चौतर्फी विरोधपछि टेनिस अस्ट्रेलियाले पेङ सुआईको नामअंकित टि-सर्टमा लगाएको प्रतिबन्ध हटायो

चौतर्फी विरोधपछि टेनिस अस्ट्रेलियाले पेङ सुआईको नामअंकित टि-सर्टमा लगाएको प्रतिबन्ध हटायो

तस्वीर बीबीसीबाट

A+ A A-

चौतर्फी विरोधपछि अस्ट्रेलियन ओपनको आयोजक टेनिस अस्ट्रेलियाले पेङ सुआईको नामअंकित टि-सर्टमा लगाएको प्रतिबन्ध हटाएको छ ।

गत शुक्रबार अस्ट्रेलियन ओपन हेर्न मैदान प्रवेश गर्न लागेका दर्शकहरूलाई 'खै पेङ सुआई ?' भन्दै सुरक्षा कर्मचारीले पेङ सुआईको नामअंकित टि-सर्ट खाेल्न लगाएका थिए ।

अस्ट्रेलियन ओपन: चिनियाँ टेनिस स्टार पेङ सुआईको नाम लेखिएकाे टिसर्टमा प्रतिबन्ध, मार्टिनाले गरिन् निन्दा

पेङ चीनकी शीर्ष टेनिस स्टार हुन् । गत नोभेम्बरमा देशका पूर्वउपप्रधानमन्त्री झाङ गाओलीविरुद्ध यौन उत्पीडनको आरोप लगाएपछि पेङ दुई हप्ता सम्पर्कविहीन भएकी थिइन् ।

पछि उनी सार्वजनिक भएपनि उनको सुरक्षालाई लिएर धेरैले चिन्ता प्रकट गरिरहेका छन् । उनै पेङका लागि न्याय माग्दै बनाइएको टि-सर्ट लगाएर अस्ट्रेलियन ओपनमा छिर्न खोज्ने दर्शकलाई टेनिस अस्ट्रेलियाले रोकेको थियो ।

यसपछि खेलसम्बद्ध विभिन्न निकाय र विश्वका शीर्ष खेलाडीले टेनिस अस्ट्रेलियाकाे याे निर्णयकाे विराेध गरेका थिए । चिनियाँ खेलाडी पेङ सुआईको समर्थनअंकित टि–सर्टमा लगाएको प्रतिबन्धको पूर्वटेनिस स्टार मार्टिना नाभरातिलोभाले आपत्ति जनाएकी थिइन् । पूर्वविश्व महिला नम्बर एक टेनिस खेलाडी मार्टिनाले ट्वीट गर्दै टेनिस अस्ट्रेलियाकाे निर्णयलाई ‘दयनीय’ भनेकी थिइन् ।

बीबीसीका अनुसार अस्ट्रेलियन ओपनकाे आयोजक संस्था टेनिस अस्ट्रेलियाका कार्यकारी प्रमुख क्रेग टिलीले अब दर्शकहरूलाई पेङ सुआईको नामअंकित टि-सर्ट लगाउन दिने बताएका छन् । 'उनीहरू शान्तिपूर्णरूपमा प्रतियाेगिता हेर्न आउँछन् भने उनीहरूलाई टि-सर्ट लगाउन दिइने छ', उनले भने ।

यस्ताे थियाे पेङकाे घटना

गत नाेभेम्बरमा राजनीतिज्ञ झाङले आफूलाई यौन सम्बन्धका लागि बाध्य पारेको आरोप लगाएलगत्तै पेङ गायब भएकी थिइन् ।

सामाजिक सञ्जालमा ३५ वर्षीया पेङले शेयर गरेको पोस्टअनुसार घटना तीन वर्षअघिको हो । बेइजिङमा झाङ र उनकी पत्नीले टेनिस म्याचको प्रबन्ध मिलाएका थिए । म्याचपछि पेङलाई झाङले आफ्नो घर लिएर गए अनि कोठामा लगेर यौन उत्पीडन गरे ।

त्यो दिनभर आफू डराएको पेङले लेखेकी थिइन् । सात वर्षअघि पनि आफूलाई झाङले यौनसम्बन्धका लागि बाध्य पारेको कुरा पेङले खुलासा गरेकी थिइन् ।

तर, यस्तो पोस्ट शेयर गरेको केही बेरमै हटाइएको थियो । अनि पेङको सामाजिक सञ्जालको खातासमेत निस्कृय पारिएकाे थियाे । चिनियाँ अधिकारीहरूले देशकी टेनिस खेलाडीले पूर्वसरकारी अधिकारीमाथि लगाएको यौन उत्पीडनको आरोपबारे बहस गर्न रोक लगाएका थिए ।

सम्पर्कविहीन पेङको अवस्था सार्वजनिक गर्न संसारका शीर्ष खेलाडी, खेलसम्बद्ध निकाय, संगठनहरूले दबाब दिएपछि करिब दुई सातापछि उनी देखिएकी थिइन् । यद्यपि, उनकाे सुरक्षालाई लिएर शुभचिन्तकले अझै चिन्ता जाहेर गर्दै आएका छन् ।

प्रकाशित मिति: मंगलबार, माघ ११, २०७८ १४:०७