विश्व क्यान्सर दिवसकाे नारा 'क्लाेज द ग्याप' नै किन राखियाे ?

A+ A A-

आधुनिक विज्ञानले जसरी फड्को मार्दैछ, उसैगरी हामीसामु उपचार नै असम्भव वा जटिल हुनेखालका रोग/बिमारहरू पैदा भइरहेका छन् । क्यान्सर यस्तै रोग हो, जसको उपचार असम्भव नै त छैन तर यसले बढीभन्दा बढी बिरामीकाे जिन्दगी समाप्त गर्ने गरेको छ ।

क्यान्सर पीडितको संख्यालाई हेर्दै २२ वर्षयता संसारभर क्यान्सर दिवस मनाउने गरिएको छ । क्यान्सर रोग नियन्त्रणमा सरकार र नागरिकलाई जागरुक गराउने उद्देश्यले हरेक वर्ष ४ फेब्रुअरीमा मनाइने यो दिवसलाई यसपालि ‘क्लोज द केयर ग्याप’ नारा दिइएको छ । क्यान्सरका कुनै पनि (धनि, गरिब सबै) बिरामीले हेरचाहमा कुनैखाले विभेद झेल्नु नपरोस् भन्ने नाराको आशय छ । अर्थात् क्यान्सर राेगीकाे हेरचाहमा भइरहेकाे असमानता पहिचान गरी यस्ताे गल्तीलाई निरन्तरता दिन हुँदैन भन्ने मान्यता नारामार्फत प्रवाह गर्न खाेजिएकाे छ ।

याे पनि..

विश्व क्यान्सर दिवस वेबसाइटका अनुसार क्लाेज द ग्याप अभियानकाे पहिलाे वर्ष संसारभर क्यान्सर केयरमा देखिएकाे असमानतालाई बुझ्न र पहिचान गर्नका लागि हाे । अनि खुला दिमाग, चुनाैतीपूर्ण धारणाहरू र कठिन तथ्यहरूलाई नियाल्नका लागि हाे । क्यान्सरकाे हेरचाहमा हुने असमानता नागरिककाे जीवनसँग जाेडिएकाे छ । यो नाराले आगामी ४ फेब्रुअरी २०२४ सम्म निरन्तरता पाउने छ । यसअघि सन् २०१९ देखि २०२१ सम्म ‘म छु र म हुने छु’ भन्ने नारा दिएर दिवस मनाइएको थियो ।

क्यान्सर नियन्त्रणका लागि अन्तर्राष्ट्रिय संघ (यूआईसीसी) को पहलमा सन् २००० देखि यो दिवस मनाउन थालिएको हो । त्यो वर्षको ४ फेब्रुअरीमा क्यान्सरविरुद्ध फ्रान्सको पेरिसमा भएको विश्व शिखर सम्मेलनले दिवस मनाउने निर्णय गरेको थियो ।

याे पनि..

धेरै पुरानो गुन्द्रुकले क्यान्सर गराउन सक्छ ? (डाक्टरसित भिडियो कुराकानी)

विश्व क्यान्सर दिवस मनाउनुको मुख्य उद्देश्य संसारभर सरकार र व्यक्तिलाई यो रोगविरुद्ध एकजुट भएर लाग्न जागरुक गर्नु हो । पेरिस चार्टरको उद्देश्य पनि अनुसन्धानलाई बढावा दिनु, क्यान्सर रोक्नु, रोगी हेरचाहमा सुधार ल्याउनु, जागरुकता बढाउनु, वैश्विक समुदायलाई क्यान्सरको रोकथामका लागि संगठित गर्नु हो ।

विश्व स्वास्थ्य संगठन (डब्लूएचओ) ले सन् २०१३ देखि २०२० सम्मकाे स्थितिलाई अध्ययन गरी तयार गरेको रिपाेर्टअनुसार संसारमा हरेक वर्ष १ कराेड ४१ लाख क्यान्सरका नयाँ राेगी थपिन्छन् । अनि प्रत्येक वर्ष ८२ लाख मानिसले क्यान्सरका कारण ज्यान गुमाउने गरेकाे डब्लूएचओकाे तथ्याङ्कले देखाउँछ ।

विश्वभरिका क्यान्सर बिरामीहरूकाे तथ्याङ्क राख्ने संस्था ग्लाेबाेक्यानकाे रिपाेर्टअनुसार सन् २०१५ देखि २०२० सम्म नेपालमा क्यान्सरका ३६ हजार ९ सय ६ जना बिरामी थिए । सन् २०२० मा मात्रै क्यान्सरका २० हजार ५ सय आठ जना नयाँ बिरामी थपिए । साेही वर्ष क्यान्सरबाट १३ हजार ६ सय २९ जनाकाे मृत्यु भएकाे थियाे । ग्लाेबाेक्यानकाे रिपाेर्टले पनि नेपालमा फाेक्साे, पाठेघर, स्तन, पेट, आन्द्राका क्यान्सरपीडित बढी रहेकाे देखाउँछ ।