‘रियालिटी शो’ का विजेता 'रियल लाइफ'मा किन चम्केनन् ?

A+ A A-

गत बुधबार अभिनेत्री प्रियंका कार्कीको युट्युब च्यानलबाट प्रसारण भएको ‘चपचप डायरिज’ कार्यक्रममा अतिथि थिइन्– ‘नेपाल आइडल –३’ की विजेता सज्जा चौलागाईं ।

प्रियंकाले कार्यक्रममा उनलाई एउटा जिज्ञासा राखिन्, ‘नेपाल आइडलमा विजेता हुँदा सज्जा चर्चामा थियौ । तर, विजेता भइसकेपछि जुन अपेक्षा थियो, त्यो मिट गरेनौ भन्ने प्रश्न आएको छ । किन सेलाएजस्तो भएको त्यसपछि ?’

सज्जाले आफ्ना शुभचिन्तकहरूबाट यो प्रश्न नियमित सामना गरिरहनुपरेकाे छ । उनी स्वीकार्छिन्, ‘मप्रति आशा राख्नेहरूको अपेक्षा पूरा गर्न सकिनँ ।'

‘नेपाल आइडल–३’ विजेता बन्नुअघि सज्जासँग थुप्रै योजना थिए । सपना थिए । रियालिटी शोमा उपाधि चुमेकी सज्जाले ‘रियल लाइफ’मा आफूलाई प्रमाणित गर्न भने सकेकी छैनन् । ‘उपाधि जितेपछि म यस्तो गर्छु, धेरै मान्छे भेटेर नयाँ गीतमा काम गर्छुजस्तो लाग्थ्यो,' अभिनेत्री प्रियंकासँग चिन्तित हुँदै सज्जा भन्छिन्, 'जितेपछि केही भएन । आफ्नो अपेक्षा र अठाेट पूरा भएको छैन । चिन्ता लाग्छ ।'

रियालिटी शोपछिको यात्रा किन सोचेजस्तो भएन त ?

कोभिड महामारीलाई सज्जा आफ्नो यात्रा अघि नबढ्नुको प्रमुख कारण ठान्छिन् । ‘विजेता हुँदासम्म कोभिड महामारी सकिएकै थिएन । विदेश जान पाइएन । घरै बसियो, बाहिर निस्कन पाइनँ । धेरै मान्छे पनि चिनेको छैन,’ सज्जा भन्छिन् ।

बरू आफूसँगै प्रतिस्पर्धामा आएका साथीहरूको चर्चा र उपलब्धि देख्दा दंग छिन् सज्जा । उनीहरूसँग तुलना गर्दै शुभचिन्तकहरूको म्यासेज आउँछ, ‘त्यत्रो भोट दिएर जितायौँ । तर जितिसकेपछि केही गरेनौ ।’

‘आइडल ठूलो खालको फ्रेन्चाइज शो हो, यसपछि त मलाई आफूले चाहेजस्ता गीत आऊलान् भन्ने सोचेकी थिएँ । तर त्यस्तो अफर आएन । आफूले बनाउन खोज्दा पनि अप्ठेराहरू आए । गुडलक भन्ने कि ब्याडलक ! तिमीलाई समयले धोका दिएको हो भन्छन् सबैले,’ सज्जा सुनाउँछिन् ।

यसबीचमा सज्जाको एउटा अनुभव पनि रह्यो, ‘चम्कियो भने सबैले खोज्दा रहेछन् । सेलायो भने सीमित मान्छेले मात्र साेध्दा रहेछन् ।’

सज्जा मात्र होइन, ‘रियालिटी शो’मा विजेता बनेका अधिकांश कलाकार सांगीतिक यात्रामा जम्न सकिरहेका छैनन् । ‘नेपाल आइडल– १’का विजेता बुद्ध लामा रियालिटी शोमा जसरी जमेका थिए, त्यसपछिको सांगीतिक यात्रामा उनले त्यो चर्चा कायम राखिरहन सकेनन् ।

समय–समयमा उनका गीतहरू रिलिज त भइरहेका हुन्छन् । तर, आमदर्शक/स्रोताको प्रशंसा र प्रतिक्रिया अपेक्षाकृत ढंगले कमाउन सकिरहेका छैनन् । भ्युजको हिसाबमा दुई वर्षअघि रिलिज भएको ‘मेरी आमा’ बोलको गीतलाई ८३ लाख पटक हेरिएको छ । अरु गीतमा न भ्युज छ, न चर्चा । बुद्धलाई स्थापित गराउने गीत आमस्रोताले अझै पाउन सकिरहेका छैनन् ।

