मोरङको उखुबारीमा शव फेला प्रकरणः यस्तो छ हत्याको नालीबेली

A+ A A-

प्रहरीले मोरङमा दुई जनाको हत्या गरी उखुबारीमा शव गाडेको र ललितपुरको धापाखेलमा हत्या गरी शव गाडेको आरोपमा तीन जनालाई पक्राउ गरी सार्वजनिक गरेको छ । शुक्रबार पत्रकार सम्मेलन गरी मोरङ प्रहरीले आरोपित तीन जनालाई सार्वजनिक गरेको हो ।

हत्या आरोपमा पक्राउ पर्नेमा मोरङको जहदा गाउँपालिका- ४ शिसवनीका २९ वर्षीय अमित साह भनिने दिनानाथ सोनार, धनपालथान गाउँपालिका– ७ कमलपुर पश्चिम टोलका ६२ वर्षीय नासिर आलम र सिरहा नगरपालिका– २१ स्थायी घर भई हाल काठमाडौं बल्खु बस्दै आएका ३१ वर्षीय अनिल कुमार मण्डल रहेका छन् ।

जिल्ला प्रहरी कार्यालय मोरङका प्रमुख प्रहरी उपरिक्षक जनार्दन जिसीका अनुसार प्रहरीले सोनारलाई बिहिबार विराटनगर- ५ स्थित दामाबन्दी चोकबाट, मण्डलाई काठमाडौं- १३ बल्खुबाट र आलमलाई विराटनगरस्थित नेपाल-भारत सीमानजिक मटेरुवा नाकाबाट पक्राउ गरेको हो ।

मोरङमा दुई जनाको हत्या आरोपमा पक्राउ परेका मण्डलको प्रहरीलाई बयान- हत्या गर्न ललितपुरको घर भाडामा लिएको थिएँ

१२ माघमा मोरङको धनपालथान गाउँपालिका- ७ बोर्डिङ टोलस्थित उखुबारीमा खाल्डो खनेर गाडेको अवस्थामा दुई जनाको शव फेला परेको थियो । मृतकमध्ये एक जना सुनसरीको धरान- ३ का ४९ वर्षीय राजेन्द्र कुमार श्रेष्ठ र अर्का सप्तरीको शम्भुनाथ नगरपालिका- ४ का ३२ वर्षीय शम्भु चौधरी रहेको खुलेको थियो ।

बिहिबार सोही घटनाको अनुसन्धानका क्रममा प्रहरीले ललितपुरको धापाखेलमा थप एक जनाको शव फेला पारेको थियो । ललितपुरको धापाखेलबाट ६२ वर्षीय मोहन लिम्बुको शव भेटिएको हो । ५ फिट तल गाडेको अवस्थामा उनको शव भेटिएको थियो ।

मोहन लिम्बु

यस्तो छ घटनाको नालीबेली

प्रहरी उपरीक्षक जिसीका अनुसार १२ माघ साँझ साढे ७ बजेतिर धनपालथान गाउँपालिका– ७ स्थित स्थानीय दिलिप सिंहको उखुबारीमा खनेको जस्तो नयाँ माटो देखेपछि स्थानीयले इलाका प्रहरी कार्यालय रंगेलीमा खबर गरेका थिए ।

खबर पाएपछि इलाका प्रहरी कार्यालय रंगेलीका प्रहरी निरिक्षक अनमोल खड्काको कमाण्डमा खटिएको टोली घटनास्थलमा गएर हेर्दा उखुबारीको दक्षिणपूर्व पट्टी शंकास्पद खाल्डो पुरेको अवस्थामा रहेको र सोही स्थानबाट ३० मिटर पश्चिमउत्तर तर्फ अर्को शंकास्पद खाल्डोसमेत भेटिएको थियो ।

शंकास्पद दुई खाल्डो देखिएपछि पहिले देखिएको खाल्डो प्रहरी निरिक्षक खड्कासहितको टोलीले खनेर हेर्दा ५ फिटमुनि सडे-गलेको अवस्थामा शव फेला परेको जिसीले जानकारी दिए । अनुसन्धानका क्रममा १६ माघमा सो शव सप्तरीको शम्भुनाथ नगरपालिका- ४ का ३२ वर्षीय शम्भु चौधरी रहेको खुलेको थियो । मृतकले लगाएको कपडा, जुत्ता, दाहिने हातमा बाधेको राखी र रूमालका आधारमा उनको परिवारले शवको सनाखत गरेको थियो ।

ललितपुरको धापाखेलमा शव निकाल्दै प्रहरी ।

उत्खनन् गरिएको खाल्डोमा शव फेला परेपछि अर्को खाल्डोमा पनि शव हुनसक्ने आशंकासहित प्रहरीले त्यसलाई सुरक्षित राखेको थियो । १३ माघमा दोस्रो खाल्डो तालिम प्राप्त कुकुरसहित प्रहरी उपरीक्षक जिसीको नेतृत्वको टोलीले खनेर हेर्दा अर्को शव फेला परेको थियो ।

