हेटौँडा क्याम्पस प्रकरण : परीक्षार्थीलाई भित्री वस्त्र खोल्न लगाउने दुई जना निलम्बित

हेटौँडा क्याम्पस प्रकरण : परीक्षार्थीलाई भित्री वस्त्र खोल्न लगाउने दुई जना निलम्बित

A+ A A-

हेटौँडा क्याम्पसमा परीक्षाका क्रममा चिट ल्याएको भन्दै छात्राहरूको भित्री वस्त्रसमेत खोल्न लगाउने दुई जना कार्यालय सहयोगी निलम्बनमा परेका छन् ।

मंगलबार स्नातक तह दोस्रो वर्षको परीक्षा दिन गएका मकवानपुर बहुमुखी क्याम्पसका चार जना छात्रामाथि दुई जना गार्डले पाइन्ट र भित्री वस्त्रसमेत खोल्न लगाएको भन्दै बुधबार बिहानदेखि विद्यार्थी आन्दोलनमा उत्रिएका थिए ।

बुधवार क्याम्पसमा पीडित छात्रा, अभिभावक, विद्यार्थी संगठनबीच भएको वार्तापछि दुर्व्यवहार गर्ने दुई जना कार्यालय सहयोगीहरूलाई निलम्बन गर्ने सहमति भएको अनेरास्ववियु मकवानपुरका सचिव पुष्कर तिमल्सिनाले जानकारी दिए ।

‘परीक्षार्थी चेकजाँचमा संलग्न कार्यालय सहयोगी दुई जनालाई त्रिविलगायतका कुनै परीक्षामा सहभागी हुन नपाउने गरी आजकै मितिबाट निलम्बन गरिनेछ,’ सहमतिपत्रमा भनिएको छ । परीक्षा सञ्चालनका क्रममा देखिएका कमजोरीप्रति क्याम्पस प्रशासनले दुःख व्यक्त गर्दै क्षमा मागेको छ । आगामी दिनहरूमा हुने परीक्षा व्यवस्थित, भयरहित र सौहार्दपूर्ण वातावरणमा सञ्चालन गरिने प्रतिबद्धतासमेत व्यक्त गरिएको क्याम्पस प्रमुख देवचन्द्र मानन्धरले बताए ।

त्यस्तै, क्याम्पसको नियमित पठनपाठन, परीक्षालगायतका कार्यक्रम शान्तिपूर्ण तथा सहज वातावरणमा सञ्चालन गर्न/गराउन सहयोग पुर्‍याइने सहमतिपत्रमा उल्लख छ । विभिन्न परीक्षामा सहभागी कर्मचारीहरूबाट परीक्षार्थीहरूमाथि अभद्र व्यवहार भएको भन्ने गुनासोउपर सत्यतथ्य छानबिन गरी क्याम्पस सञ्चालक समितिसमक्ष कारबाहीका लागि सिफारिस गर्न तीन दिनभित्र प्रतिवेदन पेस गर्नेगरी छानबिन समिति गठन गरिएको छ ।

मंगलबार १२ बजे परीक्षा दिन क्याम्पस हाताभित्र प्रवेश गर्दा दुई जना महिला कार्यालय सहयोगीहरूले एक छात्रामाथि महिनावारी हुँदा लगाएको प्याड र तीन छात्रालाई पाइन्ट खोल्न लगाएको आरोप थियो । पीडित छात्राहरूले गोपनीयता हनन हुने गरी जाँच गरिएको र परीक्षार्थीलाई मानसिक तनाव दिएको भन्दै क्याम्पस प्रशासनमा छानबिन गरेर कारबाही गर्न माग गरेका थिए । सहमतिमा पीडित छात्राहरूका अभिभावकहरूको पनि उपस्थिति थियो ।