बेलका नगरको पञ्चवर्षीय योजना : सन्तुलित र समावेशी विकासको लक्ष्य

A+ A A-

उदयपुरको बेलका नगरपालिकाले पाँच वर्षका लागि दीर्घकालीन योजना सार्वजनिक गरेको छ । कार्यपालिका सदस्य, नगरसभा सदस्य, स्थानीय राजनीतिक दलका प्रतिनिधि, विषयगत विभागका प्रमुख तथा विज्ञसँगको विशेष समन्वयमा तयार गरिएको पञ्चवर्षीय आवधिक योजना नगरपालिकाले शनिबार सार्वजनिक गरेको हो ।

‘सन्तुलित विकास, सम्मानित जीवन, समावेशी पूर्वाधार : प्रविधि तथा वातावरणीय सन्तुलनसहित समाजवाद उन्मुख बेलका नगर’ भन्ने नारासहितको योजना प्रदेश १ का आर्थिक मामिला तथा योजनामन्त्री इन्द्रबहादुर आङ्बोले सार्वजनिक गरे ।

आवधिक योजनामा कृषि, उत्पादन, स्वास्थ्य र शिक्षालाई विशेष प्राथमिकतामा राखिएको छ । व्यावसायिक कृषिको विकास, यसको आधुनिकीकरण, बजारीकरण, गुणस्तरीय तथा प्राविधिक शिक्षा र स्वास्थ्य सेवामा आमनागरिकको पहुँच सुनिश्चित गरी स्वास्थ्य तथा सक्षम मानव संशाधनको विकास, गुणस्तरीय पूर्वाधारद्वारा नगर विकासको दिगो आधार निर्माण गर्ने लक्ष्य आवधिक योजनाको छ ।

प्राकृतिक स्रोत साधनको वैज्ञानिक व्यवस्थापनबाट आर्थिक, सामाजिक तथा वातावरणीय लाभको अधिकतम उपयोग गर्ने रणनीति योजनामा छ । गरिबी निवारण, पोषण तथा खाद्य सुरक्षा, भूउपयोगी तथा भूमि व्यवस्थापन, लैंगिक समानता, सामाजिक समावेशीकरण, सामाजिक समानता, सामाजिक सुरक्षा र संरक्षणको अभिवृद्धि गरी सामाजिक न्यायको प्रवर्द्धन गर्ने कार्यदिशा योजनाले लिएको छ ।

बेलका नगरपालिका पञ्चवर्षीय योजनामा चुस्त संरचना, नतिजामुखी प्रशासन, प्रविधिमैत्री कार्यसम्पादन, सेवामुखी र सदाचारयुक्त स्थानीय सरकारको विकासको परिकल्पना गरिएको छ ।

बेलकाका नगर प्रमुख दुर्गाकुमार थापाका अनुसार योजनामा सुशासनको स्थापना, स्थानीय कच्चापदार्थ र कृषिमा आधारित उद्योग व्यवसायको प्रवर्द्धन, पर्यटकीय उपज तथा गन्तव्यको विकास गरी समृद्धि हुँदै समाजवादमा जाने लक्ष्य लिइएको छ ।

‘रोजगारी अभिवृद्धि, उद्यम विकास तथा पर्यटन प्रवर्द्धन, जलवायु परिवर्तन तथा वातवरणीय सन्तुलन, आन्तरिक राजस्व वृद्धि तथा वित्तीय सुशासन, आर्थिक विकास र सामाजिक विकास तथा सुरक्षालाई मुख्य रणनीतिका रुपमा लिएका छौं,’ नगर प्रमुख थापाले भने ।

