बेलकाका मेयरलाई 'गलपासो' बनेको ओली सरकारको त्याे निर्णय (भिडियाेसहित)

A+ A A-

बेलका नगरपालिकाका मेयर दुर्गाकुमार थापा (स्वस्ती) ले आज राजीनामा दिँदैछन् । ३० वैशाखमा हुने स्थानीय चुनावमा फेरि मेयरमा उम्मेदवारीका लागि पद छोड्न लागेका उनी हिजो दिनभर सर्वोच्च अदालतभित्र थिए । साँझ मात्र उदयपुर फर्केका थापा केही महिनायता कतिपय महत्त्वपूर्ण काम छोडेर अदालत धाइरहेका छन् ।

आफ्नै पार्टी अध्यक्ष केपी ओली नेतृत्वको पूर्ववत् सरकारले ६ जेठ २०७७ मा कोसी टप्पुको १७५.२३ हेक्टर क्षेत्रमा कबुलियत वन बनाउन गरेकाे निर्णय थापाका लागि अहिले 'गलपासाे' जस्तै बनेकाे छ । किनकि, त्याे निर्णयमा उनी पनि मुछिएका छन् । मेयर थापाकै सिफारिसमा डिभिजन वन कार्यालयहुँदै कबुलियत वन गठनको प्रस्ताव केन्द्रसम्म पुगेको भन्दै विपक्षीहरूले उछिताे काढिरहेका छन् । हुन पनि, २९ पुस २०७७ मा नगरप्रमुख थापाकाे हस्ताक्षर रहेकाे एक सिफारिस डिभिजन वन कार्यालय उदयपुरमा पुगेकाे थियाे । मेयर थापाले लेमनग्रास खेतीको सन्दर्भमा पठाएको सिफारिसलाई फरक ढंगले प्रचार गरिएको बताउँदै आएका छन् ।

कबुलियत वनबारे शिलापत्रले गरेकाे विस्तृत रिपाेर्टिङ पढ्नुहाेस्- दुई कम्पनीलाई कोसी टप्पु लिजमा दिने सरकारकाे निर्णयले ८ सय परिवार सडकमा (भिडियाे) ।

असारे झरी झेल्दै प्रदर्शनमा उत्रेका केही स्थानीयवासीलाई पुलिसले कुटेर घाइते बनाएको थियो ।

वर्षौंदेखि आफू बसिरहेको क्षेत्रबाट उठिबास लगाउने गरी भएकाे निर्णयविरुद्ध गत असारमा बेलका नगरपालिका वडा नम्बर २, ३, ८ र ९ का सयौँ स्थानीयवासी खेतीपाती र बनिबुतो छाेडेर आन्दोलनमा उत्रेका थिए । झरी झेल्दै प्रदर्शनका क्रममा केही स्थानीयवासीलाई पुलिसले कुटेर घाइते बनाएको थियो । कबुलियत वन गठन गर्ने भनिएकाे क्षेत्रमा करिब १९ सय परिवार बस्छन् ।

फेरि मेयरकाे भाेट माग्दै टप्पु झर्नुअघि थापाले ओली क्याबिनेटको निर्णयमा आफ्नो संलग्नता नरहेको पुष्टि गर्नुपर्नेछ । त्यसैले उनी सरकारकाे त्याे निर्णय राेक्न माग गर्दै सर्वाेच्च धाइरहेका छन् । 'टप्पुवासीलाई व्यवस्थित गर्नुपर्छ भनेर लड्ने मलाई कतिपयले कबुलियत वनसँग जोडेर प्रचार गरिरहेका छन्', सर्वाेच्चबाट निस्कँदै गरेका मेयर थापाले भने, 'टप्पुका १९ सय परिवारलाई उठिबास लगाउने कुरामा मेरो किमार्थ सहमति हुँदैन । त्यसैले त अदालत धाइरहेको छु ।'

