भुवन केसीलाई प्रश्न- सरकारी नियुक्तिको आसमा कांग्रेस पसेको हो ?

A+ A A-

अभिनेता भुवन केसी मंगलबार कांग्रेस प्रवेश गरेका छन् । सभापति तथा प्रधानमन्त्री शेरबहादुर देउवाले बालुवाटारस्थित सरकारी निवासमा आयोजित कार्यक्रममा भुवनलाई कांग्रेसमा स्वागत गरेका हुन् । भुवन २०७० सालको चुनावताका एमाले प्रवेश गरेका थिए । संसदीय चुनावमा उठ्ने हल्ला भए पनि पछि उनले टिकट भने पाएनन् । हालसालै भुवनले एमाले परित्याग गरेपछि उनी राप्रपामा जाने हल्ला थियो । केही समयअघि स्वागत नेपाल नेतृत्वको उन्नत लोकतन्त्र पार्टीबाट काठमाडौं महानगरपालिकाको प्रमुखमा उठ्ने चर्चा थियो । तर, पछि उनले आफू नउठ्ने घोषणा गरेका थिए । अचानक कांग्रेस प्रवेश गरेका अभिनेता भुवनसँग शिलापत्रले गरेको कुराकानीको सम्पादित अंश:

तपाईं आज अचानक कांग्रेस प्रवेश गर्नुभएको हो कि पहिले केही तयारी थियो ?

धेरै दिनको तयारी त होइन । २० दिनअघि शेरबहादुर देउवासँग बालुवाटारमा कुराकानी भएको थियो । उहाँले भन्नुभएको थियो- भुवनजी तपाईंजस्तो कलाकार हाम्रो पार्टीलाई चाहिन्छ । कला क्षेत्रको प्रवर्द्धनका लागि म र कांग्रेसले पूर्ण रूपमा सहयोग गर्छु भन्नुभयो । धेरै दिनदेखि सोचिरहेको थिएँ । केही दिनअघि मात्र कांग्रेस प्रवेश गर्ने निर्णय गरेको थिएँ र आज औपचारिक रूपमा प्रवेश गरेको हुँ ।

यसअघि तपाईं एमालेमा हुनुहुन्थ्यो । फेरि कांग्रेस प्रवेश गर्नुभयो । तपाईंले सोचेजस्तो कांग्रेस पार्टीमा छ त ?

मैले कलाकारिता गरेको ४० वर्ष भयो । चार दशकको लगानी मेरो यो क्षेत्रमा छ । यो क्षेत्रको प्रवर्द्धन र विकास गर्ने मेरो चाहना हो । नेपाली चलचित्रलाई विश्वमा चिनाउने मेरो सपना हो । म एमालेमा त्यही आशाले लागेको थिएँ । त्यहाँ कसैले पनि चासो दिएको पाइनँ । तर, कांग्रेसले अब त्यो काम गर्छ । कांग्रेसमा त्यो सम्भावना देखेर म प्रवेश गरेको हुँ ।

कांग्रेसले कला क्षेत्रको प्रवर्द्धनका लागि काम गर्छ भन्नेमा ढुक्क हुनुहुन्छ ?

सकारात्मक कुरा भएको छ । पार्टी सभापतिले नै आश्वासन दिनुभएको छ । यसअघि पनि कांग्रेसले कला क्षेत्रका लागि काम गरेको छ । त्यसैले आशा छ ।

यसअघि तपाईं स्वागत नेपालको पार्टीबाट काठमाडौंको मेयरमा उठ्ने चर्चा थियो । पछि उठ्नुभएन । खास कुरा के थियो ?

स्वागत नेपाल प्रिय भाइ हुन् । उनले 'दाइ तपाईं मेयरमा हाम्रो पार्टीबाट उठ्नुपर्छ' भनेर प्रस्ताव राख्नुभएको थियो । तर, मैले राजनीतिमा सक्रिय हुने निर्णय गरेको थिइनँ । त्यसकारण उठिनँ ।

चुनावका बेलामा कलाकारहरूमा पार्टी प्रवेशको लहर चल्छ । चुनावपछि पुन: भूमिकाबिहीन भएर पार्टी परित्याग गर्छन् । कलाकारलाई चुनावी प्रयोग गर्ने पार्टीको रणनीति त हैन ?

यसअघि त्यस्तो भएको छ । कलाकारलाई पार्टीले कुनै अवसर र भूमिका दिएका छैनन् । सधैँ त्यस्तो हुनुहुन्न । कलाकारले कला क्षेत्रबाट देशमा ठूलो योगदान गरेका छन् । कलाकारिता क्षेत्रको प्रवर्द्धनका लागि पनि राजनीतिमा कलाकार आउनु जरुरी छ । मलाई लाग्छ कांग्रेसले त्यस्तो गर्दैन । हिजोका दिनमा कलाकारले गर्दा नै विभिन्न आन्दोलन सफल भएका हुन् । गाउँ-गाउँ गएर कलाकारले गरेका दु:ख साना छैनन् ।

कलाकार/सर्जक सधैँ सत्ताको प्रतिपक्ष हुन्छन् भनिन्छ । सत्तामाथि त सधैँ दबाब सिर्जना गर्ने दायित्व सर्जकमा हुन्छ । यतिबेला तपाईंहरूले पार्टी प्रवेश गर्नुले कुनै नियुक्तिको स्‍वार्थ पो हो कि भन्ने आशंका पनि छन् नि ? त्यो आशाले जानुभएको त हैन ?

मलाई कुनै नियुक्तिको लोभ र स्वार्थ छैन । कलाकारहरू कुनै पदका लागि लालयित भएर पार्टीमा प्रवेश गरेका हुन्नन् । बरु उल्टै पार्टीले आफ्नो स्वार्थका लागि प्रयोग गरेको देखिन्‍छ । कतिपय अवस्थामा महत्त्वपूर्ण पदमा नआई काम गर्न सकिन्न । गाउँ-गाउँ, बस्ती-बस्तीमा पुगेका हामीलाई जनताको वास्तविक दु:ख थाहा हुन्छ । अवसर पाउँदा देश र जनताका लागि काम गर्ने हो । त्यसैले मेरो व्यक्तिगत स्वार्थ केही छैन ।

यी पनि पढ्नुस् :

कांग्रेस छिरेका भुवनलाई २० दिनअघिको भेटमा के भनेका थिए देउवाले ?

अभिनेता भुवन केसी कांग्रेसमा प्रवेश

प्रकाशित मिति: मंगलबार, वैशाख २०, २०७९ १२:४५