शवसँगै मृतकले प्रयोग गरेको सीम कार्ड, पर्स र सवारी चालक अनुमतिपत्र फेला परेपछि सोही दिन उक्त शव सुनसरीको धरान–३ का ४९ वर्षीय राजेन्द्र कुमार श्रेष्ठको खुलेका प्रहरी उपरीक्षक जीसीले जानकारी दिए । मृतकमध्ये एक जना जग्गा कारोबारी र अर्का ठेकेदार रहेको प्रहरीले जनाएको छ ।

उखुबारीमा गाडिएको अवस्थामा भेटिएका दुवै शवको पहिचान खुल्यो

जिसीका अनुसार प्रारम्भिक अनुसन्धानमा व्यवसायिक कामको शिलशिलामा मृतक राजेन्द्र कुमार श्रेष्ठ, शम्भु कुमार चौधरी र हत्या आरोपित अनिल कुमार मण्डल २९ मंसिरमा विराटनगर आएको खुलेको छ । जिसीका अनुसार त्यसअघि नै मण्डलको समूहले तेह्रथुम घर भई काठमाडौं बस्ने मोहनकुमार लिम्बुको हत्या गरेको थियो । मण्डलले श्रेष्ठ र चौधरीलाई विराटनगर ल्याए पनि लिम्बुको हत्याबारे उनीहरूलाई जानकारी थिएन ।

मण्डलले हत्याअघि चौधरी र श्रेष्ठलाई विराटनगरस्थित मेट्रोसिटी गेष्ट हाउस र रत्ना होटललमा राखेको प्रहरी अनुसन्धानबाट खुलेको छ । उनीहरूलाई केही दिन होटलमा राखी उखुबारीमा लगी हत्या गरेको अनुसन्धानबाट खुलेको प्रहरीको भनाइ छ ।

उपरीक्षक जिसीका अनुसार मृतकमध्ये श्रेष्ठको ५ पुसमा र चौधरीको ७ पुसमा उखुबारीमा लगेर हत्या भएको थियो । उनीहरूको हत्यामा आठ जना भारतीय पेशेवर हत्याराको प्रगोग गरिएको जिसीले जानकारी दए ।

‘मण्डलले हत्या गर्न प्रतिव्यक्ति ५ लाख रुपैयाँ दिने सर्त गरेको, तीन/तीन लाख दिइसकेको र दुई लाख रूपैयाँ दिन बाँकी रहेछ,’ जिसीले भने ।

मोरङ घटनामा हराइरहेका एक जनाको शव ललितपुरको धापाखेलमा फेला, घटनास्थलमा वाकिटकी पनि भेटियो

श्रेष्ठ र चौधरीको शव गाडेको सय मिटर पर हत्या भएको अनुसन्धानबाट खुलेको छ । उनीहरूको डोरी र गाम्छाले घाँटीमा बाँधेर हत्या गरी खाल्डो खनेर गाडेको र शव गलाउन आयोनुन छर्किएको प्रहरी उपरीक्षक जिसीले बताए ।

मृतकहरू लिम्बु, चौधरी, श्रेष्ठ र हत्या आरोपी मण्डल व्यापारिक साझेदार रहेको खुलेको र मण्डलले कारोबारको रकम एकलौटी बनाउन भारतीय पेशेवर अपराधी प्रयोग गरी हत्या गरेको जिसीले बताए ।

जिसीका अनुसार जग्गालगायतको कारोबार गर्दै आएको आएका उनीहरूले सिमेन्ट उद्योग र हाइड्रोमा पनि लगानी गरेका थिए । कारोबारको रकम एकलौटी बनाउन मण्डलले योजनाबद्ध रूपमा उनीहरूको हत्या गरेको जिसी बताउँछन् ।

‘एउटै व्यवसायबाट एक करोडभन्दा बढी कमाई हुन थालेपछि त्यसकै लोभमा योजनाबद्ध रूपमा हत्या गरेको देखिएको छ,’ जिसीले भने ।

अनिलकुमार मण्डल

विराटनगरबाट पक्राउ परेका सोनार र आलमले प्रहरीलाई घटनाबारे जानकारी दिएपछि मण्डल पक्राउ परेका थिए । उनले सुरुमा इन्कार गरे पनि तीनै जनालाई भेट गराएपछि आरोप स्वीकार गरेको प्रहरीले जनाएको छ ।

धनपालथानको उखुबारीमा शव भेटिएकाहरूको सम्पर्क विवरण खोतल्दै जाँदा प्रहरीले मण्डललाई पक्राउ गर्न सफल भएको हो ।

प्रहरीले अनुसन्धानका क्रममा खाल्डो पुर्न प्रयोग भएको कोदालो र शव गलाउन प्रयोग भएको ६ प्याकेट आयोनूनसहित महत्वपूर्ण प्रमाणहरूसमेत फेला पारेको जिसीले बताए ।