बञ्चरेडाँडामा फेरि झडपको स्थिति, प्रहरी परिचालन गरेर फोहोर विसर्जन

A+ A A-

नुवाकोट र धादिङको सिमानामा पर्ने बञ्चरेडाँडास्थित ल्याण्डफिल साइट फेरि अशान्त बनेको छ । गत २५ जेठमा पनि फोहोर विसर्जन गर्न स्थानीयले अवरोध गरेपछि बञ्चरेडाँडा तनावग्रस्त बनेको थियो । तीन दिन बञ्चरेडाँडा जंगलभित्र टियर ग्यास र ढुंगामुढा बर्सिएको थियो ।

अन्तत: गत २६ जेठको मध्यराति प्रभावित क्षेत्रमा भएको सम्झौता कार्यान्वयन नभएको भन्दै स्थानीय आन्दोलित भएपछि उक्त क्षेत्र अशान्त बनेको हो । गत शनिबारदेखि काठमाडौं महानगरले प्रहरी परिचालन गरेर फोहोर विसर्जन गर्न थालेपछि स्थानीय आन्दोलनमा उत्रिएका हुन् ।

‘सहमति भएको दुई महिनासम्म एउटा बुँदा पनि कार्यान्वयन भएको छैन,’ फोहोरबाट प्रभावित स्थानीय दिनेश कार्कीले भने, ‘काठमाडौंका ५० लाख मानिसलाई बचाउन प्रभावित क्षेत्रका हजारौँ नागरिक मार्न खोजियो ।’

बिहानैदेखि स्थानीयले आन्दोलन गरिरहेको उनले बताए । ‘हाम्रो अवरोधका बीच केही गाडीले फोहोर खन्याए । धेरै संख्यामा प्रहरी परिचालन गरेर फोहोर खन्याउन लागिएको छ,’ उनले भने, ‘शान्तिपूर्ण आन्दोलनमा प्रहरीले बल प्रयोग गरेको छ ।’

आन्दोलित स्थानीय ।

काठमाडौं महानगरपालिकाका अनुसार बिहान ५६ वटा गाडी काठमाडौंबाट बञ्चरेडाँडातर्फ गएका थिए । तर, स्थानीयले अवरोध गरेपछि फोहोर विसर्जन हुन सकेको थिएन । प्रहरी परिचालन गरिए पनि स्थानीयमाथि दमन नगरिएको महानगरको भनाइ छ । शान्ति सुरक्षाका लागि मात्र प्रहरी परिचालन गरिएको महानगरले जनाएको छ ।

‘हामीले बल प्रयोग गरेको छैन । शान्ति सुरक्षाका लागि प्रहरी पठाएका हौँ । दिउँसो केही बेर गाडी रोकिएको थियो । अहिले फेरि फोहोर बोकेका गाडी गइरहेका छन्,’ महानगरका प्रवक्ता नवीन मानन्धरले भने । ओखरपौवा प्रहरी चौकीका अनुसार पनि अहिले फोहोर विसर्जनको काम भइरहेको छ ।

दुई महिनासम्म पनि सम्झौता किन कार्यान्वयन नभएको भन्ने प्रश्नमा प्रवक्ता मानन्धरले भने, ‘बजेट परिचालन नभएर हो । भोलिदेखि निकासा हुन्छ, काम पनि हुन्छ ।’ स्थानीयले फोहोरको दुर्गन्ध आउन नहुने, बाटो र खोलामा लिच्चड जान नहुनु र दुर्गन्ध नआउने औषधिको प्रयोग गर्न माग राखेका छन् । महानगरले यी माग एक महिनाभित्र पूरा गर्ने सम्झौता गरेको थियो ।

स्थानीय राजनीतिक दल पनि आन्दोलित

स्थानीयको आन्दोलनमा राजनीतिक रङ पनि मिसिएको छ । धुनिबेँसी नगरपालिकाका कांग्रेस, माओवादी केन्द्र र एकीकृत समाजवादीले संयुक्त विज्ञप्ति निकालेर स्थानीयको माग पूरा गरेर मात्र फोहोर विसर्जन गर्न अपिल गरेका छन् ।

‘काठमाडौं महानगरलगायत राज्यका विभिन्न अंगसँग अहिलेसम्म १७४ वटा सहमति भएको छ । राज्यको आफ्नै निकायले गरेको सम्झौता पूरा गर्नुको सट्टा उल्टै शक्तिको दुरुपयोग गरेर पीडित जनतामाथि प्रहरी प्रशासन घरभित्रै पसेर ज्यादति गर्‍यो,’ विज्ञप्तिमा भनिएको छ, ‘आजैको दिनबाट उक्त आन्दोलनमा सहभागिता जनाउने निर्णय गरेका छौँ ।’

यसअघि स्थानीयले पनि फोहोर विसर्जन रोक्नका लागि पहल गर्न वडा कार्यालयमा निवेदन दिएका थिए । स्थानीयको निवेदनपछि वडा कार्यालयले विगतमा भएको सम्झौता कार्यान्वयन नभएसम्म फोहोर नफाल्न काठमाडौं महानगरसहित सबै निकायलाई आग्रह गरेको थियो ।

यसअघि के–के भएको थियो ?