चुनावको मुखमा विवेकशील साझाको ढोका बन्द गर्ने रवीन्द्र-राजेन्द्रकाे त्याे भेट

चुनावको मुखमा विवेकशील साझाको ढोका बन्द गर्ने रवीन्द्र-राजेन्द्रकाे त्याे भेट

फाइल तस्वीर ।

A+ A A-

विवेकशील साझा पार्टीको बखुण्डोल कार्यालयमा आज बिहान झण्डै-झण्डै हात हालाहालको स्थिति देखियाे ।

एउटै पार्टीकाे, एकै कार्यालयमा, एकै समयमा दुई छुट्टाछुट्टै कार्यक्रम राखिएकाले सम्भावित कुटाकुट राेक्न पार्टी कार्यालयले पुलिस बाेलाउनुपर्‍याे ।

एउटा कार्यक्रम संस्थापन पक्ष अर्थात् रवीन्द्र मिश्रकाे थियाे । अर्काे कार्यक्रम संगठन विभाग प्रमुख निर्देश सिलवाल पक्षले राखेकाे थियाे ।

नयाँ प्रदेश इञ्चार्ज र संयोजकलाई बधाई तथा शुभकामना दिन मिश्र पक्षले बिहान १० बजे कार्यक्रम राखेको थियो । करिब त्यही समयमा सिलवाल पक्षले पार्टीभित्रका आफ्ना असन्तुष्टि तथा निर्वाचन आयोगमा बुझाएको निवेदनबारे जानकारी दिन पत्रकार सम्मेलन गर्दै थियो । नयाँ संयाेजकमध्ये खासगरी गण्डकी प्रदेशकाे संयाेजकलाई लिएर सिलवाल पक्षले असन्तुष्टि जनाउँदै आएको छ । संस्थापन पक्षले गण्डकी प्रदेशकाे जिम्मेवारी सुशीला केसीलाई सुम्पेकाे छ ।

प्रवक्ता शरदराज पाठकको भनाइमा पार्टीलाई जानकारी नै नदिई सिलवाल पक्षले कार्यक्रम जुधायाे । तर सिलवाल पक्षका केन्द्रीय सदस्य सस्मित पोखरेलचाहिँ आफूहरूले ११ बजे कार्यक्रम राखेको कुरा पार्टी कार्यालयलाई जानकारी गराएको बताउँछन् । पत्रकार सम्मेलनको तयार गरिरहँदा मिश्र पक्षका मान्छेले ब्यानर च्यातिदिएको उनको आरोप छ ।

एकै समयमा भेला भएका दुई पक्षबीच भनाभन भयाे । ब्यानर, प्रेस रिलिज च्याताच्यात भयाे । झण्डै हात हालाहालकाे स्थिति देखियाे । साढे १२ बजेसम्म कार्यालय प्राङ्गण छेउमा देखिएका जोकोहीलाई दुवै पक्षका नेता आ-आफ्ना कुरा सुनाउँदै थिए । पछि सबै एकएक गरी निस्किए । एकैछिनमा कार्यालय सुनसान भयो । त्यतिबेलासम्म विवेकशील साझाले अर्को निर्णय नगरून्जेलसम्मका लागि कार्यालय बन्द भएको सूचना निकालिसकेकाे थियाे ।

विवाद एक, कारण अनेक

देश स्थानीय निर्वाचनकाे सम्मुखमा छ । अरु पार्टी चुनावी एजेण्डा लिएर गाउँ झरिसकेका छन् । तर, आफूलाई वैकल्पिक शक्ति भनेर चिनाउन रुचाउने विवेकशील साझाले भने काेठाभित्र सीमित 'घरझगडा' आँगनमै निस्केपछि आफ्नाे पार्टी कार्यालय नै बन्द गर्‍याे ।

झट्ट सुन्दा र हेर्दा प्रदेश संयोजक तोकेको विषय नै मुख्य विवादजस्ताे देखिए पनि विवेकशील साझाभित्र कलहका कारण अनेक छन् । खासमा राष्ट्रिय प्रजातन्त्र पार्टीका अध्यक्ष राजेन्द्र लिङ्देनसित आफ्ना अध्यक्ष मिश्रकाे हिमचिम बढेकाे विवेकशील साझाकाे सिलवाल पक्षले मन पराएकाे छैन ।

