विद्यार्थीले फुटाएको हेटौँडा क्याम्पसको सिसा र गमला विद्यार्थीले नै पैसा उठाएर फेरे

विद्यार्थीले फुटाएको हेटौँडा क्याम्पसको सिसा र गमला विद्यार्थीले नै पैसा उठाएर फेरे

A+ A A-

हेटौँडा क्याम्पसमा स्नातक तह दोश्रो वर्षको परीक्षा दिन आएका जना छात्रामाथि कार्यालय सहयोगीले दुर्व्यवहार गरेको भन्दै आक्रोशित विद्यार्थीहरूले फुटाएको सिसा र फूलका गमला विद्यार्थीहरूले नै पैसा उठाएर फेरेका छन् ।

बुधबार बिहान मकवानपुर बहुमुखी क्याम्पसबाट आएका विद्यार्थीहरूको भिडले क्याम्पसको पूर्वतर्फको भवनमा तोडफोड गरेका थिए ।

परीक्षा दिन हेटौँडा क्याम्पस पुगेकी छात्रा भन्छिन्– मेरो पाइन्ट खोलियो, मसँगै बस्नेको प्याड खोल्न लगाए

विद्यार्थीहरूले ढुंगा प्रहार गरेपछि क्याम्पसको पूरै सिसा फुटेको थियो । क्याम्पसको प्रांगणमा राखिएको फूलका गमला पनि फुटेका थिए । क्याम्पस प्रशासनमा पीडित छात्रा, अभिभावक र विद्यार्थी संगठनसँग क्याम्पसको सहमति भइरहँदा प्रदर्शनमा उत्रिएका विद्यार्थीहरूको समूहले ढुंगा बर्साएका थिए ।

तोडफोडबाट क्षति पुगेको १४ वटा सिसा र ४ वटा झ्यालको यूपीभीसी प्यानल हेटौँडा क्याम्पसका विद्यार्थीहरूले १ सयदेखि २ सय रुपैयाँसम्म संकलन गरेर बिहीबार जडान गरिएको स्नातक तह चौथो वर्षमा अध्ययनरत् राजिव फुयाँलले बताए ।

परीक्षार्थीको भित्री वस्त्र खोल्न लगाएको भन्दै हेटौँडा क्याम्पसमा तोडफोड

फुयाँलको नेतृत्वमा स्नातक तह चौथो वर्षको समूहले क्याम्पसमा तोडिएको सिसा जडान गरिएको उनको भनाइ छ । फुयाँलले आफ्नै ६ हजार रुपैयाँ खर्चमा २३ वटा फूलसहित गमला पनि राखेको जानकारी दिए ।

‘अर्को क्याम्पसका विद्यार्थीहरूले सिसा र गमला फुटाए पनि हाम्रो मन्दिर हामीले बनाउनु पर्छ भनेर सबैसँग पैसा उठाएर टुटेका सिसा र गमला आज जडान गरेका हौँ,’ फुयाँलले भने ।

हेटौँडा क्याम्पस प्रकरण : परीक्षार्थीलाई भित्री वस्त्र खोल्न लगाउने दुई जना निलम्बित

उनले मन्दिर समान शैक्षिक संस्थामा तोडफोड भएको घटनाले दुःखी भएको सुनाए । ‘हुन नहुने घटना घटिसकेपछि त्यसको क्षमायाचना र समाधानको पाटो थियो नै, समाधान पनि निस्कियो । शिक्षा लिने ठाउँ मन्दिरसमान हो । ज्ञान लिने ठाउँमै तोडफोड गर्नु राम्रो होइन । शैक्षिक संस्था आफ्नो र अर्काको भन्ने हुँदैन, शिक्षा लिने ठाउँ सबै एकै हुन्,’ फुयाँलले भने ।

हेटौँडा क्याम्पसमा परीक्षाका क्रममा चिट ल्याएको भन्दै दुई जना महिला कार्यालय सहयोगीहरूले ३ जना छात्राको पाइन्ट र १ जना छात्राको भित्री वस्त्रसमेत खोल्न लगाएको आरोप पीडितहरूले लगाएका थिए । उनीहरूलाई बुधबार नै क्याम्पस प्रशासनले निलम्बन गरेर घटनाको सत्यतथ्य पत्ता लगाउन छानबिन समिति बनाएको छ ।

प्रकाशित मिति: बिहीबार, साउन ५, २०७९ १९:३०