बुद्ध आगामी दिनमा भने ‘नेक्स्ट लेभल’का काम गर्न खोजिरहेको बताउँछन् । ‘म लामो रेसको घोडा हुँ । अपेक्षा पूरा भएन भने केही समय पर्खनुस् । केही नयाँ काम छिट्टै ल्याउँदैछु,’ उनी शुभचिन्तकलाई आश्वस्त पार्छन् ।

‘नेपाल आइडल–२’का विजेता रवि वड सांगीतिक क्षेत्रमा सक्रिय त छन् । तर, उनी पनि रियालिटी शोभन्दा बाहिर गएर जम्न सकिरहेका छैनन् । उनी न चर्चामा छन्, न स्थापित संगीतकारको रोजाइमा ।

‘भ्वाइस अफ नेपाल–१’का विजेता सिडी विजय अधिकारी, सिजन–२ का राम लिम्बू र ३ का किरण गजमेरको पनि रियालिटी शो मा रहँदाजस्तो क्रेज अहिले छैन ।

‘कमेडी च्याम्पियन–१’ का विजेता हिमेश पन्तको क्रेज पनि उपाधि चुम्दा बेलाको भन्दा घटेको छ । उनीसँग आशा राख्ने शुभचिन्तक खिन्न छन् । हिमेश युट्युबमा बेला-बेला भिडियोहरू अपलोड गर्छन् । तर, त्यसमा दर्शक तान्न भने सकिरहेका छैनन् । न त भिडियोमा नै हिमेशलाई चिनाउने खालका कन्टेन्ट छन् ।

सिजन–२ को उपाधि चुमेका भरतमणिबाट पनि दर्शकले कुनै नयाँ ‘कन्टेन्ट’ पाउन सकिरहेका छैनन् । कमेडी च्याम्पियनको धङधङीबाहेक अरु केही पस्कन सकिरहेका छैनन् उनीहरूले । हिमेश र भरतमणि मात्र होइन, आस गरिएका अन्य प्रतिस्पर्धीहरूबाट पनि कलाकारिता क्षेत्रमा कुनै सिर्जनशील काम नभएको अग्रज कलाकारहरू बताउँछन् ।

प्रतिस्पर्धाबाट बाहिरिएका ‘रियल लाइफ’मा जमे

रियालिटी शो प्रतिभाहरूका लागि एउटा अवसर हो । तर, त्यो अवसर उपयोग गरेर उपाधि चुम्नेहरूका आ-आफ्नै दुःख छन् । रियालिटी शो काे उपाधिका लागि केवल प्रतिभा अपर्याप्त छ । यसका लागि लाखौँ पैसा खर्च गर्नैपर्छ ।

अचम्म त यो छ कि, रियालिटी शोका विजेताभन्दा प्रतिस्पर्धाबाट बाहिरिएकाले नै सांगीतिक क्षेत्रमा आफ्नो प्रभाव विस्तार गरिरहेकाे देख्न सकिन्छ । यसरी प्रभाव छाड्नेहरूमा कोही भोटका कारण बाहिरिएकाहरू छन् त कोही निर्णायकको छनोटमा नपरेकाहरू ।

गायक सुजन चापागाईंले गाएका प्रत्येक गीतले युट्युबमा भ्युज मात्र होइन, दर्शक/स्रोताको प्रतिक्रिया पनि राम्रै बटुल्छन् । सुजनले डेढ वर्षअघि गायिका विद्या तिवारीसँग गाएको गीत ‘तीनपाते’को चर्चा अझै सेलाएको छैन ।

सुजन चापागाईं : रियालिटी शोमा फ्लप, सांगीतिक करिअरमा सुपरहिट

त्यसपछि ‘लजाएर’, ‘गाला पुक्क’, ‘वाफ’मार्फत उनले अत्यधिक चर्चा बटुले । सांगीतिकक्षेत्रमा अहिले उनको क्रेज बढ्दो छ । उनका जादुमयी आवाजका प्रशंसकहरू पनि थुप्रै छन् ।

तर, उनै गायक सुजन कुनै बेला नेपाल आइडलमा प्रतिस्पर्धी भएर गएका थिए । सुजनले नेपाल आइडलको सिजन १ देखि ३ सम्म भाग लिए । ‘सुजनलाई हामीले सिजन वान र टुमा चिनेनौँ,’ संगीतकार कालिप्रसाद बाँस्कोटाले ‘अन इयर विथ सञ्जय’ नामक कार्यक्रममा भनेका थिए, ‘तेस्रो सिजनको डिजिटल अडिसनमा सुजन छानिए । तर, उनी टपमा आउँदा सेलेक्ट भएनन् ।’

