बेलका नगरपालिकाको चुनावी गणित: कमजोर माओवादी नै निर्णायक

A+ A A-

उदयपुरकाे बेलका नगरपालिकामा माओवादी केन्द्र र नेपाली कांग्रेस गठबन्धन गरी चुनावी मैदानमा उत्रिने धेरैकाे अड्कलबाजी छ । १८ चैतमा नेकपा एसलाई समेत राखेर यी दुई पार्टीले छलफल थालेका थिए । नगरकेन्द्र रामपुरस्थित कांग्रेस पार्टी कार्यालयमा भएकाे बैठकमा माेर्चा बनाउन सहमत भए पनि भागवण्डामा ती दल प्रवेश गर्न सकेनन् । मेयर, उपमेयर र ९ वडाध्यक्ष पद बाँडीचुँडी नगरी गठबन्धनकाे सम्भावना पनि छैन ।

जिल्लाकै कान्छाे नगरपालिकामा नेकपा एमाले एक्लै मैदानमा उत्रिने निश्चितप्रायः छ । आकाङ्क्षी धेरै भएकाले एमालेले समेत मेयरसहितका पदमा उम्मेदवार टुंगो लगाउन सकेको छैन । पार्टीका नगर कमिटी अध्यक्ष गणेश बस्नेतले यसबारे छलफल गर्न आज बैठक राखेका छन् ।

१८ चैतमा नेकपा एसलाई समेत राखेर कांग्रेस र माओवादीले छलफल थालेका थिए ।

१८ चैतपछि कांग्रेस र माओवादीका नेताहरू औपचारिक छलफलमा बसेका छैनन् । मेयर उम्मेदवारका रूपमा हेरिएका कांग्रेस सभापति अशाेक कार्की भाेट माग्दै वडा-वडा घुम्नमा व्यस्त छन् । उपमेयरसहित पाँचवटा वडा मागिरहेको माओवादी आफ्नो प्रस्तावमा कांग्रेसले 'अहँ' भनेकाे अवस्थामा उठाउनुपर्ने उम्मेदवार टुंग्याउने दबाबमा छ ।

२०७४ सालकाे चुनावमा यहाँ त्रिपक्षीय भिडन्त भएको थियो । एमालेका दुर्गाकुमार थापा (स्वस्तिक) ५ हजार ६ सय १८ मतका साथ विजय हुँदा कांग्रेसका अशाेक कार्कीले ५ हजार २ सय ६६ भोट पाएका थिए । माओवादी केन्द्रबाट रमण भट्टराईले ४ हजार १ सय ३२ मत ल्याएका थिए । यसैगरी, जनता समाजवादीका टीकाराम थामीले १ सय ८९, राप्रपा नेपालका विनोद रायमाझीले ८६ , खम्बुवान् राष्ट्रिय मोर्चाका खीसाबहादुर राईले २९ मत पाएका थिए ।

अन्तिम परिणाममा उपमेयर र छवटा वडा एमालेले जित्याे भने दुइटा वडामा कांग्रेस र एउटामा माओवादी केन्द्रका उम्मेदवार विजयी भएका थिए ।

अघिल्लाे चुनावमा बेलका नगरपालिकामा २४ हजार ५ सय ६९ मतदाता थिए । त्यसमध्ये १७ हजार १ सय ५९ मत (६९.८४ प्रतिशत) खसेकाे थियाे । यसपालि ९ हजार मतदाता थपिएका छन् । १६ हजार ६ सय ९६ महिला र १६ हजार ३ सय १० पुरुष गरी बेलकामा मतदाता संख्या ३३ हजार ६ पुगेकाे छ ।

