अन्धाधुन्ध अघि बढ्ने हुँदा फोहर व्यवस्थापनको योजनामा यसरी फसे जनकपुरका जनप्रतिनिधि

अन्धाधुन्ध अघि बढ्ने हुँदा फोहर व्यवस्थापनको योजनामा यसरी फसे जनकपुरका जनप्रतिनिधि

A+ A A-

धनुषाकाे जनकपुरधाम उपमहानगरपालिकाले मुजेलियामा शहीदद्वार बनाउन अघिल्लाे आर्थिक वर्षमा ३ करोड ५० लाख रुपैयाँ छुट्यायाे । चालु आर्थिक वर्षमा ५० लाख रुपैयाँ थपेर नगरपालिकाले भव्य गेट बनाइसक्नै लागेको छ । तर, भाेट माग्दा अघि सारेकामध्ये फाेहर व्यवस्थापनकाे काममा भने सिन्काे नभाँची जनप्रतिनिधिले पाँच वर्ष बिताउन लागेका छन् ।

चुनावी घाेषणापत्रमा मात्र हाेइन, विजयी भएपछि पनि फाेहर व्यवस्थापनकाे मुद्दालाई मेयर लालकिशाेर साह र उपमेयर रिता झाले मिलाइ-मिलाइ भाषणमा घुसाए । उनीहरू भन्ने गर्थे, 'नगरपालिकामा पहिल्यै गर्नुपर्ने काममध्ये एक हाे फाेहर व्यवस्थापन । याे हाम्राे दायित्व हाे, हामी गर्छाैं ।' पाँच वर्ष बितिगए । तर याे मुद्दामा जनकपुर जहाँ थियाे, त्यहीँ नै रहेकाे स्थानीय सराेज मिश्र बताउँछन् । टड्काराे काम थाती राखेर जनप्रतिनिधिले पछि गर्दा पनि हुने कामलाई प्राथमिकता दिएकाे उनकाे गुनासाे छ ।

बेहुलाबेहुलीलाई जनप्रतिनिधिको शुभकामना, विवाह दर्तादेखि गर्भ बसेकाे थाहा पाउनेसम्मका टिप्स

'२१ असार २०७७ मा मेयर साहले शिलान्यास गरेकाे शहीदगेट याेजना चिनजानका ठेकेदारलाई टेन्डरबिनै सुम्पिए । वर्षैपिच्छे बजेट छुट्याइदिए । तर जनआवश्यकताकाे कुरालाई टार्दैटार्दै ल्याए', जनकपुरधाम-८, बाल्मीकिनगरका मिश्रले भने, 'हेर्नुस् न फाेहर शहरमा शहीदकाे नाममा गेट बनाएका छन् ।'

धार्मिक नगरी जनकपुरधाम फाेहरले कुरूप बनेकाे स्थानीयवासीकाे गुनासाे छ । समाधानमा जनप्रतिनिधिले किन प्रभावकारी काम गर्न सकेनन् त ?

यसबारे चित्तबुझ्दाे जवाफ जनप्रतिनिधिहरूसित छैन । बरू आराेप-प्रत्याराेप गरेर पन्छिन खाेज्छन् उनीहरू । उपमेयर झा फोहर व्यवस्थापनमा काम गर्न खोजेको भए पनि वडा नम्बर १८ ले असहयोग गरेकाे बताउछिँन् । भन्छिन, ‘हामीले १८ नम्बर वडामा पर्ने भाेइलमा १३ बिघा जग्गा लिएर ल्याण्ड फिल्ड साइटकाे काम सुरु गर्‍याैँ । तर वडाअध्यक्षजीले बखेडा झिकेर काम गर्न दिनुभएन ।'

बाटाेसँगै खुसी भित्र्याएकाे बडिमालिका

तर, जनकपुर-१८ का वडाध्यक्ष रामशंकर पासवान भने उपमेयर झाकाे आराेप स्वीकार्दैनन् । नगरपालिकाले बिनाअध्ययन ल्याण्ड फिल्ड साइटकाे काम थालेपछि समस्या भएकाे उनकाे भनाइ छ । 'सार्वजनिक जग्गा भनेर नगरपालिकाले काम थाल्याे । तर माेही गुठीकाे जमिन पुस्ताैँदेखि भाेगचलन गर्दै आएकाे पुर्जा बाेकेर जनता सडकमा आए । अनि कसरी हुन्छ काम ? आफ्नाे कमजाेरी लुकाउन मलाई आराेप लगाएर हुन्छ ?', उनी प्रश्न गर्छन् ।

गएकाे १२ मंसिरमा त केही वडाका प्रतिनिधिहरू फाेहर व्यवस्थापनमा नगरपालिका नेतृत्त्वले ध्यान नदिएकाे भन्दै संघीय मामिला तथा सामान्य प्रशासन मन्त्रालयमा ज्ञापनपत्र नै बुझाएका थिए । वडा नम्बर- ३ का अध्यक्ष दिपेन्द्र साह, ४ का सुदर्शन सिंह, ७ का जानकीराम साहलगायत २९ जना जनप्रतिनिधिको टोलीले काठमाडौंमा धर्नासमेत दिएका थिए ।

जनप्रतिनिधिको लोगोमा साढे ३३ लाख खर्चिएको काठमाडौं महानगरसँग आफ्नै जग्गाको लालपुर्जा सुरक्षित छैन

