भिजिट भिसामा यूएई पुगेका ३० हजार नेपाली अलपत्र

A+ A A-

भिजिट भिसामा यूएई पुगेका ३० हजार नेपाली रोजगारी नपाएपछि अलपत्र अवस्थामा बसेका छन् । उनीहरू भिजिट भिसामा रोजगारीको प्रलोभनमा परी कन्सल्टेन्सी, ट्राभल एजेन्सी र म्यानपावर कम्पनीमार्फत आएको यूएईस्थित नेपाली दूतावासले जनाएको छ ।

दूतावासले यूएई भिजिट भिसामा आएका ३० हजारभन्दा बढी नेपालीहरू अलपत्र अवस्थामा काम खोज्दै बसेको श्रम, रोजगार तथा सामाजिक सुरक्षा मन्त्रालयलाई दुई साताअघि नै जानकारी गराएको थियो ।

सन् २०१९ यता साढे २ लाख नेपाली भिजिट भिसामा यूएई पुगेको अध्यागमन विभागको तथ्यांक छ । गत वर्ष मात्र ८२ हजार नेपाली यूएई भिजिट भिसामा गएको विभागको तथ्यांकमा उल्लेख छ ।

भिजिट भिसामा यूएई जाने साढे २ लाखमध्ये करिब ५० हजार आफन्त भेटन्, उपचार गर्न र व्यापार–व्यवसायका लागि गएको र बाँकी अरु सबै रोजगारीका लागि जाने गरेको श्रम मन्त्रालयको बताउँदै आएको छ ।

दूतावासले श्रम मन्त्रालयलाई जानकारी गराएपछि श्रम, रोजगार तथा सामाजिक सुरक्षामन्त्री कृष्णकुमार श्रेष्ठ यूएईमा अलपत्र परेका नेपालीको अवस्था बुझ्न र उनीहरूलाई उद्धार गर्न यूएई जाने तयारी गरिरहेका छन् ।

गत आइतबार नेपाली नागरिकलाई यूएईमा अलपत्र पार्ने संस्था वा व्यक्तिलाई कारबाहीको दायरामा ल्याउन र पीडितलाई कसरी न्याय दिलाउन सकिन्छ भन्नेबारे मन्त्री श्रेष्ठले नेपालका लागि यूएईका राजदूत साइद हमदान अल नाकीसँग मन्त्रालयमा छलफलसमेत गरेका थिए ।

यूएई सरकारसँग रोजगारीसँगै श्रम सम्झौता र कोरोनापछि रोजगारीको अवस्थाका बारेमा छलफल गर्न जान लागेको श्रममन्त्री श्रेष्ठले जानकारी दिए ।

पछिल्लो समय भिजिट भिसामा यूएई पुगेका धेरै नेपाली अलपत्र अवस्थामा बसेको सूचना पाएको उनले बताए । ‘म्यानपावर, कन्सल्टेन्सी, ट्राभल र एजेन्टले सबैभन्दा धेरै भिजिट भिसामा यूएई नेपाली पठाइरहेका छन् । यो विषयमा अनुसन्धान भइरहेका छ । कोरोना महामारीमा समेत नेपालीहरू यूएई भिजिट भिसामा गएर अलपत्र परेका छन्’, उनले भने, ‘सरकारले यूएईमा अलपत्र परेका नेपालीलाई त्यहाँको सरकारसँग आग्रह गरेर उद्धार गर्नै विषयमा छलफल भइरहेको छ । यो समस्या एउटा मन्त्रालयको मात्र होइन । कूटनीतिक सम्बन्धसँग जोडिएको हो । त्यही भएर छलफल आवश्यक छ ।’

यूएई भिजिट भिसा गएका कति नेपाली अलपत्र छन् भने यकिन संख्याभन्दा पनि उनीहरूलाई चाँडै उद्धार गर्नुपर्ने उनको भनाइ छ ।

भिजिट भिसामा ३ वर्षमा साढे २ लाख नेपाली यूएई पुगे, श्रममन्त्री भन्छन्– यो त सरासर तस्करी हो