गठबन्धनकाे चर्चा

बेलकाका राजनीतिक दलहरू ३० वैशाखमै चुनाव हुने कुरामा विश्वस्त देखिँदैनन् । खासगरी माओवादी र कांग्रेसले गठबन्धनबारे निर्णय गर्न हतार नगर्नुको मुख्य कारण यसैलाई मानिएको छ । यद्यपि, चुनावी मैदानमा उत्रिनुपर्ने अवस्थामा यी दुई पार्टीले तालमेल गर्ने पक्काजस्तै छ । किनकि, उनीहरूका लागि एक्लाे एमाले ठूलै चुनाैती हाे ।

कांग्रेसमा फेरि कार्की

बेलका नगरका कांग्रेस सभापति अशाेक कार्की । ०७४ को चुनावमा दोस्रो भएका उनी यसपालि पनि चुनावी मैदानमा उत्रने तयारीमा छन् ।

बेलका कांग्रेसमा दुई गुट छन् । नगरसभापति अशोक कार्की उदयपुर निर्वाचन क्षेत्र नम्बर १ का सांसद एवं परराष्ट्रमन्त्री नारायण खड्काका विश्वासपात्र मानिन्छन् । नगर सभापति चुनाव हारेका सुशील सेढाईं पार्टी नेता शेखर कोइराला समूहका हुन् ।

मेयर पदमा कार्कीले फेरि टिकट पाउने पक्काजस्तै छ । नेता खड्काकै पहलमा अघिल्लो निर्वाचनमा कार्की उम्मेदवार बनेका थिए । शेखर समूहका सेढाईं पनि मेयरमा उठ्न चाहन्छन् । तर, उनी आकाङ्क्षीमै सीमित हुने निश्चितप्राय: छ । मेयरको मेच ताकिरहेका नेता जय सुवेदीलाई यसपालि वडाअध्यक्ष बनाएर व्यवस्थापन गर्ने तारताम्य नगर सभापति कार्कीले मिलाइसकेका छन् ।

पार्टी संगठन र कार्यकर्ता हेर्दा बेलकामा कांग्रेस बलियाे स्थितिमा छ । तर, पार्टीभित्रकाे 'जुँगाको लडाइँ'ले चुनावी दौडमा पछि पर्ने गरेको विगतले देखाउँछ । ०७४ सालकाे चुनावमा नेता सेढाईंसहित कांग्रेसका नाम चलेका नेताहरूकाे गृह वडामा कांग्रेसले जित्न सकेकाे थिएन । नगर केन्द्र रामपुर रहेकाे वडा नम्बर ९ मा कांग्रेस तेस्रो भएको थियो । जनाधार राम्रै मानिएको वडा नम्बर ३ मा पनि कांग्रेसका उम्मेदवार १ सय १ मतले हारेका थिए ।

यसपालि पनि कांग्रेस वृत्तमा 'चुनौतीको घण्टी' बजिसकेको छ । वडा नम्बर ९ मा सेढाईं समूहका पदम खड्काले दाबी गरिरहेका छन् । त्यही वडामा सभापति कार्कीले मेयर मागिरहेका नेता जय सुवेदीलाई अघि सारेका छन् । वडा नम्बर ३ मा सेढाईं खेमाका टंक आचार्यले भोट माग्न थालिसकेका छन् । तर संस्थापनले फेरि बाबुराम थापालाई उठाउने तयारी गरेको छ ।

'बेलका कांग्रेसका दुवै गुट आफूले भनेजस्तो नहुँदा अन्तर्घात गर्न पछि पर्दैनन् । विगतकाे चुनाव नियाल्दा यो कुरा थाहा पाउन सकिन्छ । यसपालि पनि त्यस्तो नहोला भन्न सकिँदैन, त्यसैले उसका लागि गठबन्धन उति नै जरुरी छ', बेलका माओवादीका एक नेताले भने ।

यसकाे अर्थ के हाे भने, जनाधार राम्रै भए पनि गठबन्धन नगरी अघि बढ्दा आफ्नैले भोट नदिने डर बेलकाको कांग्रेस संस्थापनलाई छ ।

