भिजिट भिसामा यूएई पुगेका ११८ नेपाली अलपत्र, ४० जना नेपाली सेना छाडेका पनि

A+ A A-

आकर्षक रोजगारीको प्रलोभनमा परेर भिजिट भिसामा दलालमार्फत दुबई पुगेका १ सय १८ नेपाली युवा अलपत्र परेका छन् । उनीहरूलाई दुबईस्थित अलफैदीमा कार्यालय रहेको त्रिनेत्र कन्सल्टेन्सीका सञ्चालक कोमलराज उपाध्यायले भिजिट भिसामा यूएई लगेका थिए ।

पटक–पटक गरेर चार/पाँच महिनाअघि मनग्य तलबसहित रोजगारीको प्रलोभन देखाएर भिजिट भिसामा ल्याएको पीडित मोरङ बेलबारीका नवीन घिमिरेले जानकारी दिए ।

भिजिट भिसामा आएका सरकारी जागिर खाएकादेखि वैदेशिक रोजगारीमा गएर फर्किएकाहरूसमेत रहेको पीडित नवीनले बताए । ‘भिजिट भिसामा आएका १ सय १८ जनामध्ये कम्तीमा ४० जना नेपाली सेनाको जागिर छाडेर आएकाहरू छन्,' उनले भने, ‘भिजिट भिसामा ल्याएर व्यक्तिलाई दुबईकाे प्रहरी, सुरक्षा गार्डमा लगाइदिने र केही समयपछि युरोपका देश पठाइदिने प्रलोभन देखाइएको छ । अबुधाबीमा भिजिट भिसामा आएका धेरै अलपत्र परेका छन् ।’

भिजिट भिसामा गएकाले प्रतिव्यक्ति ४ देखि ७ लाख रुपैयाँ तिरेको उनको भनाइ छ । त्रिनेत्र कन्सल्टेन्सीले ल्याएका करिब ३ सयभन्दा धेरै नेपाली यूएईमा काम नपाएर अलपत्र भएर बसेको उनले जानकारी दिए ।

यस्तै, कन्सल्टेन्सी सञ्चालक उपाध्यायले आर्म्स गार्डमा काम लगाइदिन्छु भन्दै यहाँ ल्याएपछि बन्धक बनाएर राखेको पीडित श्रीराम रानाभाटले शिलापत्रलाई बताए । केही पीडित युवाले कुल लागत रकमको आधा अर्थात् करिब ४ लाख रुपैयाँ नेपालमा तिरेको र बाँकी रकम अफर लेटर आएपछि तिर्ने सहमतिमा ल्याइएको पीडित रानाभाटले बताए ।

रानाभाटका अनुसार कन्सल्टेन्सी सञ्चालक उपाध्यायले आफ्नी श्रीमती रञ्जना ढकाल प्याकुरेलको नाममा रहेको प्रभु बैंकको खातामा नेपालमै रकम जम्मा गर्न लगाउने गरेका छन् ।

प्याकुरेलको खातामा प्रत्येक व्यक्तिले ३ लाखभन्दा बढी जम्मा गरेकाे उनीहरूकाे दाबी छ । यूएई पुगेपछि ४ लाख तिर्ने सहमति भएको पीडितले बताएका छन् ।

भिजिट भिसामा गएका युवाहरू र दलालबीच सहमति भएअनुसारको काम नभएपछि यो घटना बाहिर आएको यूएईस्थित नेपाल दूतावासकी काउन्सिलर निर्मला थापाले जानकारी दिइन् ।

भिजिट भिसामा आएर अलपत्र परेका व्यक्तिका विषयमा श्रम, रोजगार तथा सामाजिक सुरक्षा मन्त्रालयलाई जानकारी गराएको र उनीहरूका विषयमा छानबिन भइरहेको काउन्सिलर थापाले बताइन् ।

१ सय १८ जनामध्ये कतिपय स्वदेश फर्किएका छन् भने कोही फर्किने क्रममा रहेको दूतावासले जनाएको छ । यूएई भिजिट भिसामा पुगेका धेरै नेपाली रोजगारी नपाएपछि समस्यामा पर्ने गरेको दूतावासले जनाएको छ ।

भिजिट भिसाका नाममा दैनिक तस्करी

अध्यागमन विभागका अनुसार गत वैशाखयता मात्रै १७ हजार ३ सय ६४ नेपाली भिजिट भिसामा यूएई पुगेका छन् । म्यानपावर, कन्सल्टेन्सी, ट्राभल र एजेन्टले सबैभन्दा धेरै भिजिट भिसामा यूएईसँगै खाडीका अन्य देशमा पनि नेपालीहरूलाई पठाइरहेको पाइएको छ ।

विदेशमा बसेर कतिपय व्यक्तिले भिजिट भिसामा कामदार पठाउनका लागि नेपालमा एजेन्ट नै राखेको पीडितले वैदेशिक रोजगार विभागमा उजुरी गर्दै आएका छन् । तर, भिजिट भिसामा कामदार पठाएको प्रमाण नहुँदा कारबाही गर्न समस्या भइरहेको विभागले जनाएको छ ।

पीडितले दिएको उजुरीका आधारमा भिजिट भिसामा कामदार पठाउन म्यानपावर र व्यक्तिगत एजेन्टको खोजी भइरहेको विभागका महानिर्देशक दीपक काफ्लेले बताए । विभागले भिजिट भिसाका नाममा यूएई कामदार पठाउने म्यानपावर, ट्राभल र कन्सल्टेन्सीका केही महत्त्वपूर्ण कागजात जफत गरेर कारबाहीसमेत गरेको उनले बताए ।

ओम ओभरसिज प्रालि, एचएमटी म्यानपावर, सिनामंगलस्थित स्काई अफ द वोड, इम्पावर ह्युमन रिसोर्सेज म्यानेजमेन्ट, रोयल एचआर, सुर्खेत ओभरसिज र स्काई ब्लू इन्टरनेसनल ओभरसिजले भिजिट भिसामा कामदार यूएई पठाइरहेको सूचना पाएपछि छापा मारेर कारबाहीसमेत गरिएको विभागले जनाएको छ । विभागका अनुसार मल्टिपल ट्राभल एण्ड टुर्सले समेत भिजिट भिसामा कामदार पठाइरहेका छन् ।

प्रकाशित मिति: शुक्रबार, माघ ७, २०७८ १९:०५