सयभन्दा धेरै म्यानपावर संलग्न

सरकारले भिजिट भिसा तथा विदेश जाने युवाहरूसँग हुने मनपरी असुलीविरुद्ध श्रम रोगार तथा सामाजिक सुरक्षा मन्त्रालय, गृह मन्त्रालय, परराष्ट्र मन्त्रालय तथा संस्कृति पर्यटन तथा नागरिक उड्डयन मन्त्रालयका प्रतिनिधि सम्मिलित कार्यदल गठन गरी धमाधम उजुरी लिन थालेको छ ।

कार्यदलले काम पनि सुरु गरेको श्रम मन्त्रालयले जनाएको छ । नेपालबाट भिजिट भिसामा यूएई नेपालीहरू पठाउन १ सयभन्दा धेरै म्यानपावर कम्पनी संलग्न रहेको पाइएको श्रम मन्त्रालयले जनाएको छ ।

श्रम मन्त्रालयको कल सेन्टरमा भिजिट भिसामा यूएई गएर अलपत्र परेका नेपालीहरूले उजुरी गरेको आधारमा १ सयभन्दा धेरै म्यानपावरले भिजिट भिसामा रोजगारीको प्रलोभन देखाएर कामदार पठाएको पाइएको हो ।

रोजगारीको प्रलोभन देखाएर भिजिट भिसामा यूएई पुर्‍याई दलालले अलपत्र पारेको, ठगीमा पारेको, विभिन्न समस्या तथा अप्ठ्यारोमा पारेको, युवाहरू रोजगारी पाउने आशामा दलाललाई लाखौँ रकम तिरेर भिजिट भिसामा पुगी ठगीमा परेकाे जस्ता उजुरी परेको सेन्टरले जानकारी दिएकाे छ ।

भिजिट भिसामा यूएई पुगेका ११८ नेपाली अलपत्र, ४० जना नेपाली सेना छाडेका पनि

हालसम्म भिजिट भिसामा यूएई पठाएर अलपत्र परेको भन्दै सयभन्दा धेरै म्यानपावरको नाममा उजुरी आएको छ । ती म्यानपावरको नामावली तयार पारेर कारबाहीका लागि वैदेशिक रोजगार विभागमा पठाउने तयारी भइरहेको श्रम मन्त्रालयले जनाएको छ ।

कल सेन्टरमा गएकाे २ सातामा १ हजार २ सयभन्दा बढी उजुरी परेको छ । पीडितले फोन र इ–मेलबाट उजुरी गरेका छन् ।

नेपाल सरकारले रोजगारका लागि प्रतिबन्ध लगाएका मुलुकहरूमा समेत लगेको तथा मानव तस्करहरूको चङ्गुलमा परेको जस्ता समस्यामा दैनिक सयभन्दा धेरै उजुरी आउने गरेको कल सेन्टरले जनाएको छ ।

जब एजेन्टले समुद्रमा बोलाएर मार्न खोजे

फेरि रुट परिवर्तन

म्यानपावर व्यवसायीले भिजिट भिसामा सेटिङ गरी सोझासाझा नेपालीहरूबाट चर्को रकम लिएर खाडी मुलुक र मलेसिया पठाउँदै आएका छन् ।

त्रिभुवन विमानस्थलबाट भिजिट भिसामा जान कडा गरेपछि मानव तस्करी गर्दै आएका म्यानपावर व्यवसायीहरूले श्रीलंका, बंगलादेश, पाकिस्तान र भारतको बाटोहुँदै मलेसिया र खाडीका देश पठाउन थालेका छन् ।

गत साता यसरी रुट परिवर्तन गरेर भिजिट भिसामा भारतहुँदै यूएई जान लागेका १७ जनालाई अध्यागमन विभागले रोकेको छ ।

काेराेनाका कारण भिजिट भिसामा रोक : ११ हजारको भ्रमण रोकियो, अधिकांश यूएई जाने

भिजिट भिसामा जाने नेपालीमाथि कडाइ गर्न थालिएको र शंका लागे तत्काल उनीहरूलाई विमानस्थलबाटै फर्काउन थालिएको अध्यागमन विभागका महानिर्देशक नारायणप्रसाद भट्टराईले जानकारी दिए । उनका अनुसार भिजिट भिसामै घुम्न र आफन्त भेट्न जानेहरूकाे हकमा भने कुनै समस्या छैन ।

प्रकाशित मिति: बिहीबार, माघ २७, २०७८ १४:५५