परीक्षा दिन हेटौँडा क्याम्पस पुगेकी छात्रा भन्छिन्– मेरो पाइन्ट खोलियो, मसँगै बस्नेको प्याड खोल्न लगाए

परीक्षा दिन हेटौँडा क्याम्पस पुगेकी छात्रा भन्छिन्– मेरो पाइन्ट खोलियो, मसँगै बस्नेको प्याड खोल्न लगाए

A+ A A-

हेटौँडा क्याम्पसमा मंगलबारदेखि सुरु स्नातक तह दोस्रो वर्षको परीक्षामा पहिलो दिनमै सहभागी छात्रामाथि भएको दुर्व्यवहार घटनाले अग्र रूप लिएको छ ।

परीक्षा दिन पुगेका चार जना छात्रामाथि हेटौँडा क्याम्पसका कर्मचारीले गलत क्रियाकलाप गरेको भन्दै बुधबार बिहानैदेखि विद्यार्थीहरू प्रदर्शनमा उत्रिएका छन् । प्रदर्शनले उग्र रूप लिँदा हेटौँडा क्याम्पसमा तोडफोड भएको छ । विरोधमा उत्रिएका विद्यार्थीहरूले ढुंगा प्रहार गर्दै क्याम्पसको सिसा फुटाएको प्रहरीले जनाएको छ ।

मंगलबार १२ बजे परीक्षा दिन मकवानपुर बहुमुखी क्याम्पसका छात्राहरू क्याम्पस हाताभित्र प्रवेश गरेका थिए । ‘हामी १२ बजे अगाडि त्यहाँ पुगिसकेका थियौँ । क्याम्पसको भित्री गेटमै बसेका गार्डहरूले शंका लागेको भनेर मलाई पाइन्ट खोल्न लगाए ।’ शिलापत्रसँग पीडित छात्राले भनिन्, ‘गेटमै महिला गार्ड हुनुहुन्थ्यो, तैँले चिट ल्याएको जस्तो लाग्यो, भित्र हिँड् भनेर कोठामा लानुभयो । भित्र लगेर पाइन्ट खोल्न लगाएपछि चिट रहेनछ, अब जा भनेर मलाई पठाइदिनुभयो ।’

आफूसँगै तीन जनाको पाइन्ट खोल्न लगाएर गार्डबाट दुर्व्यवहार भएको पीडित छात्राले गुनासो गरिन् । ‘चिट ल्याएको शंका भए कक्षाभरि हामीलाई निगरानी गरेर बसेको भए हुन्थ्यो । क्याम्पसमा पुगेर हामीले पाइन्ट खोल्नुपर्दा परीक्षा कसरी दिन सक्यौँ होला, यसको जिम्मेवारी कसले लिन्छ ?,’ पीडित छात्राले भनिन् ।

उनका अनुसार गार्डले एक छात्रामाथि भित्री बस्त्रसमेत खोल्न लगाएका थिए । एक पीडित छात्राले आफू महिनावारी भएको र ‘प्याड’ प्रयोग गरेको भन्दासमेत गार्डले ‘प्याड’मा समेत चिट हुन्छ भन्दै खोल्न लगाएको उनले बताइन् । ‘हाम्रो त पाइन्ट मात्रै खोल्न लगाइएको थियो । एक जना साथीको त प्याड नै खोल्नुपर्छ भनेर कोठाभित्र लगे । उनले हामीसँग महिनावारी छु भन्दा पनि प्याड खोल्न लगाएको गुनासो गरेकी थिइन्,’ छात्राले गुनासो गरिन् ।

गोपनीयताको हक व्यक्तिको संविधानप्रदत्त मौलिक हक हो । गोपनीयताको हकअन्तर्गत व्यक्तिको शरीर पनि पर्छ । चिट बोकेको आशंकामा संविधानको मौलिक हक नै खोसिने गरी खानतलासी गर्नु गम्भीर अपराध रहेको अधिवक्ता बालकृष्ण अधिकारीले बताए । परीक्षासम्बन्धी कुनै ऐनले बालिकाको गोप्य संवेदनशील अंगको खानतलासी गर्ने अधिकार नदिएको अधिवक्ता अधिकारी बताउँछन् ।

पीडित छात्राहरू अहिले हेटौँडा क्याम्पसको प्रशासन कक्षमै छन् । ‘हामीहरू सबै जना क्याम्पस प्रशासनभित्र छौँ, सरहरूले गल्ती भयो, अब राम्रोसँग परीक्षा दिनू भनेर हामीलाई भनिरहनुभएको छ,’ ती छात्राले भनिन् । हेटौँडा क्याम्पसमा यसअघि पनि परीक्षाको समयमा दुर्व्यवहारका घटना भएको विद्यार्थीहरूले बताएका छन् ।

हेटौँडा क्याम्पसले एक विज्ञप्ति जारी गर्दै घटनाका सम्बन्धमा ध्यानाकर्षण भएको जनाएको छ । छात्रामाथि भएको दुर्व्यवहारको घटनामा छानबिन अगाडि बढाउने र दोषी देखिए कारबाही गर्ने प्रतिबद्धता क्याम्पसले जनाएको छ । क्याम्पसले पीडित छात्रा, छात्राका अभिभावक र विद्यार्थी संगठनहरूसँग छलफल भइरहेको भन्दै संयमित भइदिन आग्रह गरेको छ ।

मकवानपुर बहुमुखी क्याम्पस र हेटौँडा क्याम्पस जिल्लाका ठूला शैक्षिक संस्थासमेत हुन् । यी दुई क्याम्पसबीच प्रतिष्ठाको लडाइँका कारण हुने प्रतिस्पर्धाले बेला–बेला चर्चासमेत पाउँछ ।