पार्टीलाई झुक्याउँदै मन्त्री आलेले भतिजालाई गरे तारागाउँमा भर्ती

A+ A A-

आफूले भनेका मान्छे नराखेको भन्दै नेपाल एयरलाइन्सका कार्यकारी अध्यक्ष युवराज अधिकारीमाथि हातपात गरेका संस्कृति, पर्यटन तथा नागरिक उड्डयनमन्त्री प्रेमबहादुर आलेले नाताले भतिजो पर्ने व्यक्तिलाई तारागाउँ विकास समितिको सदस्य-सचिव बनाएका छन् ।

सम्बन्धित समाचार

पर्यटनमन्त्री आलेको हर्कत- एयरलाइन्सका कार्यकारी अध्यक्षमाथि कार्यकक्षमै हातपात र अश्लील गाली

उनले आफ्नै पार्टी नेकपा एकीकृत समाजवादीलाई झुक्याउँदै भजितो पर्ने महेन्द्रबहादुर थापालाई तारागाउँको सदस्य-सचिवमा नियुक्त गरेकाे खबर आज नागरिक दैनिकले छापेको छ ।

सदस्य-सचिव हुँदा हायात रिजेन्सी होटलले अतिक्रमण गरेको १५० रोपनी जग्गाको विवरण सार्वजनिक गरेर प्रशंसा कमाएका नारद लुइँटेलको नाम नेकपा एसले सिफारिस गरेको थियो ।

अध्यक्ष प्रह्लाद ज्ञवालीकाे कार्यशैलीप्रति असन्तुष्टि जनाउँदै २८ मंसिरमा तत्कालीन सदस्य-सचिव झविन्द्र ज्ञवालीले राजीनामा दिएपछि साे पद रिक्त थियाे । पार्टीले पठाएकाे नामलाई पन्छाउन नसकेपछि मन्त्री आलेले मन्त्रीस्तरीय निर्णयबाट लुइँटेललाई सदस्य-सचिव बनाए । जबकि, उनकाे नियुक्ति मन्त्रिपरिषद् बैठकबाट हुनुपर्ने प्रस्ट व्यवस्था तारागाउँ विकास समिति गठन आदेश, २०३४ (पहिलो संशोधन २०६१) मा छ । याे जान्दाजान्दै मन्त्रीले विवादित प्रक्रियाबाट नियुक्ति दिए ।

सुरुमा मन्त्रीले लुइँटेलबाटै ‘आर्थिक लाभ’ उठाउन खोजेको स्रोतलाई उद्धृत गर्दै समाचारमा दाबी गरिएकाे छ । मन्त्रीले नियुक्ति दिएकाे पैसा मागेपछि लुइँटेलले इन्कार गरे । यति भइसक्दा पनि मन्त्री आलेले नियुक्ति रोक्न सक्ने अवस्था नभएकाले २५ फागुनमा विवाद उत्पन्न हुनेगरी नियुक्ति दिएका थिए ।

लगत्तै सर्वाेच्च अदालतमा यसविरुद्ध रिट पर्‍याे । सर्वाेच्चले तत्कालका लागि नियुक्ति रोक्ने ‘अल्पकालीन आदेश’ दियाे । याे मुद्दा विचाराधीन अवस्थामा रहेकै बेला मन्त्री आलेले भतिजाे पर्ने थापालाई सदस्य-सचिव बनाएका हुन् । एमालेका पूर्वकार्यकर्ता थापा पार्टी फुटेपछि नेकपा एस डोटी जिल्लाकाे इन्चार्ज बनेका थिए । नियुक्ति पाउनुअघि उनी मन्त्री आलेकै सचिवालयमा काम गर्थे ।

सम्बन्धित समाचार

प्रकाशित मिति: शुक्रबार, असार ३, २०७९ ०९:५१