एमाले बेलकाले फेरि उनै थापालाई टिकट दिने चर्चा छ । उनलाई चुनाैती दिन गठबन्धनका तर्फबाट आम्बासीका अशाेक कार्की तम्तयार छन् । तर, गठबन्धनका उम्मेदवारसँग भन्दा बिच्केका टप्पुवासीले साथ छाेड्लान् कि भन्नेमा थापाकाे चिन्ता बढी देखिन्छ । भन्छन्, 'कबुलियत वनसम्बन्धी निर्णयसँग मलाई जोडेर विपक्षीले जनताको दिमाग भुटेका छन् । म टप्पुवासीकै लागि लडिरहेको छु ।'

आफ्नो पहिलो कार्यकालमा अघि बढाएका योजनाहरू समयमै, सफलतापूर्वक पूरा गर्न फेरि आफू मेयर उठ्न लागेको उनी बताउँछन् ।

'तपाईंको पालामा अघि बढेका योजनालाई अरुले निरन्तरता दिन सक्दैनन् भन्न खोज्नुभएको हो ?'

जवाफमा थापा भन्छन्, 'पाँच वर्षमा मैले जति दातृ निकायसँग सहकार्य गरेँ, उनीहरूको विश्वास जितेर जति योजना र कार्यक्रमहरू भित्र्याएँ, मबाहेक जो आए पनि ती संघसंस्थासँग चिनजान गर्दै दुई वर्ष बित्ला । अनि कहिले विश्वास कायम गर्ने, कहिले योजना कार्यक्रम ल्याउने ?' यसबाहेक आफूले कार्यान्वयनमा लगिसकेका महत्त्वपूर्ण योजनाहरूलाई पूर्णता दिन र नयाँ भिजनहरू लागू गर्न पनि आफू दोहोरिन खोजेको उनको भनाइ छ ।

याे पनि..

बेलका नगरपालिकाको चुनावी गणित: कमजोर माओवादी नै निर्णायक

'तपाईंको विपक्षमा गठबन्धन भएकाले यसपालि तपाईं हार्नुहुन्न भन्ने आधार कमजोर छ, जित्नुभएन भने ?'

उनी भन्छन्, 'जित्छु भन्नेमा ढुक्क छु । कथं हारेँ भने जित्ने साथीलाई सघाउँछु । जसरी हुन्छ बेलका नगरपालिकाको हक, हित र समृद्धिका लागि खट्छु ।'

स्थानीय तहको चुनावमा उम्मेदवार बन्न जनप्रतिनिधिले राजीनामा दिनुपर्ने निर्वाचन आयोगकाे निर्णयलाई सर्वाेच्च अदालतले समेत सदर गरिदिएकाे छ । त्यसैले फेरि उम्मेदवारी दिने तय गरेका जनप्रतिनिधिले आफ्नो कार्यकालको अन्तिम बैठकपछि राजीनामा दिनेछन् ।

आफ्नै पार्टी नेतृत्वको तत्कालीन सरकारले गरेको निर्णयविरुद्ध मुद्दा लडिरहेका मेयर थापाले आजै राजीनामा गर्दैछन् । शिलापत्रले उनीसँग खासगरी कबुलियत वन प्रकरण अनि स्थानीय चुनावकाे सेराेफेराेमा रहेर कुरा गरेकाे छ । हेर्नुहाेस् भिडियाेः

२०७४ सालकाे चुनावमा बेलका नगरपालिकामा एमाले, कांग्रेस र माओवादीबीच प्रतिस्पर्धा भएको थियो । एमालेका थापा ५ हजार ६ सय १८ मतका साथ विजय हुँदा कांग्रेसका अशाेक कार्कीले ५ हजार २ सय ६६ भोट पाएका थिए । माओवादी केन्द्रबाट रमण भट्टराईले ४ हजार १ सय ३२ मत ल्याएका थिए । अन्तिम परिणाममा उपमेयर र छवटा वडा एमालेले जित्याे भने दुइटा वडामा कांग्रेस र एउटामा माओवादी केन्द्रका उम्मेदवार विजयी भएका थिए ।

प्रकाशित मिति: शुक्रबार, वैशाख ९, २०७९ १३:४५