उसो त, गठबन्धन गर्न कांग्रेसलाई माओवादीको 'गह्रौँ प्रस्ताव'ले पनि कम अप्ठेरोचाहिँ पारेको छैन । माओवादीले उपमेयरसहित पाँचवटा वडा मागिरहेको छ । ०७४ सालको चुनावमा वडा नम्बर ८ मा जितेको माओवादी केन्द्रले ४, ७ र ९ मा दोस्रो स्थान हासिल गरेको थियो । उपमेयरमा माओवादी तेस्रो भएको थियो । यही गणित देखाएर उसले कांग्रेससँग भागबण्डा खाेजेकाे छ । माओवादीले एमालेसँग गठबन्धन गर्ला भन्ने भय पनि कांग्रेसलाई छ ।

कांग्रेसले चाहिँ उपमेयर र दुईवटा वडा लिएर गठबन्धन बनाउन माओवादीसँग अनौपचारिक प्रस्ताव गरेको बताइन्छ । माओवादीकाे प्रस्ताव सर्लक्कै मान्दा कांग्रेसलाई आफ्नै आकाङ्क्षीहरूकाे चित्त बुझाउन सकस पर्ने देखिन्छ । माओवादीले मागिरहेको केही वडामा कांग्रेसका आकाङ्क्षीले भोट माग्न थालिसकेका छन् । कांग्रेसबाट उपमेयरमा बिर्सना राई (श्रेष्ठ), नानुमैया घिमिरे, निर्मला बस्नेत, माया वली, अमृता धमलालगायतकाे चर्चा छ । तर, जातीय भाेट बटुल्न कांग्रेसले उपमेयरमा बेलका-५ जहडाकी सुजाता राईलाई उठाउने देखिन्छ । बेलका किराँत समुदायकाे बाहुल्य रहेकाे पालिका हाे । गठबन्धन बनाउन कांग्रेसले माओवादीलाई उपमेयर पद सुम्पिनुपर्नेछ ।

बेलका कांग्रेसकै एक नेताका अनुसार, जेजस्ताे दबाब झेलेर भए पनि उपमेयरसहित तीनवटा वडामा माओवादीलाई भाेट माग्दिन कांग्रेस तयार हुन सक्छ । बेलकामा कांग्रेस, एमालेको तुलनामा कमजाेर भए पनि चुनावमा माओवादीकाे भूमिका महत्त्वपूर्ण हुन्छ । गठबन्धन हुने अवस्थामा माओवादी बेलका नगर कमिटी अध्यक्ष मनोज तामाङ आफैँ उपमेयर उठ्ने तयारीमा छन् ।

कथम् कांग्रेससँग गठबन्धन नभएकाे अवस्थामा माओवादीले सबै पदमा उम्मेदवारी दिने छ । यो अवस्थामा मेयरका लागि अध्यक्ष तामाङसहित रमण भट्टराई, गंगासरी राई, भरत घिमिरे र राकेश राईले दाबी गरिरहेका छन् । यीमध्ये भट्टराई अघिल्लो चुनावमा 'सन्तोषजनक' मत पाएका उम्मेदवार हुन् । आफ्नो जनाधार राम्रो रहेकाे र तामाङ पार्टी अध्यक्षकाे जिम्मेवारीमा भएकाले आफू योग्य उम्मेदवार रहेको तर्क भट्टराईकाे छ ।

यसैगरी, गंगासरी राई अघिल्लाे चुनावमा ३ हजार ६ सय ३५ मत पाएर उपमेयरमा तेस्राे भएकी उम्मेदवार हुन् । यसपालि उमेयरमा ललित राई, तीर्थ पराजुली, भीमा न्यौपानेलगायतले पनि दाबी गरिरहेका छन् । त्यसैले मेयर पदमा दाबी गरेर गंगासारीले उपमेयर टिकटका लागि पार्टीलाई दबाब दिएको हुन सक्ने बताइन्छ । यद्यपि, उम्मेदवारबारे पार्टीले चाँडै टुंगाे लगाउने सचिव भरत घिमिरेले बताए ।