शिक्षातर्फ सामुदायिक विद्यालयमा ५ वर्षमा ८० प्रतिशत विद्यार्थी एसईई परीक्षामा ए प्लस ग्रेड ल्याउने गरी शिक्षा नीति तयार गरिएको छ । आधारभूत विद्यालयको कक्षा १ देखि ५ सम्मका बालबालिकालाई विद्यालयमा टिकाइराख्न खाजाको व्यवस्थापन गर्ने, प्राविधिक विषयमा स्नातक तहसम्म सञ्चालन गर्ने र एक घर एक धाराको रणनीति लिने लक्ष्य लिइएको छ ।

नगरपालिकाका प्रमुख प्रशासकीय अधिकृत पुष्कर भट्टराईले आन्तरिक स्रोतले नभ्याएका योजना कार्यान्वयन गर्न संघ र प्रदेश सरकारसँग समन्वय गर्ने बताए ।

योजना सार्वजनिक समारोहमा प्रदेशका आर्थिक मामिला तथा योजनामन्त्री आङ्बोले आवधिक योजनासँग बेलका नगरपालिका विकासको गतिमा लम्किएको बताए । ‘आवधिक योजनाकै आधारमा बाँकी रहेका काम र विकास निर्माणलाई अघि बढाउनुपर्छ, यसो गरिएमा बेलका नगरपालिका वास्तवमै समृद्ध बन्नेछ,’ मन्त्री आङ्बोले भने, ‘तर, यो र त्यो, पक्ष र प्रतिपक्ष, यो पार्टी र त्यो पार्टी नभनी व्यक्तिगत वा पार्टीगत स्वार्थभन्दा माथि उठेर जनताको हितमा काम गर्नुपर्छ ।’

मन्त्री आङ्बाेले बेलकाले बनाएको आवधिक योजना प्रदेश १ का सबै स्थानीय तहलाई पाठ हुन सक्ने बताए ।

कार्यक्रममा प्रदेश १ का सांसद विमल कार्कीले आवधिक योजना नगरपालिकाको मुख्य सम्पत्ति भएको बताए । प्रदेश सांसद अम्बिका थापाले आवधिक योजनाले निर्दिष्ट गरेका योजनालाई आत्मसात गर्न सके नगरपालिका वास्तवमै विकासतिर लम्किने बताइन् ।

जिल्ला समन्वय समिति उदयपुरका संयोजक खड्ग परियारले खानेपानीको समस्या समाधानमा योजना सफल हुनुपर्नेमा जोड दिए ।

उदयपुरका प्रमुख जिल्ला अधिकारी ध्रुवबहादुर खड्काले आवधिक योजनालाई प्रभावकारी ढंगले कार्यान्वयन गर्न नगरपालिकाको टिमलाई सुझाब दिए ।

नेपाल कम्युनिस्ट पार्टी (नेकपा) उदयपुरका अध्यक्ष दिवस कटुवालले आवधिक योजना सार्वजनिक गरेसँगै बेलका नगरपालिका विकासको खुड्किलो उक्लिन थालेको बताए ।

नेपाली कांग्रेस बेलकाका नगर सभापति सुशील सेढाईले नगरमा शिक्षाको गुणस्तर वृद्धि हुने योजनालाई अद्याविक योजनाले समेट्नुपर्नेमा जोड दिए ।

कार्यक्रममा बेलका नगर क्षेत्रमा जन्मिएर विभिन्न तहमा रहेका ६ जनालाई सम्मान गरिएको छ । सम्मानित हुनेहरुमा मध्यपश्चिमाञ्चल विश्वविद्यालयका उपकुलपति डा. उपेन्द्र कोइराला, काष्ठमण्डप क्याम्पसका प्रमुख पेसल लुइँटेल, फोटो पत्रकार ईश्वर रौनियार, डा. रामचन्द्र लामिछाने र नन्दलाल बास्तोलालाई सम्मान गरिएको थियो ।

बेलका नगरपालिका उदयपुरको पूर्व भेगमा अवस्थित जिल्लाकै कान्छो नगरपालिका हो । यो नगरपालिकामा ५३ हजार जनसंख्या छ ।

प्रकाशित मिति: सोमबार, असार १६, २०७६ ००:१०