर्कले यसैको जवाफ दिएका थिए । हर्ककाे प्रतिटिप्पणीमा बालेनका समर्थकहरूले चर्को आलोचना गरेका थिए ।

३१ साउनमा हर्कले प्रचण्डसँग भेटघाट गरेको खबर सार्वजनिक भयो । त्यही दिन साँझ बालेनबाट स्टाटस आयो, त्याे पनि भिडियाेसहित, जसमा बालेनले उपत्यकाबाट फोहोर लैजाने ककनीको बाटो वर्षौंदेखि अलपत्र पार्ने ठेकेदार शारदा अधिकारीलाई प्रचण्डले बचाएको भन्दै नैतिक प्रश्न उठाएका थिए । ‘श्रीमान् प्रचण्डज्यू ! उपत्यकाको फोहोर लैजान प्रयोग गरिने ककनीको बाटो विगत ८ वर्षदेखि यस्तो हालतमा बनाउने मान्छेको घरमै अङ्गरक्षकजस्तो बसेर कुन नैतिकताले भन्नु म देश बनाउँदै छु भनेर ?,’ बालेनले लेखेका थिए ।

यो देखेपछि हर्क चुप लागेर बसेनन् । त्यही दिन दिउँसाे प्रचण्डसित भेटेर फर्केका उनले लेखिहाले, फोहोरसम्म सोहोर्न नसक्नेले के फुइँ लाउनु बेकारमा, फोहोर ठेगान लगाएर बल्ल कुरा गर्नु है ! हावा गफ होइन, काम चाहिएको छ जनतालाई ।'

यसपछि बालेनले हर्ककाे टिप्पणीप्रति कुनै प्रतिटिप्पणी गरेका छैनन् । तर, हर्कचाहिँ राेकिएका छैनन् । भदाै १ मा धरान फर्केका उनले आफू काठमाडौं गएकैले फोहोर उठेको भनी स्टाटस लेखेपछि निकै खिसी टिउरी भएको थियो । हर्कले लेखेका थिए, 'जसले जे भनोस् तर म काठमाडौं नगएको भए फोहोर उठ्ने थिएन रै'छ ! कम्से कम काम त सुरु गरे !' यो पोस्टमा बालेनको कमेन्ट थियाे, तपाईंकै लौरो चुनाव चिह्न लिएर मैले चुनाव पनि त जितेको हो नि !'

धेरैले उडाएपछि आफूले जिस्केर त्यसो भनेको भनी हर्कले आफूलाई सच्याएका थिए ।

एक युट्युबरसितको कुराकानीमा उनले बालेन आफूलाई सामाजिक नलागेको समेत टिप्पणी गरेका छन् । लौरो चिह्नबाट चुनाव जिते पनि बालेन र आफ्नो छुट्टाछ्ट्टै लोकप्रियता रहेको उनकाे भनाइ थियाे ।

काठमाडाैंमा एमालेका भ्रातृ संस्था राष्ट्रिय युवा संघ नेपालले फाेहाेर उठाउने अभियान चलाएकाे भन्दै हर्कले तारिफ गरेका छन् भने महानगर वा बालेनमाथि छेडछाड गरिरहेका छन् । ‘मैले के भनेँ कसरी भनें भन्दा पनि मैले भनेको कुराले कस्तो र कति तरंग ल्यायो र काला चस्मा लाएर सुतिरहेकाहरू कसरी जुर्मुराए भन्ने कुरा हेर्नु ।, धरान फर्केको राति सबा ९ बजे उनले लेखेका थिए ।

२९ साउनमा काठमाडौं आइपुगेका उनी १ भदौमा धरान फर्केका थिए ।

दुई चर्चित मेयरबीचको घोचपेचका कारण उनीहरूका समर्थकसमेत विभाजित भएका छन् । दुवैको गतिविधिप्रति कतिपयले सामाजिक सञ्जालमार्फत नै निराशा व्यक्त गरेका छन् । कतिपयचाहिँ एकअर्काप्रति आरोप-प्रत्यारोपमा उत्रेका छन् ।

स्वतन्त्रलाई लट्ठी

रोचक के भने, यी दुवै मेयरले लौरो चिन्हबाटै चुनाव जितेका हुन् । चुनावअघि उनीहरूबीच भेटघाट, चिनजान थिएन । तर चुनावमा बाजी मारे, स्वतन्त्र हैसियतमै । अतः यी दुईको गतिविधिले आगामी चुनावका स्वतन्त्रहरूलाई नाफा, घाटा गर्नसक्ने आकलन गरिएको छ । यसैगरी लडीभिडीमा रमाउन थालेमा अबका स्वतन्त्रहरूका लागि उनीहरूकाे गतिविधि लट्ठी साबित हुने धेरैकाे अनुमान छ ।

सम्बन्धित समाचार

यी हुन् उपत्यकाबाट सांसद बन्न कम्मर कसेका स्वतन्त्रहरू

प्रतिनिधिसभा चुनावमा काठमाडाैं- ६ बाट स्वतन्त्र उम्मेदवारी घोषणा गरेका शिशिर खनाल हर्क र बालेनबीच उति ठूलो मतभिन्नता नदेखिएको बरू एकअर्काका समर्थकले ठूलो बनाइदिएकाे बताउँछन् । भन्छन्, 'उहाँहरूले एकअर्काको कमजोरी देखाउनुलाई खासै ठूलो रूपमा लिन हुँदैन । यो त संसारमै हुने अभ्यास हो । यो भनाभन यहाँभन्दा ठूलो हुन्छ भन्ने पनि मलाई लाग्दैन ।' तर स्वतन्त्र उठेर जितेका चर्चित यी दुई पात्रको गतिविधिले आगामी चुनावका स्वतन्त्र उम्मेदवारहरूको हकमा कुनै न कुनै प्रभाव राख्ने कुरा उनी अस्वीकार गर्दैनन् ।

प्रकाशित मिति: सोमबार, भदौ ६, २०७९ १७:०१