एमालेलाई पनि सकस

बेलकाकाे एमालेले स्थानीय तह निर्वाचनका लागि कुनै पनि पदको उम्मेदवार टुंग्याएको छैन । उसको हकमा पनि तोकिएको समयमा चुनाव नहुने आशंकाले काम गरेको देखिन्छ । यद्यपि, आज नगर कमिटी बैठक राखेर छलफल भइरहेकाे अध्यक्ष गणेश बस्नेतले बताए ।

बेलका नगरपालिकामा एमालेले मेयर उम्मेदवार कसलाई बनाऊला ? धेरैकाे अनुमानमा हालका नगरप्रमुख दुर्गाकुमार थापा (स्वस्तिक) ले नै फेरि याे अवसर पाउनेछन् । भित्रभित्रै उनले भोट माग्न थालिसकेका छन् । आफ्नो कार्यकालमा भए, गरेका राम्रा काम हेरेरै आफूलाई जनताले भोट दिने उनको विश्वास छ ।

हालका मेयर, एमालेका दुर्गाकुमार थापा बेलकाका प्रभावशाली नेता हुन् । तर, माओवादी र कांग्रेस मिले जितका लागि उनको प्रभाव पर्याप्त हुने छैन ।

तर, मेयर थापाले दाबी गरेअनुसार राम्रै मात्र काम गरेको सत्य होइन भन्ने नेता एमालेभित्रै छन् । ढुंगा विवाददेखि कबुलियत वन प्रकरण अनि कतिपय नीतिगत योजनामा मेयरको भूमिकालाई लिएर जनता असन्तुष्ट रहेकाे ती नेताहरूको तर्क छ । साथै, पुस्ता हस्तान्तरणकाे कुरा पनि बेलका एमालेभित्र उठिरहेकाे छ । यसकाे अर्थ एमालेमा उनीबाहेक अरु पनि छन्, जो यसपालि उनकाे ठाउँ लिन चाहन्छन् ।

पार्टी नगर कमिटी अध्यक्ष बस्नेत स्वयम् मेयर पदका आकाङ्क्षी हुन् । एमाले प्रदेश कमिटी सदस्य धनपति आचार्यले पनि दाबी छोडेका छैनन् । वडा नम्बर ९ का वडाअध्यक्ष मोहन घिमिरेले पनि मेयर लड्ने रहर गरेका छन् । 'स्वस्तिक थापा पनि मेयरको आकाङ्क्षी हुनुहुन्छ तर उहाँ मात्र होइन, अरू आकाङ्क्षी पनि हुनुहुन्छ', बस्नेतले भने, 'पार्टीको आधिकारिक जवाफको कुरा गर्ने हो भने अहिलेसम्म हामीले मेयरको उम्मेदवार टुंगो लगाएका छैनौँ ।'

उपमेयरमा जिरा

एमालेले जिरा चाम्लिङ राईलाई उपमेयर उठाउने निश्चितजस्तै छ । हालकी उपमेयर राजकुमारी चौधरीले पनि याे पदमा दाबी गरिरहेकी छन् । समाजशास्त्रमा स्नातकाेत्तर चाम्लिङ समाजसेवीका रूपमा सक्रिय छिन् । छवि पनि राम्रो र जातीय भोट आउने भएकाले उपमेयरमा एमाले बेलकाले चाम्लिङलाई अघि सार्न लागेको हो । चौधरी भने आफ्नो कार्यकालमा बारम्बार विवादमा परेकी थिइन् । उनले मेयरलाई भ्रष्टाचारमा डुबेको आरोप लगाएकी थिइन् भने उपमेयर पद छोड्न चाहेको भन्दै फेसबुकमा लेखेकी थिइन् ।

