अरुण तेस्रोका लागि १४ हजार रूख काटिने

A+ A A-

संखुवासभामा निर्माणाधिन बहुप्रतिक्षित अरुण तेस्रो जल विद्युत परियोजनाबाट उत्पादन भएका विद्युत प्रशारण प्रशारण लाईन विस्तारकालागि संखुवासभाका मात्र १४ हजार भन्दा बढी रुख काटिने भएको छ ।

यस परियोजनाले संखुवासभामा रहेको मकालु राष्ट्रिय निकुञ्ज क्षेत्रको ४४ हेक्टर वन प्रयोग गरेको छ । कटान हुने रुखहरु सम्बन्धित सामुदायिक वन उपभोक्ता समितिका उपभोक्ताहरुले प्रयोग गर्न पाउने व्यवस्था छ । परियोजनाले रुख कटान गर्ने र सम्बन्धित उपभोक्ता समूहले कटान भएका रुखको व्यवस्थापन तथा प्रयोग गर्ने जनाइएको छ ।

जलविद्युत् निर्माणका क्रममा अहिलेसम्म संखुवाभामा छ हजार रुख कटान भइसकेका छन् । आयोजना निर्माण स्थलको एक सय २३ हेक्टरका जमिनको छ हजार रुख कटान गरिएकोे अरुण तेस्रो निर्माणको जिम्मा पाएको भारतको सतलज कम्पनीले जनाएको छ । आयोजना स्थल ड्याम साइड र पावर हाउसमा लगिने ३३ केभी प्रशारण लाइनका लागि थप नौ सय ९४ वटा रुख कटान गर्ने योजना छ ।

त्यस बाहेक नै १४ हजार रुख कटान गर्नु पर्ने भएको हो । संखुवासभाको मकालु गाउँपालिका–५ फ्याक्सिन्दामा ड्याम साइड र चिचिला गाउँपालिकाको पुखुवा पावर हाउस निर्माण स्थलमा अहिलेसम्म छ हजार रुख काटिसकिएको जिल्ला वन कार्यालय संखुवासभाका सहायक वन अधिकृत हेमन्त पराजुलीले बताए । आयोजना सञ्चालनका क्रममा विकास सम्झौता (पीडीए) अनुसार रुखहरु कटान भए पनि विरुवा अर्को ठाउँमा रोपिनु पर्ने चिचिला गाउँपालिकाका अध्यक्ष पासाङ नुर्वु शेर्पाको बताए ।

कटान गरिनु पर्ने रुख व्यवस्थापनका लागि सम्बन्धित उपभोक्ता समितिलाई रकम अयोजनाले उपलब्ध गराएको जानकारी भएपनि त्यसको सहि सदुपयोग भए÷नभएको बारे सम्बन्धित उपभोक्ता समितिसँंग लिखित जवाफ माग गरिएको अध्यक्ष शेर्पाको भनाइ छ ।

परियोजनाको ट्रान्समिसन लाइनका लागि सामुदायिक वन क्षेत्र र निजी वनको रुख कटानका लागि सतलजले नेपाल सरकारसंग माग गरेको आयोजनाले जनाएको छ । मन्त्रिपरिषद्को निर्णय अनुसारनै अरुण–३ र कोसी करिडोरलाई रुख काट्न दिने निर्णय भएको सहायक वन अधिकृत पराजुलीले बताए ।

उनका अनुसार अरुण–३ को सात जिल्ला हुँदै लैजाने ट्रान्समिसन लाइनका विस्तारका लागि ९० हेक्टर जमिनको रुख काट्न दिने सरकारी निर्णय भने हुन बाँकी छ । अरुण तेस्रो जलविद्युत् र कोसी करिडोर प्रशारण लाइन निर्माणको लागि संखुवासभाका १८ वटा सामुदायिक वनका रुख काट्ने तयारी छ ।

प्रशारण लाइन विस्तारका लागि करिव दुई किलोमिटर लम्बाइ र ४६ मिटर चौडाई क्षेत्रका रुख काट्ने सम्झौता छ । जल विद्युत परियोजनाले चिलाउने, सखुवा, उत्तिस, पात्ले, मलातो, वेपारी लगाएतका रुख कटान गर्ने जिल्ला वन कार्यालयले जनाएको छ ।

प्रकाशित मिति: बुधबार, फागुन १, २०७५ ०५:३७