एनआरएनए अमेरिकाद्वारा उच्छृंखल कार्यको भर्त्सना, लम्सालकाे परिवारलाई गरेको सहयोग विवरण सार्वजनिक

एनआरएनए अमेरिकाद्वारा उच्छृंखल कार्यको भर्त्सना, लम्सालकाे परिवारलाई गरेको सहयोग विवरण सार्वजनिक

A+ A A-

गैर आवासीय नेपाली संघ राष्ट्रिय समन्वय परिषद्ले हालै न्यूयोर्कमा भएको एक कार्यक्रममा केही व्यक्तिद्वारा गरिएको उत्तेजक र आपत्तिजनक क्रियाकलापकाे भर्त्सना गरेको छ । गत वर्षकाे जुलाई महिनामा नेपालकाे पर्वत घर भएका विपिन लम्सालको अमेरिकामा असामयिक निधनपश्चात् संस्थाले गोफण्डमार्फत रकम उठाइ सहयोग गरेको थियाे ।

तर त्यसकाे विवरण सार्वजनिक नगरेको भन्दै कार्यक्रम स्थलमा होहल्ला गर्दै उच्छृंखल क्रियाकलाप गरिएकाे भन्दै संस्थाले भर्त्सना गरेकाे हाे ।

'संस्थालाई जीवन्तता दिन सबै सदस्यहरूले संस्थाका गतिविधिहरूमा चासो राख्नु तथा सहभागिता जनाउनु जरुरी पर्दछ', महासचिव अञ्जनकुमार चौलागाईंद्वारा हस्ताक्षरित विज्ञप्तिमा भनिएकाे छ, 'तर त्यसका लागि सबैले मर्यादित र पद्दतिसंगत ढंगले आफ्ना चासो वा जिज्ञासा राखी संस्थाको मर्यादा कायम गर्न पनि आवश्यक हुन्छ । '

संस्थाले लम्सालकाे निधनपश्चात उनकाे परिवारलाई गरिएकाे सहयाेगकाे विवरण पनि सार्वजनिक गरेकाे छ ।

'जुलाई २७–२०२१ मा विपिन लम्सालको असामयिक निधन भएको थाहा पाउनासाथ न्यूयोर्कमा रहेका साथीहरूलाई कसरी सहयोग पुर्‍याउन सकिन्छ भनी सरसल्लाह गरियो । उहाँको बुबा पोषराज लम्सालसँग सम्पर्क गरी अमेरिकामा नै दाहसंस्कार गर्ने वा नेपाल लैजाने भन्दा नेपालमा नै पठाइदिन आग्रह रह्यो । नेपालमा ७० वर्षको बुवा भएको हुँदा नेपाल शव पठाउन र केही बढी पैसा पठाउन सकिएमा परिवारलाई सहयोग पुग्छ भनी गोफण्डमा रकम उठाउने निर्णय गरियो । गोफण्डमा जम्मा १८३६८ रकम उठेकोमा गोफण्डको सर्भिस फि ६२१ डलर, नेपाल शव पठाउन ६,५५२ र पर्वतसम्म जानको लागि २३० डलर खर्च भएको थियो । बाँकी रहेको रकम शव नेपाल पठाइसकेपश्चात् सँगै बस्ने एक महिलाले म मृतकको श्रीमती हो भनी प्रमाणसहित हक दाबी गरे पश्चात् रकम नेपाल पठाउने वा उनलाई दिने विषय केही समय अन्यौल भयाे ।निज महिलाले स्वर्गीय विपिन लम्सालसँग विवाह गरेको कुरालाई नेपाली समाजका केही प्रतिष्ठित व्यक्तिहरूले समेत स्वीकार गर्नुभयो । लस एन्जलस स्थित पशुपतिनाथ मन्दिरमा विधिपूर्वक विवाह गरेको फोटो, भिडियो र डकुमेन्ट गैर आवासीय नेपाली संघ अमेरिकामा महिलाले पठाउनुभयाे । नातामा श्रीमती देखिएपश्चात् चार हजार डलर दिए हुन्छ भनी माग भए बमोजिम पदाधिकारीको बैठक बसेर निर्णय गरी अमेरिकामा श्रीमतीलाई चार हजार दिएर बाँकी रहेको रकम परिवारको अनुरोध अनुसार नजिकको नातेदारलाई ६,९६५ डलर हस्तान्तरण गरिसकिएको छ । अमेरिकामा मृतकको श्रीमतीलाई दिएको चार हजार डलर समेत पदाधिकारीबाट उठाइ नेपालमा रहेका वृद्ध बुवा आमालाई दिने भनी उठाइरहेको र हालसम्म दुई हजार पाँच सय उठाइ पनि सकिएको छ । बाँकी उठाएको रकम चार हजार डलर पुराएर चाँडो भन्दा चाँडो नेपाल पठाउने योजना रहेको छ', संघले जारी गरेकाे विज्ञप्तिमा उल्लेख छ ।