राष्ट्रियसभाका अध्यक्ष तिमिल्सिना भन्छन्– वैदेशिक सहयोगमा कडाइ गर्नुपर्छ

राष्ट्रियसभाका अध्यक्ष तिमिल्सिना भन्छन्– वैदेशिक सहयोगमा कडाइ गर्नुपर्छ

A+ A A-

राष्ट्रियसभाका अध्यक्ष गणेश प्रसाद तिमिल्सिनाले नेपालमा विदेशी सहयोग ल्याउने विषय कडाइ गरिनुपर्ने बताए । मंगलवार राष्ट्रियसभाको विधायन व्यवस्थापन समितिको बैठकमा बोल्दै अध्यक्ष तिमिल्सिनाले नेपालमा विदेशी संघसंस्था तथा सरकारबाट लिइने सहयोगमा कडाइ गरिनुपर्ने बताए ।

यद्यपी, विदेशी सहयोग लिँदा लिन्न भनेर बढी क्रान्तिकारी हुनु नहुने पनि उनले बताए । सहयोगको बाहानामा हस्तक्षेप गर्ने र नेपालीलाई आफैले चलाउने प्रकारको सहयोग भने लिनु नहुने भन्दै उनले यस्ता प्रकारका कुरामा पहिले नै स्पष्ट हुनुपर्ने उल्लेख गरे । आफूखुसी सहयोग लिने प्रवृत्तिको अन्त्य गर्नुपर्ने उनले बताए ।

राष्ट्रियसभा अध्यक्ष तिमिल्सिनाले भने, ‘दुनियाँले जहाँ पनि लिनेदिने गरिराख्या हुन्छ । कहीँ ग्रोथको रुपमा होला कहीँ अनुदानको रुपमा होला । त्यसकारण त्यस्तै हिसाबले मात्रै सोचेर लिनै हुन्न भन्नेतिर गएर बढी क्रान्तिकारी हुने नाममा आफैलाई भोलि सीमाले बाँधिने पनि हुनुहुँदैन । तर, त्यही बाहानामा हामीमाथिको हस्तक्षेप र अरु खालले हामीलाई उनीहरूले नै गाइड गरेर हाम्रा गोपनीयता पनि लाने, हामीलाई पुरै उनीहरूले चलाउने त हुनुहुदैँन ।’

अध्यक्ष तिमिल्सिनाले राष्ट्रियसभाले पारित गरेर पठाएका विधेयकहरू प्रतिनिधिसभामा वर्षौदेखि रोकिएर रहेको भन्दै असन्तुष्टि व्यक्त गरे । उनले प्रतिनिधिसभामा यसरी विधेयकहरू रोकिएको सम्बन्धमा सम्बन्धित मन्त्रालयले प्रतिनिधिसभालाई घच्घचाउनुपर्ने बताए । अध्यक्ष तिमिल्सिनाले राष्ट्रियसभाबाट प्रतिनिधि सभामा गएको विधेयकलाई पनि ६० दिनको सीमा दिइनुपर्ने बताए ।

उनले आगामी एक वर्ष चुनावी वर्ष हुने भएकाले प्रतिनिधिसभाले विधेयक पारित गर्न नसक्ने हो कि भन्ने आशंका व्यक्त गरे । विधेयक पारित गर्न सकिएन भने विधेयकहरू शून्यमा जाने भएकाले राष्ट्रियसभाले पारित गरेका विधेयकहरू यो प्रतिनिधिसभामा नपठाउने बारेमा आफुले सोचिरहेको उनले बताए ।

अध्यक्ष तिमिल्सिनाले छलफलमा आएका विधेयकलाई छिटोभन्दा छिटो सार्वजनिक गर्नुपर्नेमा जोड दिए । छलफलका क्रममा विधेयक सार्वजनिक हुँदा सरोकारवालाहरूले सुझावहरू दिनसक्ने र विधेयक सुधारिएर आउने उनको भनाइ छ । त्यसैगरी सम्बन्धित मन्त्रालयले पनि विधेयकको छलफलका लागि पर्याप्त समय र महत्त्व दिनुपर्ने उनले बताए । यसका लागि समितिहरूले पनि मन्त्रालयहरूलाई ध्यानाकर्षण गराउनुपर्ने अध्यक्ष तिमिल्सिनाले बताए ।

प्रकाशित मिति: मंगलबार, फागुन ३, २०७८ १७:०८