जब एजेन्टले समुद्रमा बोलाएर मार्न खोजे

A+ A A-

३ महिनाअघि रोजगारीको प्रलोभनमा परेर एजेन्टमार्फत भिजिट भिसामा युएई पुगिन् सल्यानकी कला तामाङ (नाम परिवर्तन) । एजेन्टले नेपालमा भनेजस्तो काम युएईमा नपाएपछि तामाङसँगै पाल्पाकी एक जना महिला पनि अलपत्र परेकी छन् । अहिले उनीहरू युएईस्थित नेपाली दूतावासमा स्वदेश फर्काइदिन भन्दै गुहार मागिरहेका छन् ।

तामाङ युएई जानुअघि काठमाडौंस्थित सिभिल अस्पतालमा सरसफाइकर्मीका रूपमा कार्यरत थिइन् । नेपालमा मासिक १८ हजार कमाएर आफनो गुजारा चलाइरहेका बेला धेरै कमाउने प्रलोभनमा भिजिट भिसामा युएई जाँदा उनी दलालकाे फन्दामा फसिन् ।

सिभिल अस्पतालमा उपचारका लागि आएका एक जना पुरुषले यो काम भिजिट भिसामा युएई गएर गर्दा नेपालभन्दा धेरै कमाइ हुने प्रलोभन देखाएपछि आफू युएई आएको कलाले जानकारी दिइन् । ती पुरुष काठमाडौंबाट नेपालीहरूलाई भिजिट भिसामा युएई ओसार्ने होमबहादुर खड्का रहेछन् । त्यसबाहेक उनलाई खड्काबारे अरु केही थाहा छैन ।

'खड्काले नेपालमा जति काम गर्दा युएईमा ७० हजार रुपैयाँ सजिलै कमाउने प्रलोभन देखाएपछि उनको भरमा युएई आएँ । तर, मलाइ युएई हैन, इरान लैजाने भनेर ल्याएको रहेछ भन्ने यहाँ आएपछि मात्र थाहा भयाे', तामाङले भनिन् ।

‘म असोज अन्तिममा भिजिट भिसामा नेपालबाट युएई उडे । मलाई अस्पतालभित्र नर्सको ड्रेसिङ मिलाउने काम भनेर नेपालबाट एजेन्टले पठायो । तर, युएई पुगेपछि धरानका एजेन्ट बिक्रम राईले इरान जानुपर्छ भन्यो । मैले मानिनँ’, उनले भनिन् ।

'युएईमा ३ महिनासम्म एजेन्टले कहिले यता त कहिले उता डुलाउँदै राख्यो । नेपालमा भनेजस्तो रोजगारी कहिलेबाट लगाउने हाे ? कि प्रहरीमा उजुरी गरौँ ? भन्दा मध्यरातमा एजेन्टले आबुधाबी नजिकैको समुद्रमा बोलाएर मारेर फालिदिने धम्की दियाे', कलाले सुनाइन् ।

सुरुमा कामका बारेमा गफ गर्ने भनेर भेट्न बोलाएर मार्ने धम्की दियो । अर्कोको देशमा त्यसमा पनि दुई जना मात्र महिला थियौँ । धरानका राईसहित चार जना एजेन्टले आएर चुपचाप हामीले भनेजस्तो गर नत्र समुद्रमा माछाको आहारा होलिस् भनेर धम्क्याएपछि भागेर दूतावासको शरणमा पुगेको तामाङले बताइन् ।

‘एजेन्ट राईले डरत्रास देखाउँदै अब इरान जानुपर्छ भनेर दिनैपिच्छे फोन गर्थ्याे । तर, मैले इरान नजाने अड्डी लिएँ । त्यसपछि उसले मलाई धेरै पटक धम्क्यायो’, उनले भनिन्, ‘अरु पनि नेपालबाट आएका महिला इरान घरको काम गर्न गइरहेका छन् । तिमी पनि जाउ, नत्र तिम्रो पैसा पनि फिर्ता हुँदैन । युएई प्रहरी लगाएर पक्राउँछु भन्दै धम्क्यायो ।’

भिजिट भिसामा युएई जान एजेन्ट खड्कालाई आफूले ३ लाख रुपैयाँ बुझाएको तर हातैमा पैसा दिएका कारण कुनै प्रमाण नभएकाेले उजुरी गर्न समस्या भएकाे उनले सुनाइन् ।

आफूसँग युएई भिजिट भिसामा करिब ११ जना महिला आएकाेमा दुई जनाले मात्रै युएईमै काम गरेकाे र अरु सात जनालाई रातारात इरान र कुवेत घरेलु रोजगारीमा पठाएको तामाङले दाबी गरिन् ।

आफू र पाल्पाकी एक जना महिला भने एजेन्ट राईले धम्क्याएपछि भागेर दूतावास पुगेका कारण इरान बेचिनबाट जोएिको उनको भनाइ छ ।

भिजिट भिसामा दलालले युएई पुर्‍याएका नेपाली महिलाहरू खाडीका अन्य देशमा तस्करी भइरहेका छन् ।

सरकारी कर्मचारीकै सेटिङ

सरकारी कर्मचारीकै सेटिङमा रोजगारीका नाममा मानव तस्करी भइरहेको छ । हामी जाँदा एयरपोर्ट आगाडि एउटा होटलमै सबै सेटिङ एजेन्ट र अध्यागमनका कर्मचारीले मिलाएर सिधै जहाज चढाएको तामाङले जानकारी दिइन् ।

‘ प्रहरीले पनि केही सोधिखोजी गर्दैनन् । पहिला नै एजेन्टसँग सेटिङ हुँदोरहेछ । त्यही भएर प्रहरीले पनि जाउ मात्र भन्छन्’, उनले भनिन्, ‘एजेन्टले एयरपोर्टमा प्रहरीले सोध्यो भने 'युएईमा आफन्त छ मात्र भन्नू' भनेर विमानस्थल कटाउँछन् । यो सबै सेटिङ त हो ।’

'भिजिट भिसामा जाने कामदारलाई सेटिङमा राति २ बजेको एयर अरेबियाको उडानमार्फत पठाइन्छ । यो एयरलाइन्समार्फत जाने व्यक्तिहरूलाई खासै चेकजाँच गरिँदैन', उनले भनिन् ।

अध्यागमन विभागकाअनुसार गत वैशाखयता १७ हजार ३ सय ६४ नेपाली भिजिट भिसामा युएई पुगेका छन् ।म्यानपावर, कन्सल्टेन्सी, ट्राभल र एजेन्टले सबैभन्दा धेरै भिजिट भिसामा नेपालीलाई युएई पठाइरहेको पाइएको छ ।

प्रकाशित मिति: आइतबार, माघ ९, २०७८ ०६:४८