राप्रपासँग पार्टी एकताको चर्चायता मिश्रको कार्यशैली, प्रवृत्तिप्रति नै विवेकशीलभित्र एउटा समूहले प्रश्न उठाइरहेको छ । केन्द्रीय समितिले पारित गरिसकेकाे विचारभन्दा माथि देश नामक दस्तावेजसमेत नमान्ने जनाउ गरेकाे असन्तुष्ट समूहकाे नेतृत्व संगठन विभाग प्रमुख सिलवालले गरेका छन् । पार्टीलाई राजावादी धारमा तानेर मिश्रले राप्रपामा विलय गराउन खोजेको आशंका सिलवाल पक्षको छ । आफूसँग बहुमत रहेको दाबी गर्ने यो पक्षले मिश्रलाई पार्टीबाट किन निस्काशन नगर्ने भनी स्पष्टीकरणसमेत सोधेको बताएकाे छ । केन्द्रीय समिति बैठकमा सिलवाल पक्षले राप्रपासँग एकता गर्न लागेको भए केन्द्रीय समितिमा प्रस्ताव ल्याउन मिश्रलाई चुनौती दिएको थियो । तर मिश्रले मिडियामा आएका कुरालाई लिएर उत्तेजित नहुन भन्दै यो विषयमा छलफल गर्न इन्कार गर्दै आएका छन् ।

सिलवाल पक्षले १३ चैतकाे केन्द्रीय समिति बैठकमा संस्थापन पक्षका केन्द्रीय सदस्यहरूलाई 'रवीन्द्र मिश्रको अरिङ्गाल'को संज्ञा दिएको थियो । 'हामीलाई रवीन्द्र मिश्रको अरिङ्गाल भन्नुभयो, सुसंस्कृत र सभ्य राजनीतिकाे कुरा गर्ने केन्द्रीय सदस्यको भाषा यही हो ?', संस्थापन पक्षकी नेतृ एवं बागमती प्रदेश सांसद शोभा शाक्यले शिलापत्रसँग भनिन् । बागमती प्रदेशमा विवेकशील साझाका जम्मा तीन जना सांसद छन् । समानुपातिकबाट आएका यी तीनमध्ये संस्थापन, मिलन पाण्डे र सिलवाल पक्षमा एक/एक जना छन् ।

निर्वाचन आयोगको अभिलेखअनुसार, विवेकशील साझाकाे केन्द्रीय समिति १ सय ६३ सदस्यीय छ । यीमध्ये ९६ जनाको समर्थनकाे दाबीसहित सिलवाल पक्षले निर्वाचन आयोगमा हिजाे निवेदन बुझाएको छ । अल्पमतमा रहेका भनिएका मिश्रले बलजफ्ती लादेका निर्णयहरू लागू नगराउन निवेदनमा माग गरिएकाे छ । साथै मिश्रलाई स्पष्टीकरण सोध्ने बहुमतकाे निर्णयबारे पनि जानकारी गराइएको छ ।

संस्थापन पक्षले पनि सुरुमा मिलन पाण्डे र पछि २६ जनालाई कारबाही गरी बाँकी रहेका केन्द्रीय सदस्यमध्ये बहुमत आफूसँग रहेको दाबी गर्दै आएको छ । पार्टी प्रवक्ता शरद पाठकले संस्थापन पक्षमा सयभन्दा बढी केन्द्रीय सदस्य रहेको दाबी गरे । बागमती प्रदेशकी सांसदसमेत रहेकी नेतृ शोभा शाक्यले मिश्रको साथमा १ सय ४ जना केन्द्रीय सदस्य रहेको बताइन् ।

तर, संगठन विभाग प्रमुख सिलवाल आफूहरूसँग केन्द्रीय समितिमा ६० प्रतिशत, जिल्लामा ८० प्रतिशत र पालिकामा ९० प्रतिशत संख्या रहेकाे दाबी गर्छन् । त्यसैले यसपाला 'वार कि पार' गर्ने पक्षमा देखिएकाे छ सिलवाल पक्ष ।

'उहाँले ल्याएको विचारभन्दा माथि देश भन्ने दस्तावेजमा पनि राजातन्त्र मान्ने कुरा कतै छैन । तर अहिले भित्रभित्रै राजावादी पार्टीमा विलय गराउने प्रपञ्च रच्न थाल्नुभयाे । हाम्रो असन्तुष्टि कुनै पदलाई लिएर होइन, कार्यदिशा, पात्र र प्रवृत्तिप्रति नै हो । रवीन्द्रजीको एकलाैटी र लाद्ने कार्यशैली रोक्न हामी निर्वाचन आयोगसम्म पुगिसकेका छौँ', सिलवालले शिलापत्रसित भने ।

केन्द्रीय समितिले नै पारित गरेकाे मार्ग परिवर्तनकाे दस्तावेजलाई नमान्ने त उनले सिधै भनेनन् तर पुनर्विचार गर्नुपर्ने संकेत भने गरे । 'अहिले हामी आधिकारिकताको लडाईंमा छौँ, यसको परिणाम आएपछि के गर्ने छलफल गर्छौं', उनले भने, 'पार्टीभित्र रवीन्द्र प्रवृत्तिलाई रोक्न सकिएन भने कहिल्यै अघि जान सकिँदैन ।'