सुजनले आफ्नै गीतहरूमा काम गर्न थालेपछि भने आश्चर्य नै भयो । जब उनका काम र आवाजको तारिफ हुन थाल्यो, नेपाल आइडलका निर्णायकहरूमाथि गाली ओइरिन थाल्यो । संख्यात्मक हिसाबमा सुजनका गीत कम छन्, तर अधिकांशले प्रशंसा बटुलेका छन् ।

‘नेपाल आइडल-३’ मा उत्कृष्ट ८ बाट बाहिरिएकी गायिका रचना रिमालको क्रेज पनि अहिले लोभलाग्दो छ । उनी नेपाली सांगीतिक क्षेत्रमा निकै व्यस्त गायिकाको रूपमा चिनिन्छिन् । धेरै संगीतकारको रोजाइ र खोजीमा पर्छिन् रचना ।

रचन रिमालः बिहान सुटिङ, दिउँसो रेकर्डिङ, फेरि लिप्सिङ पनि !

नेपाल आइडलबाट बाहिरिएलगत्तै रचनाले कवि माधवप्रसाद घिमिरेको शब्द रहेको ‘उनको प्रीति पहिले’ गीत प्रविन बेडवालसँग गाएकी थिइन् । नारायण रायमाझीले संगीत भरेको उक्त गीतले रचनाका प्रशंसक एक्कासि बढाइदियो ।

शिशिर भण्डारीको शब्द/संगीत रहेको गीत ‘फोटो फिरिममा’ गाएपछि रचनाको गायकीको तारिफ झनै बढ्न थाल्यो । अहिलेसम्म उनले एक हजारभन्दा बढी गीतमा आवाज दिइसकेकी छन् ।

रियालिटी शोको उपाधि नचुमे पनि सांगीतिक क्षेत्रमा चम्किरहेकी अर्की गायिका हुन् इन्दिरा जोशी । रियालिटी शो ‘नेपाली तारा-१’ टप ५ मा सीमित भएकी इन्दिरा सांगीतिक क्षेत्रमा भने निकै चम्किइन् । इन्दिराका चौबन्दी चोली, बेहुली, टुट्यो तारालगायत धेरै गीत चर्चित छन् ।

पछिल्लो समय उनी आफैँ रियालिटी शो मा निर्णायकसमेत भएकी छन् । नेपाल आइडलको सिजन ३ सम्म निर्णायकको रूपमा रहेकी इन्दिरा अहिले ‘सारेगमप लिटिल च्याम्स’मा पनि निणार्यकको भूमिकामा छिन् ।

‘नेपाल आइडल–२’को थर्ड रनरअप भएकी अस्मिता अधिकारी सांगीतिक क्षेत्रमा चम्किरहेकी छन् । उनका गीतहरू आम मानिसको रोजाइमा परिरहन्छन् । पछिल्लो समय ‘टाढा भए पनि, रमरम मारौटी, काफल काम्ला, लजावती झारजस्तै लजाउँछौ’ लगायतका थुप्रै गीत चर्चामा छन् ।

अस्मिताको सपना र सङ्घर्ष

‘नेपाल आइडल–१’ मा उपाधि नचुमे पनि गायक निशान भट्टराईले सांगीतिक क्षेत्रमा सफलता चुमिरहेका छन् । उनी संगीतकार र दर्शक/स्रोताको रोजाइमा परिरहेकै हुन्छन् । निशानको पछिल्लो समय एलिना चौहानसँगको युगल आवाजमा रहेको गीत ‘के माया लाग्छ र’ र ‘भुन्टी’ गीत निकै चर्चा बुटुलेका थिए ।

गायक प्रताप दास पनि सांगीतिक क्षेत्रमा जमिरहेको नाम हो । सिजन वानमा उनी तेस्रो भएका थिए । लकडाउनको समयमा प्रतापका कमर्सियल गीतले राम्रो बजार पिटे । अहिले पनि प्रतापको आवाजमा महिनाको ३०/४० वटा गीत रेकर्ड हुन्छन् । पछिल्लो पटक प्रताप र प्रविशा अधिकारीको आवाजमा रहेको गीत ‘फूल हैन’ युट्युबमा ६ करोडभन्दा बढी पटक हेरिएको छ । त्यसैगरी प्रविशासँगकै ‘हार युग होस्’ बोलको गीत पनि दर्शकले रुचाए ।

निर्णायक भन्छन्– ‘रियालिटी शो’ लाई सिरियस नलिऊँ

‘द भ्वाइस अफ नेपाल’का निर्णायक गायक दीप श्रेष्ठ रियालिटी शोमा विजेता भएकाहरू ‘अभागी’ भएको तर्क गर्छन् । ‘कति भाइबहिनी अनलक्की भए, कोभिडका कारण बाहिर जान पनि पाएनन् । सोचेजस्तो गर्न पनि पाएनन्,’ दीप भन्छन् ।

महामारी नै कारक हुन्थ्यो भने प्रतिस्पर्धाबाट बाहिरिएका सहभागीचाहिँ कसरी जमे त ?