वडाअध्यक्षमा धेरै

२५ चैतमा बसेको एमाले नगर कमिटीकाे बैठकले वडाका उम्मेदवार टुंगो लगाउन सकेन । २ र ८ (एमालेले हारेकाे वडा) बाहेक सबै वडामा एउटै पदका लागि ५ देखि ७ जनासम्म आकाङ्क्षी देखिनुले बेलका एमालेको टाउको दुखाएको छ । वडा नम्बर १ र ३ मा ७/७ जना, ४ मा ११ जना, ५ मा ८ जना, ६ मा ५ जना, ७ मा ४ जना र ९ मा ११ जना आकाङ्क्षी छन् ।

वडाअध्यक्ष उम्मेदवार टुंगाउने रस्साकस्सीबीच हिजाे मात्र एमाले बेलका नगर कमिटीका नेता घनराज दाहालले पार्टी परित्याग गरेका छन् । अघिल्लाे चुनावमा वडा नम्बर ८ का अध्यक्ष उम्मेद्वार बनेका उनी ५२४ मतका साथ दाेस्राे भएका थिए । याे वडामा उनी प्रभावशाली मानिन्छन् ।

कसले जित्ला ?

प्रमुख तीन पार्टीमध्ये बेलका नगरपालिकामा माओवादी केन्द्र कमजोर छ । तर, चुनावमा ऊ नै निर्णायक शक्तिका रूपमा देखिएकाे छ । उसले कांग्रेस वा एमाले जसलाई सघाउँछ, उसैले चुनाव जित्ने गणित छ । ०७४ सालको चुनावमा एमालेसँग कांग्रेसका मेयर उम्मेदवार ३ सय ५२ मतले हारेका थिए । त्यो चुनावमा एक्लै लडेको माओवादी केन्द्रले ४ हजार १ सय ३२ मत पाएको थियो । त्यसयता माओवादीले संगठनलाई केही सुधारेकाे पनि छ । कांग्रेस सांगठनिक रूपमा बलियो छ तर ऊभित्र आन्तरिक मेल छैन । त्यसैले एमालेलाई हराउन कांग्रेसलाई माओवादीको सहारा चाहिने देखिन्छ । किनकि, बेलकामा एमाले कमजाेर छैन ।

केन्द्रमा पार्टी फुटे पनि बेलका एमालेमा यसको खास असर देखिँदैन । स्थानीय सरकारमा रहेकाले केही भोट यसैको बलमा उसले तान्न सक्छ । एमालेका दुर्गाकुमार थापा व्यक्तिगत रूपमा राम्राे प्रभाव भएका नेता हुन् । तर, माओवादी र कांग्रेस मिले जितका लागि उनको प्रभाव पर्याप्त हुने छैन । र, माओवादी एमालेसित मिलेमा बेलकामा कांग्रेस एक्लैको केही जोर चल्ने छैन । एक्लाएक्लै लड्ने स्थितिमा भने एमाले दाेहाेरिन सक्ने सम्भावना देखिन्छ ।

तर, यसपालि बेलकामा तीन पार्टी छुट्टाछुट्टै लड्ने सम्भावना कम छ । कांग्रेसले माओवादीसँग मिलेर गठबन्धन गरेमा उसले जित्न सक्छ । उसो त, आफ्नो सर्त मानेमा माओवादीले एमालेसँग तालमेल गर्दैन भन्न सकिँदैन । उसले एमालेलाई साथ दिएमा कांग्रेस जिल्ल पर्ने निश्चित छ । तर, यो सम्भावनाचाहिँ निकै कम देखिन्छ ।

चर्चा र सम्भावना

एमालेबाट मेयरका आकाङ्क्षी

दुर्गाकुमार थापा (स्वस्तिक), गणेश बस्नेत, धनपति आचार्य, माेहन घिमिरे

सम्भावना

दुर्गाकुमार थापा (स्वस्तिक)