प्रवक्ता पाठकचाहिँ सिलवाल पक्षले पदका लागि बार्गेनिङ गरेकाे आरोप लगाउँछन् । प्रदेशको संयोजक ताेकेकाे निर्णयप्रति असन्तुष्टि जनाउने क्रममा सिलवालले पार्टीलाई अनिर्णयको बन्दी बनाइदिने धम्की आफूहरूलाई दिएको पाठकको भनाइ छ । 'पुसयता उहाँहरूले दुई महिनाजति अवरोध गर्नु भयो । अहिले आएर आफैँले विचार, सिद्धान्त वा कार्यशैलीप्रति असन्तुष्टि भन्नु हास्यास्पद छ', पाठकले भने ।

अध्यक्ष मिश्रले राप्रपासित एकता गर्ने कुरा आफैँले कतै नभनेको पाठकको दाबी छ । तर मिडियामा आएका कुरालाई लिएर सिलवाल पक्षले रड्याइँ गरिरहेको उनी बताउँछन् । आफ्ना अध्यक्ष मिश्रले राप्रपा अध्यक्षसित भेटेको कुरालाई अस्वाभाविक मान्दैनन् उनी । पाठक प्रश्न गर्छन्, 'हिन्दुवादी पार्टी नेपाली कांग्रेस विपीसँग केशव दाहालजीहरूले वार्ता नगर्नुभएको हो र ? के त्यो आपत्तीजनक थियो ? अब केशवजीहरू राजनीतिक चरित्र नभएका व्यक्ति हुन् भन्न मिल्छ त ?'

कार्यालयमै दुई पक्षबीचको गालमुखाल हेरिरहेका कार्यकर्ताचाहिँ चुनावको मुखमा पार्टीले रमिता देखाएको भन्दै यो प्रवृत्तिलाई युवा पुस्तामाथिको धोका भन्दै थिए । ललितपुर कुपण्डोलकी समीरा महर्जन वैकल्पिक भनेर प्रचार गरिएको पार्टीमा देखिएको तीव्र असन्तुष्टि र ध्रुवीकरणलाई विनाशको संकेत मान्छिन् । 'दुवै पक्षका कुरा सुन्दा हो कि हो कि लाग्छ । हामीले कन्फ्युज हुन होइन, क्लियर हुन विवेकशील साझालाई पछ्याएका हौँ । युवा पुस्ताले उहाँहरूलाई माफ गर्नेछैन', उनले भनिन् ।

ती युवतीको छेउमै बसेकी सांसद शाक्यले पार्टीभित्र भइरहेको गतिविधिले क्षति मात्र गर्ने बताइन् ।

रवीन्द्र र राजेन्द्र

पार्टीकाे विचार नै बदलेर हिन्दू राष्ट्र, संवैधानिक राजतन्त्र र संघीयताबारे जनमत संग्रहको माग गरेपछि मिश्रलाई नेपाली राजनीतिको दक्षिणपन्थी धारमा राखेर हेर्न थालिएकाे छ । यही मेसाेमा उनले गतसाता राजावादी दल राप्रपाका अध्यक्ष लिङ्देनसित भेटेका थिए । लिङ्देन-मिश्र भेट पहिलाेपल्टचाहिँ हाेइन । तर पछिल्लाे समय पार्टीभित्र मिश्रलाई राप्रपासँग जोडेर अनेकन् आशंकाहरू भइरहेका बेला भएकाे भेटपछि असन्तुष्ट पक्ष झस्कियाे । भेटकाे खबरसँगै दुई पार्टी एकताकाे चर्चाले मिडिया र सामाजिक सञ्जाल रंगिएपछि पार्टीका असन्तुष्ट नेताले मिश्रसँग आपत्ति जनाएका थिए ।

राप्रपामा प्रवेश गर्न लागेकाे हल्ला फैलिएपछि र पार्टीभित्रकै केहीले आपत्ति जनाएपछि ट्वीटमार्फत खण्डन गर्दै उनले आफ्नाबारे पूर्णतः झुट कुरा फैलाइएकाे बताएका थिए । तर पार्टीभित्रकाे असन्तुष्ट पक्षले चाहिँ मिश्रकाे ट्विट स्पष्टीकरणमा चित्त बुझाएन । राप्रपासित एकता गर्ने वा समाहित हुने विषय केन्द्रीय समितिमा प्रस्तावका रूपमा ल्याएर देखाउन चुनाैती दियाे । मिश्रले 'त्याे पर्दैन' भन्दै आएका छन् । पार्टीकै एक नेताका अनुसार विवेकशील साझाभित्र देखिएको विवाद यतिकै साम्य हुने देखिँदैन । 'निर्वाचन आयोगले के भन्छ, धेरै कुरा त्यसमै भर पर्छ । जे भने पनि पार्टी विभाजनको डिलमा पुगेको कुरालाई अस्वीकारचाहिँ गर्न सकिन्न', ती नेताले भने ।

तस्वीरहरूः सुशील श्रेष्ठ ।

प्रकाशित मिति: मंगलबार, चैत १५, २०७८ १७:५६