निर्देश सिलवाल भन्छन्- रवीन्द्रजीको दस्तावेजमा हाम्रो विमति थियो, महाधिवेशनमा हेरौँला भनियाे (भिडियाे)

निर्देश सिलवाल भन्छन्- रवीन्द्रजीको दस्तावेजमा हाम्रो विमति थियो, महाधिवेशनमा हेरौँला भनियाे (भिडियाे)

A+ A A-

विवेकशील साझा पार्टीका संगठन विभाग प्रमुख निर्देश सिलवालले अध्यक्ष रवीन्द्र मिश्रकाे मार्गपरिवर्तनसम्बन्धी दस्तावेज 'विचारभन्दा माथि देश'लाई आफूहरूले विमति हुँदाहुँदै स्वीकारेकाे बताएका छन् । यद्यपि, महाधिवेशनमा गएर मिश्रको दस्तावेजलाई चुनौती दिने आफूहरूको याेजना रहेकाे उनले बताए ।

'पहिला हामीलाई पार्टीको अस्तित्व जोगाउनु थियो । यही पार्टीभित्र बसेर यसभित्रका कमजोरी, विकृति बढार्नु थियो । यी सबै कामका लागि महाधिवेशन आवश्यक पर्छ । त्यसैले महाधिवेशनसम्मलाई भए पनि हामी रवीन्द्रजीको दस्तावेजलाई समर्थन गर्न तयार भयाैँ', शिलापत्र सराेकारमा उनले भने ।

सिलवाल पूर्वविवेकशील दलका नेता हुन् । मिलन पाण्डेलगायत २० जना नेता मिश्रको दस्तावेज अस्वीकार गरी पार्टी राजनीतिमा निष्क्रिय छन् । सिलवालसहित केही नेताले मिश्रलाई साथ दिएका थिए ।

गणतन्त्रलाई आयातीत भनेको दस्तावेजकै आडमा मिश्रले राजातन्त्रको वकालत गर्ने राप्रपासँग एकता गर्न लागेकोमा सिलवालसहितका नेता सशंकित छन् । यद्यपि, मिश्रले यो कुरा स्वीकार गरेका छैनन् । यसबाहेक मिश्रले बारम्बार महाधिवेशन सार्नुलाई पनि सिलवाल पक्षले स्वाभाविक मानेको छैन ।

याे पनि..

विवेकशील साझा पार्टीकाे विवाद समाधानकाे विकल्प पनि सिलवालले औँल्याएका छन् । पार्टी विधानमा अध्यक्ष मिश्रले लोकतान्त्रिक गणतन्त्रप्रति प्रतिबद्धता जनाए पछिल्लो विवाद समाधान हुने उनकाे भनाइ छ । पार्टीभित्र असन्तुष्ट पक्षको नेतृत्व गरिरहेका उनले विधान संशोधनको विकल्पले नै पार्टीको अस्तित्व जोगाउन सक्ने बताए ।

उनले भने, 'चुनावको मुखमा पार्टीभित्र जे भयो, त्यो नमीठो भयो । समाधानका लागि छलफलमा बस्न हामी तयार छौँ । हाम्रो सिधा कुरा छ, विधानमा पार्टीले लोकतान्त्रिक गणतन्त्रप्रति प्रतिबद्धता जनाओस् ।'

अध्यक्ष मिश्रले पार्टीलाई राप्रपामा मिसाउने अभियान चलाइरहेको सुइँको पाएपछि आफूहरू मतभेद बाहिर ल्याउन बाध्य भएको उनको भनाइ छ ।