पूर्वउपप्रधानमन्त्रीलाई यौन उत्पीडनको आराेप लगाएपछि चिनियाँ टेनिस स्टार पेङ सुआई दुई सातादेखि बेपत्ता

पूर्वउपप्रधानमन्त्रीलाई यौन उत्पीडनको आराेप लगाएपछि चिनियाँ टेनिस स्टार पेङ सुआई दुई सातादेखि बेपत्ता

A+ A A-

चीनका पूर्वउपप्रधानमन्त्री झाङ गाओलीविरुद्ध यौन उत्पीडनको आरोप लगाएपछि चिनियाँ टेनिस स्टार पेङ सुआई बेपत्ता छिन् । राजनीतिज्ञ झाङले आफूलाई यौन सम्बन्धका लागि बाध्य पारेको आरोप दुई साताअघि पेङले लगाएकी थिइन् । त्यसयता पेङ गायब रहेकी बीबीसीले लेखेकाे छ ।

सामाजिक सञ्जालमा ३५ वर्षीया पेङले सेयर गरेको पोस्टअनुसार घटना तीन वर्षअघिको हो । बेइजिङमा झाङ र उनकी पत्नीले टेनिस म्याचको प्रबन्ध मिलाएका थिए । म्याचपछि पेङलाई झाङले आफ्नो घर लिएर गए अनि कोठामा लगेर यौन उत्पीडन गरे ।

त्यो दिनभर आफू डराएको पेङले लेखेकी थिइन् । सात वर्षअघि पनि आफूलाई झाङले यौन सम्बन्धका लागि बाध्य पारेको कुरा पेङले खुलासा गरेकी थिइन् ।

तर, यस्तो पोस्ट सेयर गरेको केही बेरमै हटाइएको थियो । अहिले पेङको सामाजिक सञ्जालको खाता नै भेटिँदैन । चिनियाँ अधिकारीहरूले देशकी टेनिस खेलाडीले पूर्व सरकारी अधिकारीमाथि लगाएको यौन उत्पीडनको आरोपबारे बहस गर्न रोक लगाएका छन् ।

सम्पर्कविहीन पेङको अवस्थालाई लिएर संसारका शीर्ष खेलाडी, खेलसम्बद्ध निकाय, संगठनहरूले चिन्ता जाहेर गरेका छन् ।

टेनिस स्टार नाओमी ओसाकाले आफ्नी साथी पेङ बेपत्ता रहेको खबरले आफू स्तब्ध भएको उल्लेख गरेकी छन् । ट्विटरमा एक पोस्ट सेयर गर्दै उनले लेखेकी छन्, ‘मलाई थाहा छैन, तपाईंले कस्ता समाचार पढिरहनुभएको छ वा छैन । तर, हालै मैले एक साथी खेलाडीको बारेमा जानकारी पाएकी छु, जो यौन उत्पीडनको खुलासा गरेपछि बेपत्ता छिन् । कसैको आवाज दबाउनु कुनै पनि अर्थमा सही होइन । अहिलेको स्थितिलाई लिएर म स्तब्ध छु । म उसका लागि अझै माया र आसाका किरण पठाइरहेकी छु ।’

पूर्व नम्बर १ खेलाडी २४ वर्षीया ओसाकाले पेङ र उनको परिवार सुरक्षित र ठीकठाक हाेला भनी आसा र कामना व्यक्त गरेकी छन् । संसारका नम्बर १ खेलाडी नोभाक जोकोविचसहित अन्य शीर्ष पुरुष र महिला खेलाडी, प्रोफेसनल टेनिस टुरको आयोजक डब्लुटीए र एटीपीलगायतले दुई पल्टकी ग्राण्डस्लाम च्याम्पियनको आरोपीमाथि विस्तृत छानबिनको माग गरेका छन् ।

प्रकाशित मिति: बिहीबार, मंसिर २, २०७८ १४:३६