दीप भन्छन्, ‘सांगीतिक यात्रामा जम्न नसक्नुको कारणचाहिँ आधुनिक गीत आममानिसले कम मन पराउनु हो । रक सिङ्गरको प्रस्तुति बाहिर धेरै देखिन्छ । रियालिटी शोमा जितेका धेरैलाई रक सिङ्गिङ म्याच गर्दैन ।’

नेपाल आइडलको सिजन तीनसम्म निर्णायक रहेका संगीतकार कालिप्रसाद बाँस्कोटा वास्तवमा कलाको प्रतिस्पर्धा नै नहुने मत राख्छन् । ट्यालेन्ट भएर मात्र अगाडि बढ्न नसकिने उनको मत छ । ‘रियालिटी शोमा विजेता भएकाहरूको हकमा पनि त्यही भएको हो,’ उनी भन्छन् ।

नेपालमा पछिल्लो समय रियालिटी शोको क्रेज बढ्दै गइरहेको छ । कालिप्रसाद रियालिटी शो नै सबथोक हो भन्ने भ्रमबाट मुक्त हुन आग्रह गर्छन् । ‘रियालिटी शो भनेको एउटा सानो पाटो मात्र हो । यसलाई सिरियस रूपमा लिनुपर्दैन । रियालिटी शो जितेर गएको मान्छे बाहिर गएर जम्छ भन्ने छैन । बाहिरको फ्याक्ट अर्कै हुन्छ । तपाईंमा कति प्यासन छ भन्ने कुराले अर्थ राख्छ,’ कालिप्रसाद भन्छन् ।

रियालिटी शोमा प्रतिभाकै कारण जितिन्छ भन्ने कुरामा कालिप्रसाद सहमत छैनन् । ‘प्रतिस्पर्धीलाई प्रतिभाका आधारमा भोट हालिन्न । जातका आधारमा हालिन्छ । क्षेत्रका आधारमा हालिन्छ । अझ कतिले प्रतिस्पर्धी क्युट भएकै आधारमा पनि भोट हालिदिन्छन्,’ कालिप्रसाद भन्छन् ।

‘विजेताहरूबाट रिजल्ट देखिएको छैन’

निर्देशक प्रदीप भट्टराई कमेडी च्याम्पियन सिजन वान र टु दुवैमा निर्णायक थिए । रियालिटी शो सकिएपछि आासलाग्दा प्रतिस्पर्धीहरूबाट अपेक्षाअनुसारको रिजल्ट नआएको उनी स्वीकार्छन् ।

‘म प्रतिस्पर्धी भाइबहिनीहरूलाई अहिले पनि घचघच्याउँछु । आशा गरेअनुसार उनीहरूबाट रिजल्ट पाउन सकेको छैन । मेरो पनि उनीहरूसँग गुनासो छ,’ प्रदीप भन्छन् ।

किन देखिएन त ?

‘पहिला हप्तैपिच्छे स्क्रिप्ट लेख्दा खारिएर आउँथे । जब प्राक्टिस गर्न छाडिन्छ, निखारता कम हुँदै जान्छ । उनीहरूको हकमा यस्तै भयो,’ प्रदीप भन्छन् । प्रदीपको विचारमा निश्चित समयसम्मको उद्देश्य बोकेको मानिसले उद्देश्य पूर्ति भइञ्जेल मात्र काम गर्छ । कमेडी च्याम्पियन प्रतिस्पर्धीहरूका लागि एउटा मिसन थियो । मिसन पूरा नहुञ्जेल उनीहरू दिलो ज्यान दिएर लागे । तर, मिसन सकिएपछि उनीहरूले थप प्रयास नगरेको प्रदीपको बुझाइ छ ।

तर, निश्चित उद्देश्य नराखी निरन्तर काम गरिरहनेहरू भने रियालिटी शोबाहिर जम्न सकिरहेको उनी बताउँछन् । ‘एकथरीचाहिँ निश्चित गोल राख्दैनन् । निरन्तर काम भने गरिरहन्छन् । उनीहरू महामारी आए पनि रोकिएनन् । र, राम्रो प्रोडक्ट निकाल्नमै ध्यान दिए,’ प्रदीप भन्छन् ।

याे पनि..

‘रियालिटी शो’ले रित्याएका प्रतिस्पर्धीहरू : डिप्रेसनको सिकारदेखि आत्महत्याको प्रयाससम्म
‘रियालिटी शाे'काे चमकदमकभित्र छोपिएका बालबालिकाका दारुण कथा

प्रकाशित मिति: आइतबार, माघ ९, २०७८ ०९:३८