एमालेबाट उपमेयरका आकाङ्क्षी

जिरा राई, पूर्णकला बञ्जारा, कुमारी तामाङ, मीना आचार्य, पुण्यवती रेग्मी, नीति तामाङ

सम्भावना

जिरा राई

कांग्रेसबाट मेयरका आकाङ्क्षी

अशाेक कार्की, सुशील सेढाईं, जय सुवेदी

सम्भावना

अशाेक कार्की

कांग्रेसबाट उपमेयरका आकाङ्क्षी

सुजाता राई, बिर्सना राई (श्रेष्ठ), नानुमैया घिमिरे, निर्मला बस्नेत, माया वली, अमृता धमला, दुर्गा सुवेदी, अमृका राई, दीपा राई

सम्भावना

सुजाता राई

माओवादी केन्द्रबाट मेयरका आकाङ्क्षी

रमण भट्टराई, मनाेज तामाङ, गंगासरी राई, राकेश किराँती, भरत घिमिरे

सम्भावना

कांग्रेससँग गठबन्धन नभएकाे अवस्थामा रमण भट्टराई र मनाेज तामाङमध्ये एक जना

माओवादी केन्द्रबाट उपमेयरका आकाङ्क्षी

मेयर नपाउँदा- गंगासरी राई, ललित राई, तीर्थ पराजुली, भीमा न्यौपाने

सम्भावना

गंगासरी राई

नगरप्रमुख, उपप्रमुखमा एक/एक जना महिला-पुरुष प्रत्येक पार्टीले उम्मेदवार बनाउनुपर्ने संवैधानिक प्रावधान छ । यसरी उम्मेदवार बनाउँदा समग्र भूगोल पनि हेर्नुपर्छ ।

