बिदाइकाे चरणमा कोरोनाकाे तेस्रो लहर, अस्पताल भर्ना हुनेमा दीर्घरोगी धेरै

A+ A A-

पाटन अस्पतालमा एक महिनाअघि कोभिड-१९ का एक सय २० बिरामी भर्ना भएका थिए । त्याे कोरोनाको तेस्रो लहरको उच्च संख्या हो । हाल अस्पतालमा २० जना बिरामी उपचारार्थ छन् ।

‘एक महिनाको अवधिमा बिरामीको संख्या धेरै घटेको छ । भर्ना हुनेमा दीर्घ रोगी धेरै छन्,’ अस्पतालका निर्देशक डा. रवि शाक्य भन्छन्, ‘नर्मल स्थितिमा जाँदैछ । अब काेभिड रुघाखोकी सिजनल फ्लूको रूपमा देखिन सक्छ ।’

तेस्रो लहरको उच्च बिन्दुमा पुग्दा दैनिक पाँच जनासम्मले कोभिडका कारण ज्यान गुमाइरहेका थिए । अहिले मृत्यु हुनेको संख्या पनि घटेको उनी बताउँछन् । ‘अहिले दैनिक एक-दुई जनाको मृत्यु भइरहेको छ । यसमा पनि कोभिडभन्दा अन्य रोग लागेका दीर्घरोगी छन्,’ उनी भन्छन् ।

०००

त्रिवि शिक्षण अस्पतालमा अघिल्लो महिना दैनिक भर्ना हुनेको संख्या १५ जनाको हाराहारीमा थियो । अहिले त्यो घट्दोक्रममा छ । ‘अहिले दैनिक तीनदेखि पाँच जना बिरामी भर्ना भइरहेका छन् । उच्च बिन्दुमा पुग्दा एमरजेन्सीमा दैनिक ४५ जनासम्म कोभिडका बिरामी आउँथे, अहिले घटेर ७ जनामा झरेको छ,’ अस्पतालका कोभिड फोकल पर्सन डा. निरज बम भन्छन् । यसले प्यान्डमिकबाट एन्डामिकतर्फ गइरहेको डा. बमको बुझाइ छ ।

‘यसले संक्रमण घटेको र प्यान्डमिकबाट एन्डामिकतर्फ जान लागेको संकेत गर्छ,’ उनी भन्छन्, ‘अहिले ज्येष्ठ नागरिक र दीर्घरोगीलाई बढी च्यापेको छ । खोप लगाएको र प्रतिरोधात्मक क्षमताका कारण युवाहरूमा संक्रमण भए पनि घरमै बसेर उपचार गर्दा निको भएको छ ।’

०००

बलम्बुस्थित सशस्त्र प्रहरीको एपीएफ अस्पतालमा पनि बिरामीको संख्या निकै घटेको छ । ‘तेस्रो लहरको पिकमा १७० जनासम्म बिरामी भर्ना भएका थिए । अहिले १० जना भर्ना भएका छन्,’ अस्पतालका कोभिड फोकल पर्सन डा. प्रविन नेपाल भन्छन् ।

संक्रमण घट्दै जानुले तेस्रो लहरको अन्त्यतर्फ आइपुगेको प्रक्षेपण उनको छ । ‘धेरैलाई संक्रमण भइसक्यो । खोप पनि लगाएका छन् । यसले तेस्रो लहरको अन्त्यतर्फ आएको देखाउँछ,’ उनी भन्छन्, ‘अर्को लहर नआउला भन्न सकिन्न । उत्परिवर्तन हुँदा भाइरस कमजोर हुनुपर्ने हो तर कोभिडमा त्यस्तो देखिएन । त्यसैले मापदण्ड भुल्नु भएन ।’

०००

वीर अस्पतालमा तेस्रो लहरमा सबैभन्दा धेरै १५० जना कोभिडका बिरामी भर्ना भएका थिए । ‘एक हप्तामा कोभिडका बिरामीको संख्या निकै घटेको छ । पोजिटिभ दर घटेजस्तै बिरामीको संख्या पनि घटेको देखिन्छ,’ अस्पतालका कोभिड फोकल पर्सन डा. अच्युत कार्की भन्छन्, ‘अहिले १५ जना बिरामी उपचाररत छन् । भर्ना हुनेमा ज्येष्ठ नागरिक र दीर्घरोगीको संख्या धेरै छ । अस्पतालमा आउने बिरामीको संख्या हेर्दा तेस्रो चरणको अन्तिममा पुगेको देखिन्छ ।’

स्वास्थ्य तथा जनसंख्या मन्त्रालयको तथ्यांकले पनि कोरोना घट्दो क्रममा देखाउँछ । संक्रमणदर पाँच प्रतिशतभन्दा तल झरेको छ । सोमबार ८ हजार १ सय ४० को परीक्षण गर्दा ३ सय ८८ जनामा संक्रमण पुष्टि भएको छ । यो ४.७ प्रतिशत संक्रमणदर हो । कोभिडको तेस्रो लहरमा गत ५ माघमा संक्रमणदर ५२.६ प्रतिशत पुग्यो । जुन पहिलो र दोस्रो लहरको संक्रमणदरलाई पनि उछिनेको थियो । दोस्रो लहरमा संक्रमणदर ५१.८ प्रतिशत थियो ।

संक्रमण ओरोलो लागे पनि जोखिम कायमै रहेको मन्त्रालयको भनाइ छ । ‘खोप लगाउन धेरै मानिस बाँकी छन् । उनीहरू संक्रमणको जोखिममा छन्,’ मन्त्रालयकी प्रवक्ता डा. संगीता कौशल मिश्र भन्छिन्, ‘खोप लगाउन र स्वास्थ्यको मापदण्ड बिर्सिने बेला भएको छैन ।’

प्रकाशित मिति: सोमबार, फागुन ९, २०७८ १८:३७