रतुवामाईका मेयर भन्छन्, 'पत्रकार साथीहरू हामीलाई खबरदारी गरिदिनुस्'

A+ A A-

मोरङको रतुवामाई नगरपालिकामा आधारभूत पत्रकारिता तालिम सुुरु भएको छ । नगरपालिकाको सहयोग तथा प्रदेश टाईम्स मिडिया प्रा.लि. विराटनगरको आयोजनामा तीन दिने आधारभूत पत्रकारिता तालिम सुरु भएको हो । तालिमको रतुवामाई नगरपालिकाका नगरप्रमुख रवीन राईले पानसमा दियो बलेर उद्घाटन गरे ।

सो अवसरमा मेयर राईले सुगम क्षेत्र भए पनि रतुवामाई सञ्चार माध्यमको पहुँचबाट टाढा रहेको बताए । उनले सञ्चार माध्यम र पत्रकारले जनप्रतिनिधि तथा अधिकार प्राप्त अधिकारीलाई आ–आफ्नो जिम्मेवारी बहन गर्न खबरदारी गर्नुपर्ने बताए ।

उनले जनप्रतिनिधि तथा कर्मचारीहरुले गरेका राम्रा कामको प्रोत्साहन र जिम्मेवारीबाट पन्छन खोजे खबरदारी गर्नुपर्नेमा जोड दिए । मेयर राईले पत्रकारले स्थानीय तहले गरेका कार्यक्रम, विकास निर्माणलगायतका कामको प्रचारप्रसार हुनुपर्ने र गलत कार्यको आलोचना गरेर जिम्मेवारी वहन गर्न दबाब बढाउनेपर्नेमा जाेड दिए ।

उनले रतुवामाई नगरका आम जनतालाई सञ्चार माध्यमको पहँचमा पु-याउन र स्थानीय स्तरमा नयाँ पत्रकार उत्पादनमा तालिम उपयोगी हुने विश्वास व्यक्त गरे ।

मेयर राईले भने, ‘हामी जनप्रतिनिधि जानी नजानी आफ्नो दायित्वबाट अलमलिन सक्छौँ । हामीलाई घच्घच्याउन जरुरी छ । तालिम लिएपछी तापाईंहरु पत्रकारिता क्षेत्रमा लागेर यो काम गर्नुहुन्छ भन्ने हाम्रो अपेक्षा छ ।

उनले तीन दिने पत्रकारिता तालिम पर्याप्त नभएको बताउँदै आगामी दिनमा थप तालिम दिनका लागि नगरपालिकाले सहयोग गर्ने प्रतिबद्धता जनाए ।

कार्यक्रममा नेपाल पत्रकार महासंघ मोरङका उपाध्यक्ष कुमोद अधिकारीले तालिमबाट प्राप्त ज्ञानलाई सदुपयोग गर्नुर्नेमा जोड दिए । उनले ग्रामिण पत्रकारिताको विकास र नयाँ पत्रकारहरु उत्पादनका लागि महासंघले उल्लेख्य भूमिका खेल्दै आएको बताए ।

उपाध्यक्ष अधिकारीले पत्रकारिता पेशा मर्यादिन पेशा भएकाले यस क्षेत्रबाट नाम र दाम दुबै कामाउन सकिने दाबी गरे । बुधबारदेखि शुक्रबारसम्म सञ्चालन हुने तालिममा सो नगरपालिकाका १० वटै वडाबाट ३० जना सहभागी रहेका प्रदेश टाईम्स मिडियाले जनाएको छ । तीन दिने उक्त तालिमका सहभागिलाई वरिष्ठ पत्रकार यज्ञ शर्माले प्रशिक्षण दिइरहेका छन् ।

प्रकाशित मिति: बिहीबार, असार १९, २०७६ ०५:२७