जनकपुरधाम- ३ का वडाअध्यक्ष दिपेन्द्र साह भन्छन्, ‘हामी भन्दा-भन्दा थाकिसक्याैँ । मेयरले जहिल्यै आश्वासन मात्र दिन्छन्, काम गर्दैनन् । सधैँ झुक्याएपछि मेयरको राजीनामा माग्दै हामी काठमाडौंसम्म पुगेका थियौँ ।’

उनका अनुसार कार्यपालिकाकाे पहिलो बैठकमै फोहर व्यवस्थापनकाे मुद्दा उठेको थियो । नगरसभाले याे मुद्दा सम्बाेधन गर्ने भन्दै ट्याक्टर थप्यो । कर्मचारी थप्यो । फोहर व्यवस्थापन कहाँ गर्ने भन्नेचाहिँ टुंगाे लगाउन सकेन । पछि हतार-हतार वडा नम्बर १८ मा ल्याण्ड फिल्ड साइटकाे काम थालेपछि झमेला भएर काम अघि बढ्न नसकेकाे बताउँछन् वडा नम्बर ४ का अध्यक्ष सुदर्शन सिंह ।

नगरपालिकाकाे लापर्बाही र ढिलासुस्तीका कारण धार्मिक नगरीका बासिन्दा दुर्गन्धमा बस्न बाध्य छन् । जनकपुरधाम-४ का मनीष यादव भन्छन्, ‘जनकपुरधाम अहिले नरकपुरधाम भएको छ । स्थानीय सरकार आएपछि समस्या समाधान हुन्छ कि भनेर सोचेको झन् बल्झियो ।’

जनकपुरधाममा फाेहर व्यवस्थापनसहितका माग लिएर धर्ना दिन गत मंसिरमा काठमाडाैं आएका जनकपुरकाे विभिन्न वडाका प्रतिनिधिहरू ।

वडा नम्बर ४ का अध्यक्ष सिंह कार्यपालिकाकाे पहिलो बैठकमा छाडा चौपाया व्यवस्थापन, फोहर व्यवस्थापन गरी शहरलाई सुन्दर, हराभरा बनाउने निर्णय भएको सम्झन्छन् । तर, त्यसपछि मेयरले आफूखुसी एजेण्डा ल्याउने र लाद्ने गर्न थालेकाले पहिलाे बैठकका निर्णयमा काम नभएकाे सिंहकाे आराेप छ । 'मेयरले एकलौटी निर्णय गर्न खोजेपछि असहमति जनायौँ । तेस्रो बैठकको कार्यविधिमा बाेर्डबाट निर्णय हुन नसकेमा निर्णाधिकार मेयरमा रहने उल्लेख भएपछि वडा अध्यक्ष र नगरपालिकाबीच दूरी थप बढ्यो । यही कारण नगरपालिकाको काम र वडाको काममा बाधा पुग्दै गयाे', उनले भने ।

भरतपुर महानगरकी मेयर रेणु दाहालले गरेकी थिइन् ४० बाचा, कति भए पूरा ?

यसबारे प्रश्न गर्दा मेयर साहले वडाअध्यक्षहरूको आरोप इन्कार गर्दै यसबारे थप नबोल्ने बताए ।

स्थानीय सराेज मिश्रचाहिँ फाेहर व्यवस्थापनकाे काम हुन नसक्नुमा मेयर र उपमेयरजस्तै वडाअध्यक्षहरूले पनि दाेष लिनुपर्ने बताउँछन् । 'काम गर्न नसकेकाे भए गनगन गरेर बस्ने हाेइन, राजीनामा दिने हाे । उसले उसलाई दाेष लगाएर अहिले उम्किन खाेजेर हुन्छ ?', उनी भन्छन् ।

भ्रष्टाचार नै भ्रष्टाचार

नेपाली कांग्रेस जनकपुरधामका नगरसभापति मनोज साह फाेहर व्यवस्थापनकाे मुद्दामा मेयर, उपमेयरले जनतालाई ढाँटेकाे आराेप लगाउँछन् । 'पक्षपाति र कर्मकाण्डी काम मात्र गरे । गरेका काममा पनि भ्रष्टाचार भयाे । जता सेटिङ हुन्छ, ध्यान त्यतै गयाे अनि कहाँबाट हुन्छ जनताकाे सुनुवाइ ?', उनले भने ।

उपमहानगरपालिकाले नगरभित्रको ढल तथा सडक निमार्णका लागि आईयूडीपीको २ अर्ब बजेटमा ४८ करोड रकम काम गर्न नसकेर फिर्ता गएकाे उनकाे भनाइ छ ।

नेपाली कांग्रेस जनकपुरधामका नगरसभापति मनोज साह ।

‘भारतीय प्रधानमन्त्री नरेन्द्र मोदीको स्वागतमा समेत भ्रष्टाचार भयाे । त्यसको सत्यतथ्य सार्वजनिक गर्न मेयर मान्दै मानेनन्', जुन समस्यामा पनि मेयर साह कोरोना महामारीलाई देखाएर पन्छिने गरेकाे मनाेज साहकाे आराेप छ ।

'हामीले कोरोनाकालमा उपमहानगरलाई बाधा नपुगोस् भनेर छोड्याैँ,' साहले भने । तर त्यसकै आडमा भ्रष्टाचार गरेको उनले आरोप लगाए । उनले भने, ‘१८ पटक निवेदन दिएर सचेत गराउन खोज्यौँ । दुई पटक कार्यालयमा तालाबन्दी गर्‍याैँ, तर पनि सरोकार राखेनन् ।’ (शीर्षक परिमार्जित)

प्रकाशित मिति: शुक्रबार, माघ २८, २०७८ १८:३०