राज्यको गल्तीले नागरिकले सजाय पाए, तत्काल नागरिकता विधेयक पारित होस् : उपेन्द्र यादव

राज्यको गल्तीले नागरिकले सजाय पाए, तत्काल नागरिकता विधेयक पारित होस् : उपेन्द्र यादव

A+ A A-

जनता समाजवादी पार्टीका अध्यक्ष उपेन्द्र यादवले यथाशीघ्र नागरिकता विधेयक संसदबाट पारित गराउन माग गरेका छन् । संसदमा नीति तथा कार्यक्रमको छलफलमा सहभागी हुँदै उनले राज्यले नागरिकता विधेयक पारित नगरेर गल्ती गर्दा सजाय जनताले भोग्नुपरेकाले त्यसको अन्त्य हुनुपर्ने बताए ।

नागरिकलाई गैरनागरिक बनाउनु गैरजिम्मेवारीपूर्ण रहेको भन्दै यादवले भने, 'आमा-बुवाले जन्मसिद्ध रूपमा नागरिकता पाउँदा तीनका छोराछोरी गैरनागरिक छन् । लाखौँले नागरिकता नपाउँदा अधिकारबाट बञ्चित भइरहेका छन् । तत्कालै नागरिकता ऐन ल्याउनुपर्दछ ।'

यादवले समावेशी समानुपातिक प्रणाली संघीय लोकतान्त्रिक गणतन्त्रको महत्वपूर्ण आयाम भए पनि यसको अझै कार्यान्वयन हुन नसकेको बताए । 'सरकारी नियुक्तिहरूमा समावेशी समानुपातिक प्रणालीलाई अबलम्बन गरिएको देखिँदैन, यसलाई सच्याउनुपर्छ,' उनले भने ।

यादवले संसदबाट संघीय निजामती ऐन तत्काल पारित गर्नुपर्ने माग समेत गरेका छन् । 'संघीय निजामती ऐनलाई पारित नगर्ने हो भने संघीय लोकतान्त्रिक गणतन्त्र अझै संस्थागत हुन सक्दैन । तत्कालै ऐन पारित हुनुपर्छ,' उनले भने ।

यादवले तराई-मधेस विकास कार्यक्रमलाई निरन्तरता दिँदै विकासको गति अघि बढाउन सरकारसँग माग गरेका छन् । 'हुलाकी-सडकलाई इग्नोर गरिएको छ । लागत ५ अर्ब हुन्छ बजेट ५ करोड विनियोजन हुन्छ यसरी आयोजना कहिले पूर्ण हुन्छ?' उनको प्रश्न छ । विकासलाई सन्तुलित ढंगले अघि बढाउन यादवले सरकारको ध्यानाकर्षण समेत गराएका छन् ।