क्यान्सर निकाे हुन्छ तर याे चरणसम्म मात्र (भिडियाे रिपाेर्ट)

A+ A A-

हामी दैनिक कस्तो खानापान गरिरहेका छौँ ? हामी कसरी रहिरहेका छौँ । अनि हाम्रो खानपिन र जीवनशैलीले शरीरलाई फाइदा गरिरहेको छ कि बेफाइदा ? यसबारे निकै कम सोचिने र सावधानी नअपनाउँदा बर्सेनि क्यान्सरजस्ता घातक रोगका बिरामी बढिरहेका चिकित्सकहरू बताउँछन् ।

४ फेब्रुअरीमा संसारभर क्यान्सर दिवस मनाइँदै छ । क्यान्सर निवारणका लागि चेतना फैलाउने दिवस मनाउँदै गर्दा विश्व कोभिड महामारीको चपेटामा छ । त्यसैले नेपालसहितका धेरै देशमा यसपालि भर्चुअल माध्यमबाट क्यान्सर सचेतनाका कार्यक्रमहरू गरिँदैछन् । डाक्टरहरू क्यान्सरका कारण बर्सेनि मानवीय क्षति बढ्दै गएकाले यसबारे प्रभावकारी कार्यक्रम र चेतना विस्तारमा जोड दिइरहेका छन् ।

सम्बन्धित समाचार

निरन्तरको टाउको दुखाइ सहेकै थिए, स्वर पनि धोद्रो भएपछि उनी ब्रुनाईको जागिर छोडेर नेपाल फर्किए

विश्व स्वास्थ्य संगठनका अनुसार संसारमा बर्सेनि झण्डै डेढ करोड जना क्यान्सरका नयाँ बिरामी थपिने गरेका छन् । एक वर्षमा ८२ लाखभन्दा बढी मानिसले क्यान्सरकै कारण ज्यान गुमाउने गरेका छन् । अझै रोकथामका लागि प्रभावकारी प्रयास नगरिए सन् २०३० सम्म क्यान्सरका कारण अहिलेभन्दा दोब्बर मानिसले ज्यान गुमाउनुपर्ने स्थिति आउने चेतावनी विश्व स्वास्थ्य संगठनले दिएको छ ।

क्यान्सरकाे कारण

हाम्रो शरीरमा कोषिकाहरू असामान्य तरिकाले बढ्नु नै क्यान्सर रोग हो । आमरूपमा हाम्रो शरीरका कोषिकाहरू नियन्त्रित तरिकाले बढ्छन् र विभाजित हुन्छन् । सामान्य कोषिकाहरूमा नोक्सान पुग्दा वा यस्ता कोषिका पुरानो हुँदा त्यसको ठाउँ स्वस्थ कोषिकाहरूले लिन्छन् । क्यान्सरमा कोषिकाको विकासलाई नियन्त्रित गर्ने संकेतले ठीकसँग काम गर्दैन । क्यान्सरका कोषिकाहरू बढिरहन्छन् । क्यान्सरका कोषिकाले स्वस्थ कोषिकाका सबै नियमहरू उल्लंघन गर्छन् । अर्काे शब्दमा, क्यान्सर रोग शरीरको कोष या कोषिकाहरूको समूहमा देखिने अस्वाभाविक वृद्धि हो । यसको उपचार बेलैमा गरिएन भने यो शरीरमा फैलिन्छ, जसले ज्यानै लिन सक्छ ।

पहिलो, दोस्रो, तेस्रो र चौथो गरी क्यान्सरको चार चरण हुन्छन् । सबै क्यान्सरका लक्षण पनि फरक-फरक हुन्छन् । यसमा सबैभन्दा जोखिम तेस्रो र चौथो चरणमा पुगेका बिरामीलाई हुन्छ । तेस्रो चरणसम्म बिरामीलाई बचाउन सकिने सम्भावना कम हुन्छ भने शरीरमा फैलिएको अवस्था अर्थात् चौथो चरणमा बिरामी बचाउन असम्भवजस्तै हुने भक्तपुर क्यान्सर अस्पतालका क्यान्सर रोग विशेषज्ञ डा. प्रभुप्रसाद साह बताउँछन् ।

डाक्टरहरूका अनुसार क्यान्सर रोगको मुख्य कारक तत्त्व यही नै भन्ने त हुँदैन तर केही कर्सिनोजेन्सका कारण क्यान्सर हुन्छ । जस्तो कि, खैनी, सुर्ती, पान, बिँडी, चुरोट, रक्सीजस्ता पदार्थको लतले क्यान्सर गराउन सक्छ । अत्यधिक चिल्लो, नुन बढी भएको खाना खानु पनि क्यान्सरको जोखिममा पर्नु हो ।

धुवाँमा सेकाएको मासु, ढुसी लागेको तथा बासी खानेकुरा खानु । विकिरण, कुनै जीवाणु वा वंशाणुगत गुणका कारण पनि क्यान्सर हुन सक्छ । वातावरण प्रदूषण, शहरीकरण तथा औद्योगीकरण, मोटोपना, मिसावटयुक्त तथा विषाक्त रसायन भएका पदार्थको निरन्तर प्रयोगले पनि क्यान्सर रोग निम्त्याउन सक्छ ।

हेर्नुहाेस्, भिडियाे रिपाेर्ट: