अस्ट्रेलियन ओपन: चिनियाँ टेनिस स्टार पेङ सुआईको नाम लेखिएकाे टिसर्टमा प्रतिबन्ध, मार्टिनाले गरिन् निन्दा

अस्ट्रेलियन ओपन: चिनियाँ टेनिस स्टार पेङ सुआईको नाम लेखिएकाे टिसर्टमा प्रतिबन्ध, मार्टिनाले गरिन् निन्दा

A+ A A-

अस्ट्रेलियन ओपनका आयोजकले चिनियाँ खेलाडी पेङ सुआईको समर्थनअंकित टि–सर्टमा लगाएको प्रतिबन्धको पूर्वटेनिस स्टार मार्टिना नाभरातिलोभाले निन्दा गरेकी छन् ।

पूर्वविश्व महिला नम्बर एक टेनिस खेलाडी मार्टिनाले ट्वीट गर्दै टेनिस अस्ट्रेलियाको निर्णयप्रति आपत्ति जनाएकी हुन् । यस्तो निर्णयलाई उनले ‘दयनीय’ भनेकी छन् ।

That’s just pathetic. The @wta stands pretty much alone on this!!!#WhereisPengShuai https://t.co/V9g2GZh5Px
— Martina Navratilova (@Martina) January 23, 2022

गत शुक्रबार सुरक्षा कर्मचारीले मैदान प्रवेश गर्न लागेका दर्शकहरूलाई टि–सर्ट खोल्न भन्दै सोधेका थिए, ‘पेङ सुआई खै ?’

चीनका पूर्वउपप्रधानमन्त्री झाङ गाओलीविरुद्ध यौन उत्पीडनको आरोप लगाएपछि गत नोभेम्बरमा चिनियाँ टेनिस स्टार पेङ दुई हप्ता बेपत्ता भएकी थिइन् । उनी फेरि देखिए पनि कैयौँ शुभचिन्तक उनको बारेमा चिन्तित छन् ।

अस्ट्रिेलियन ओपनको आयोजक संस्था टेनिस अस्ट्रेलियाले पेङ सुआईको सुरक्षा आफ्नो प्राथमिक चिन्ता भएको बताएको छ । यद्यपि, विज्ञप्तिमा टी–सर्ट र ब्यानर जफत गर्ने आफ्नो फैसलाको उसले बचाउ गरेको छ ।

‘प्रवेशको टिकट सर्तअनुसार हामी व्यापारिक वा राजनीतिक कुनै कपडा, ब्यानर वा संकेतलाई अनुमति दिँदैनौँ’, उसले भनेको छ ।

गत नाेभेम्बरमा राजनीतिज्ञ झाङले आफूलाई यौन सम्बन्धका लागि बाध्य पारेको आरोप लगाएलगत्तै पेङ गायब भएकी थिइन् ।

सामाजिक सञ्जालमा ३५ वर्षीया पेङले शेयर गरेको पोस्टअनुसार घटना तीन वर्षअघिको हो । बेइजिङमा झाङ र उनकी पत्नीले टेनिस म्याचको प्रबन्ध मिलाएका थिए । म्याचपछि पेङलाई झाङले आफ्नो घर लिएर गए अनि कोठामा लगेर यौन उत्पीडन गरे ।

त्यो दिनभर आफू डराएको पेङले लेखेकी थिइन् । सात वर्षअघि पनि आफूलाई झाङले यौनसम्बन्धका लागि बाध्य पारेको कुरा पेङले खुलासा गरेकी थिइन् ।

तर, यस्तो पोस्ट शेयर गरेको केही बेरमै हटाइएको थियो । अनि पेङको सामाजिक सञ्जालको खातासमेत निस्कृय पारिएकाे थियाे । चिनियाँ अधिकारीहरूले देशकी टेनिस खेलाडीले पूर्वसरकारी अधिकारीमाथि लगाएको यौन उत्पीडनको आरोपबारे बहस गर्न रोक लगाएका थिए ।

सम्पर्कविहीन पेङको अवस्था सार्वजनिक गर्न संसारका शीर्ष खेलाडी, खेलसम्बद्ध निकाय, संगठनहरूले दबाब दिएपछि करिब दुई सातापछि उनी देखिएकी थिइन् ।

प्रकाशित मिति: सोमबार, माघ १०, २०७८ १४:५१