०७४ सालकाे चुनावी विवरण

२०७४ मा बेलका नगरपालिकामा नेकपा एमाले, नेपाली कांग्रेस र नेकपा माओवादीबीच मुख्य प्रतिस्पर्धा भएकाे थियाे । जनता समाजवादी, राप्रपा नेपाल, खम्बुवान् पार्टी चुनावमा सहभागी भएका थिए ।
२०७४ सालमा बेलकाकाे मतदाता संख्या २४५६९ थियाे । यसमा महिलाकाे संख्या १२२९१ र पुरुषकाे संख्या १२२७८ थियाे ।
जम्मा खसेको मत १७१५९ थियाे, जुन कुल मतदाताकाे ६९.८४ प्रतिशत हाे । सदर मत १५४४३ हो ।
नौवटा वडामा एमालेले छवटा, कांग्रेसले दुईवटा र माओवादी केन्द्रले एउटा वडा प्यानलसहित जितेका थिए ।
नगरप्रमुख र उपप्रमुख एमालेले नै जितेको थियाे । मेयरमा एमालेबाट दुर्गाकुमार थापाले ५८१८, नेपाली कांग्रेसका अशोक कार्कीले ५२६६, माओवादी केन्द्रबाट रमण भट्टराईले ४१३२, जनता समाजवादीका टीकाराम थामीले १८९, राप्रपा नेपालका विनोद रायमाझीले ८६ र खम्बुवान् राष्ट्रिय मोर्चाका खीसाबहादुर राईले २९ मत पाएका थिए ।
उपप्रमुख पदमा एमालेकी राजकुमारी चौधरीले जितेकी थिइन् । उनले ६१३१ मत, कांग्रेसकी दीपाकुमारी राईले ५२८६, माओवादीकी गंगासरी राईले ३६३५, जनता समाजवादीकी सरस्वती राईले २०६, राप्रपा नेपालकी भुकुमारी गिरीले १२१, खम्बुवान् राष्ट्रिय मोर्चाकी उर्मिला तामाङले २० मत पाएकी थिइन् ।
बेलका नगरपालिकामा जम्मा निर्वाचित संख्या ५० हाे । १९ जनाको कार्यपालिका छ ।
०७४ काे तथ्याङ्कअनुसार १८ वर्षभन्दा कम मतदातामा पुरुष १४२, महिला ५३ जना थिए । १८ देखि २४ वर्ष उमेरमा पुरुष २५५६ र महिला १७४७ थिए । २५ देखि ४० उमेर समूहमा पुरुष ४०२३ र महिला ४७७४ थिए । ४१ देखि ६० उमेरमा पुरुष ३७०१ र महिला ३८८१ । ६१ देखि ७५ वर्ष उमेरमा पुरुष १५६० र महिला १४६२ र ७५ उमेरभन्दा माथि पुरुष ४३६ र महिला ४२८ थिए ।
बेलका नगरपालिका वडा नम्बर १ मा कांग्रेसका उम्मेदवार दिनेश्वर चौधरी १०१२ मतका साथ विजय भएका थिए । याे वडामा एमालेका जङ्गबहादुर खड्काले ६७६ मत, माओवादीका गोपाल राईले ३६२ मत र राप्रपा नेपालका ढोढाई चौधरीले २० मत पाएका थिए ।
वडा नम्बर २ मा कांग्रेसका मिश्रीलाल चौधरीले ९६२, एमालेका बालजित राईले ८३४, माओवादीका परशुराम कठेतले ३२७ , राप्रपाका मोतिराम आचार्यले ६ मत पाएका थिए ।
वडा नम्बर ३ मा एमालेका भरत दर्लामी मगरले ६७०, कांग्रेसका बाबुराम थापाले ५७१ , माओवादीका जनक राईले ४७०, जनता समाजवादीका शिव राईले २०४, स्वतन्त्रबाट सुकदेव चौधरीले ७८, राप्रपा नेपालका पदमबहादुर तामाङले २९, खम्बुवान् राष्ट्रिय मोर्चाका उम्मेदवारले ४ मत पाएका थिए ।
वडा नम्बर ४ मा एमालेबाट दीपक दंगालले ६१३, माओवादी केन्द्रका मनोज तामाङले ६०४, कांग्रेसका परशुराम चौलागाईंले ३७०, राप्रपा नेपालका दलबहादुर थापाले २२, जनता समाजवादीबाट आसालाल माझीले २० मत प्राप्त गरेका थिए ।
वडा नम्बर ५ मा एमालेका गोविन्दबहादुर खड्काले ८००, कांग्रेसका दुर्गानारायण श्रेष्ठ ६९१, माओवादीका दीपक रेग्मीले ५८१,स्वतन्त्र उम्मेदवार टंकबहादुर कट्वालले ८९ ,जनता समाजवादीका भीमबहादुर मगरले २६ मत ल्याएका थिए ।
वडा नम्बर ६ मा एमालेका वसन्त मगरले ६४३, कांग्रेसका सोभितमान राईले ४४९, माओवादीबाट रोहिणी राईले १९६, जनता समाजवादीका धनबहादुर थामीले २ मत ल्याएका थिए ।
वडा नम्बर ७ मा एमालेका सुरेन्द्र राईले ५७९, माओवादीका निकेश राईले ३७५, कांग्रेसबाट लीलाकुमार राईले २०५ , राप्रपा नेपालबाट तुलबहादुर बस्नेतले ५ मत पाएका थिए ।
वडा नम्बर ८ मा माओवादीका जयकुमार राईले ६२८, एमालेबाट घनराज दाहलले ५२४, कांग्रेसका कुलराज राईले ४५०, राप्रपाका ऋषिराज घिमिरेले ३० मत पाएका थिए ।
वडा नम्बर ९ मा एमालेका मोहन घिमिरेले ५९९, माओवादीका उमेश विकले ३३७, कांग्रेसका चेतराज थापाले ३३१ ,राप्रपाका टीकाराम शर्माले ६९ मत ल्याएका थिए ।