सच्चियो नागरिकताको नाम, फर्कियो सम्मान

तस्वीर : पत्रकार यज्ञराज थापाबाट

A+ A A-

अपमानजनक नाम राखेर जारी गरिएको नागरिकता प्रमाणपत्रका कारण हीनताबोध र अपमान सहँदै आएका दैलेखका दुई जनाको नाम सच्चिएको छ । जनावरको नाम राखेर जारी गरिएको नागरिकता प्रमाणपत्रका कारण अपमानको विष पिइरहेका कर्णबहादुर कामी र कविराम कामीको नाम सच्चिएको हो ।

नागरिकतामा राखिएको नामकै कारण अपमान भएको सार्वजनिक भएपछि गृह मन्त्रालयले नागरिकता प्रमाणपत्रको अपमानजनक नाम सच्याउन जिल्ला प्रशासन कार्यालयलाई परिपत्र गरेको थियो । गृहको सो परिपत्रपछि दैलेख जिल्लाको साविक मेहेलतोली गाविस– ६ हाल भगवतीमाई गाउँपालिका ३ का कविराम कामी र साविक कट्टी– ६ हाल भगवतीमाई गाउँपालिका– ५ का कर्णबहादुर कामीको नाम सच्चिएको हो । कर्णबहादुर र कविराम सच्चिएको नाम हो ।

यसअघि कविरामको नाम ‘कुकुर’ र कर्णबहादुरको नाम ‘ठगे’ नागरिकता प्रमाणपत्रमा उल्लेख थियो । आइतबार जिल्ला प्रशासन कार्यालयबाट नाम सच्चिएको नागरिकता प्रमाणपत्र पाएपछि दुवै जनाले मुस्कान दिए । नेपाल पत्रकार महासंघ दैलेखका अध्यक्ष यज्ञराज थापा भन्छन्, ‘नागरिकतामा नाम सच्चिएपछि उनीहरूको मुहारमा देखिएको खुसी हेर्नलायक थियो ।’

गृह मन्त्रालयले नाम सच्याउन परिपत्र गरेको जानकारी पाएपछि यी दुवैले यही २४ साउनमा जिल्ला प्रशासन कार्यालयमा निवेदन दिएका थिए । त्यसपछि उनीहरूले रोजेको नाम उल्लेख गरेर जिल्ला प्रशासन कार्यालय दैलेखले नयाँ नागरिकता प्रमाणपत्र जारी गरेको हो ।

नाम सच्याएर नागिरकताकाे प्रमाणपत्र पाएपछि उनीहरू दुवै जना खुसी भएकाे प्रमुख जिल्ला अधिकारी हरि प्याकुरेलले बताए । उनले शिलापत्रसँग फाेनमा भने, 'उनीहरूकाे कुरा सुनेपछि मेराे आँखाबाट आँसु खस्याे । त्यस्ताे पीडामा रै'छन् । एक जना त याे नारिकताकै कारण भारतमा बसेका रहेछन् । उनीहरूका छाेराछाेरी पनि विद्यालय यसै कारण नगएका रहेछन् ।'