हाइब्रिड ‘डेल्टाक्रोन’ नेपालमा पनि घुमिरहेको त छैन ?

राष्ट्रिय जनस्वास्थ्य प्रयोगशाला टेकुमा जिन सिक्वेन्सिङ गरिँदै ।

A+ A A-

युरोपी मुलुकमा फेरि कोरोनाको नयाँ भेरियन्ट ‘डेल्टाक्रोन’ फेला पर्‍यो । योसँगै नेपालमा पनि यसको असरबारे बहस हुन थालेको छ ।

‘अध्ययनहरूले डेल्टाक्रोन घातक र डरलाग्दो देखाएको छैन,’ सरुवा रोग विशेषज्ञ डा. शेरबहादुर पुन भन्छन्, ‘यो डेल्टा र ओमिक्रोन मिलेर बनेको हाइब्रिड प्रकारको भेरियन्ट हो ।’ दुईवटा भाइरस एकै ठाउँमा एउटै समय घुमिरहेको अवस्थामा समिश्रण भएर नयाँ भेरियन्ट बन्ने बताउँछन् उनी ।

‘एउटा व्यक्ति दुवै भेरियन्टबाट पनि संक्रमित हुन सक्छ । एउटाले ओमिक्रोन र अर्कोले डेल्टा बोकेर आएको हुन्छ,’ उनी भन्छन्, ‘त्यो अवस्थामा ओमिक्रोन लागेकोलाई डेल्टा र डेल्टा भएकोलाई ओमिक्रोन सर्ने जोखिम हुन्छ । दुवै भाइरस कोशिकामा भेट भएपछि नयाँ बन्ने हो ।’

राष्ट्रिय जनस्वास्थ्य प्रयोगशाला टेकुमा जिन सिक्वेन्सिङ गरिँदै ।

डेल्टाक्रोन कति घातक ?

कोरोनामा मात्र होइन, अरु भाइरसमा पनि समिश्रण भएर नयाँ भेरियन्ट बनेको उदाहरण रहेको बताउँछन् डा. पुन । ‘स्वाइन फ्लूमा तीनवटा मिलेको थियो । चरामा देखिने फ्लू, सुंगुरमा देखिने फ्लू र मानिसमा देखिने फ्लू मिलेर स्वाइन फ्लू बनेको हो,’ उनी भन्छन् ।

डेल्टा र ओमिक्रोन दुवै फेस गरेकाले जटिल स्थिति आउने जोखिम कम देख्छन् उनी । ‘संक्रमण नहुने भन्ने होइन । तर, दुवै भेरियन्ट फेस गरेकाले त्यति घातक नहोला । डेल्टा फैलिँदा खोप थिएन । अहिले खोप प्रयोग भइरहेकाले घातक कम हुने देखिन्छ,’ उनी भन्छन् ।

नेपालमा पनि घुमिरहेको छ डेल्टाक्रोन ?

नेपालमा पनि नयाँ भेरियन्ट घुमिरहेको हुन सक्ने बताउँछन् डा. पुन । ‘नेपालमा ओमिक्रोन र डेल्टा भेरियन्ट छ । दुवै भेरियन्ट रहेकाले समिश्रण भएर नयाँ भेरियन्ट नहोला भन्न सकिन्न,’ उनी भन्छन् । नयाँ भेरियन्ट छ छैन भनेर हेर्न जिन सिक्वेसिङ गर्नुपर्नेमा उनको जोड छ ।

राष्ट्रिय जनस्वास्थ्य प्रयोगशालाले जिन सिक्वेन्सिङ गरिरहेको र अहिलेसम्म नयाँ भेरियन्ट नदेखिएको बताएको छ । ‘अहिलेसम्म नयाँ भेरियन्ट देखिएको छैन,’ प्रयोगशालाका सूचना अधिकारी राजेश गुप्ता भन्छन्, ‘सिक्वेन्सिङको काम नियमित भइरहेको छ ।’

राष्ट्रिय जनस्वास्थ्य प्रयोगशाला टेकुमा जिन सिक्वेन्सिङ गरिँदै ।

पीसीआरबाट भाइरस कहाँ कसरी परिवर्तन भएको छ हेर्न नमिल्ने भएकाले सिक्वेन्सिङ गर्नुपर्ने हुन्छ । ‘पीसीआर उपचारका लागि भाइरस छ छैन भनेर हेर्ने हो । भाइरसको भित्री आवरण हेर्न नयाँ भेरियन्ट पत्ता लगाउन सिक्वेन्सिङ गर्नुपर्छ,’ उनी भन्छन् ।

स्वास्थ्य तथा जनसंख्या मन्त्रालयले पनि नयाँ भेरियन्टको जोखिम कायम रहेको बताएको छ । ‘नयाँ भेरियन्ट नआउला भन्न सकिन्न,’ मन्त्रालयका सहप्रवक्ता डा. समीर अधिकारी भन्छन्, ‘नयाँ भेरियन्ट नआएसम्म चुनौती कम भएको छ ।’

चुनावमा संक्रमणको जोखिम

कोरोनाको तेस्रो लहर मत्थर हुँदै गए पनि स्थानीय तहको चुनावको सरगर्मी बढेसँगै जोखिम पनि बढ्ने विज्ञहरू बताउँछन् । स्वास्थ्य तथा जनसंख्या मन्त्रालय र निर्वाचन आयोगले महामारीमा कसरी चुनाव गराउने भनेर नियमित छलफल गरिरहेका छन् । ‘आयोगसँग पटक-पटक छलफल भएको छ । स्वास्थ्यको मापदण्ड पालना गरेर चुनाव गराउन सुझाव दिएका छौँ,’ सहप्रवक्ता अधिकारी भन्छन् ।

यी पनि पढ्नुस् :

प्रकाशित मिति: मंगलबार, चैत १, २०७८ १७:३३