उखुबारीमा गाडिएको अवस्थामा भेटिएका दुवै शवको पहिचान खुल्यो

A+ A A-

मोरङको धनपालथान गाउँपालिकास्थित उखुबारीमा गाडीएको अवस्थामा शव फेला परेका दुई पुरुषको पहिचान खुलेको छ । मोरङको धनपालथान गाउँपालिका-७, बोर्डिङ टोलस्थित उखुबारीमा खाल्डो खनेर गाडेको अवस्थामा दुई जनाको शव फेला परेको थियो ।

मृतकमध्ये एक जना सुनसरीको धरान-३ का ४९ वर्षीय राजेन्द्र कुमार श्रेष्ठ र अर्का सप्तरीको शम्भुनाथ नगरपालिका-४ का ३२ वर्षीय शम्भु चौधरी रहेको जिल्ला प्रहरी कार्यालय मोरङका प्रमुख प्रहरी उपरीक्षक जनाद्र्धन जीसीले शिलापत्रलाई जानकारी दिए ।

गत बुधबार उखु काट्ने क्रममा स्थानीयले शंकास्पद खाल्डो भेटाएर प्रहरीलाई खबर गरेपछि खनेर हेर्दा कपडासहित गाडेको अवस्थामा सडेगलेको शव भेटिएको थियो । सोही खाल्डो नजिकै अर्को खाल्डो देखिएपछि बिहीबार मोरङका प्रहरी प्रमुख प्रहरी उपरीक्षक जीसीसहितको टोलीले खाल्डो खनेर हेर्दा अर्को शव भेटिएको थियो ।

मृतकमध्ये चौधरीको चार दिनपछि पहिचान खुलेको हो । घरबाट निस्कँदा लगाएको टी–सर्ट र हातमा लगाएको डोरोबाट चौधरीका परिवारले शवको पहिचान गरेको जीसीले बताए । जीसीका अनुसार सप्तरी घर भए पनि चौधरी काठमाडौंको क्षेत्रपाटी बस्दै आएका थिए ।

अर्का मृतक श्रेष्ठको शव बिहीबार दिउँसो उत्खनन् गरेर निकालिएको थियो । शव भेटिएको स्थानबाट उनले प्रयोग गरेको सीम कार्ड, पर्स र सवारी चालक अनुमतिपत्र फेला परेपछि सोही दिन श्रेष्ठको पहिचान खुलेको प्रहरी उपरीक्षक जीसीले जानकारी दिए । उनका अनुसार श्रेष्ठको धरान घर भए पनि उनी भक्तपुर बस्दै आएका थिए ।

मृतकमध्ये एक जना जग्गा कारोबारी र अर्को एक जना ठेकेदार भएको खुलेको प्रहरी उपरीक्षक जीसीले बताए । ‘एक जना जग्गा कारोबारी र अर्को घर बनाउने ठेकेदार भन्ने खुलेको छ’, उनले शिलापत्रसँग भने, ‘यसबारे हामी विस्तृत अनुसन्धान गरिरहेका छौँ ।’

शवको प्रकृति हेर्दा हत्या गरेर गाडेको हुनसक्ने प्रहरी उपरीक्षक जीसीले बताए । उनले घटना कसरी र किन भएको भन्नेबारे हालसम्म केही खुल्न नसकेको बताए । ‘अनुसन्धानमा अनुमानको कुरा गर्न मिलेन । त्यहाँ धेरै थरी अनुमान लगाउन सकिन्छ’, उनले भने, ‘यसै भएको हो भनिहाल्ने अवस्था भइसकेको छैन ।’ उनले हालसम्म कोही पनि पक्राउ नपरेको बताए ।

प्रकाशित मिति: आइतबार, माघ १६, २०७८ १४:१२