मेयर हारेकालाई इन्चार्ज, टिकट खोसिएका भन्छन् – अपराध गर्नुस्, मागेको पुरस्कार पाउनुहुन्छ

A+ A A-

एमाले नेता कृष्ण थापाले पार्टीको कास्की जिल्ला इन्चार्जको जिम्मा पाएसँगै गत स्थानीय तह चुनावमा पोखरा महानगरपालिकाको मेयरको टिकट खोसिएका नेता दीपक पौडेलले असन्तुष्टि जाहेर गरेका छन् । गत ३० वैशाखको चुनावमा नेता पौडेलको टिकट खोसेर अन्तिम समयमा थापाले पाएका थिए ।

तर, थापाले चुनाव जित्न सकेनन् । चुनाव हारेपछि भूमिकाविहीन हुने स्थिति आएपछि नेता थापालाई बिहीबारको सचिवालय बैठकले सहइन्चार्जबाट इन्चार्जमा बढुवा गरेको छ । हाल इन्चार्ज रहेका भीम कार्कीलाई भूमि विभागको उपप्रमुख बनाइएको छ ।

थापाले इन्चार्ज पाएसँगै टिकट खोसिएका नेता पौडेलले व्यांग्यत्मक शैलीमा असन्तुष्टि पोखेका छन् । ‘अब अपराध कर्म गर्नुहोस् पुरस्कार मागे जति पाउनु हुनेछ, किनभने यो युग कलियुग हो,’ उनले सामाजिक सञ्जालमा प्रतिक्रिया जनाएका छन् ।

गत वैशाखको चुनावमा नेता पौडेललाई पार्टीले मेयर उम्मेदवार बनाउने निर्णय गरेसँगै उनको एउटा पुरानो भिडियो भाइरल बनाइएको थियो । जसमा उनले सुन पसलबाट सुन चोरी गरेको स्पष्ट देखिन्छ । तर, उनले उक्त भिडियोमा देखिएको व्यक्ति आफू नभएको र आपराधिक गिरोहले भ्रम फैलाएको दाबी गर्दै आएका छन् ।

भिडियो भाइरल भएपछि पौडेलको टिकट खोसेर थापालाई दिइएको थियो । आफ्नो भिडियो थापानिकट कार्यकर्ताले भाइरल बनाएको नेता पौडेलको दाबी छ । तर, उक्त भिडियो एमालेकै दुई नेताले बालकोट लगेर अध्यक्ष ओलीलाई देखाएको चर्चा पनि कास्कीमा छ ।

नेता पौडेलले गत चुनावमा पार्टीको आन्तरिक कारणले धेरैको मन कुँडिएको र त्यसलाई बुझाउन नसकेको पनि जिकिर गरेका छन् । ‘वैशाख ३० गते सम्पन्न स्थानीय तहको निर्वाचनमा पार्टीको आन्तरिक कारणले धेरै कमरेडहरुका मन कुँडिएका छन्, भाँचिएका छन् । आफ्नो मनलाई बुझाउन सकिरहेका छैनन्,’ शुक्रबार बिहान फेसबुकमा अर्को स्टाटस लेख्दै नेता पौडेलले भनेका छन्, ‘एक/दुई जना नेताहरू बसेर चोचोमोचो मिलाउँदैमा ती फाटेका मनहरू जोडिनेवाला पनि छैनन् ।’ आत्मालोचना, समस्याको जड पत्ता लगाएर समाधान गर्नतिर नलागे कास्कीमा एमालेलाई एक नम्बर पार्टी बनाउन नसकिने नेता पौडेलको भनाइ छ ।

याे पनि पढ्नुहाेस्:

‘अन्तर्घात विवाद’ साम्य पार्न र चुनाव हाँक्न मेयर हारेका कृष्ण थापा इन्चार्जमा बढुवा

प्रकाशित मिति: शुक्रबार, साउन २७, २०७९ १०:११