बिहान सुटिङ, दिउँसो रेकर्डिङ, फेरि लिप्सिङ पनि !

A+ A A-

'लिप्सिङ भिडियो पनि खिच्ने हो र ? म त एकदमै थाकेकी छु । खाना पनि खाएको छैन । बिहान सुटिङ, अहिले रेकर्डिङ, फेरि लिप्सिङ भिडियो... उफ् !'

मैतीदेवीमा रहेको ओपल रेकर्डिङ स्टुडियोमा पुग्दा गायिका रचना रिमाल केही दिक्क देखिन्थिन् । बिहान आफ्नो एउटा गीतको सुटिङ सकेकी रचना २ बजे ओपल रेकर्डिङ स्टुडियोमा नयाँ गीत रेकर्ड गर्न पुगेकी थिइन् । दिउँसो झण्डै साढे ३ बजे त्यहाँ पुग्दा उनी लिप्सिङ भिडियो खिच्ने तयारीमा देखिन्थिन् ।

उनलाई अर्को रेकर्डिङ पनि भ्याउनु थियो । उक्त रेकर्डिङका लागि ४ बजेको समय दिएकी थिइन् । त्यहीबीचमा उनले शिलापत्रसँग गफिने समय पनि छुट्याएकी थिइन् ।

ओपल रेकर्डिङमा रेकर्ड गरिएको उक्त गीतको लिप्सिङ भिडियो खिच्ने जानकारी रचनालाई थिएन । उनी भन्दै थिइन्, 'लिप्सिङ खिच्ने भनेको भए म त्यहीअनुसार तयार हुन्थेँ नि !'

३ फ्रेमबाट रचनाको लिप्सिङ खिचियो । त्यसबेलासम्म उनलाई अर्को रेकर्डिङ स्टुडियो पुग्न हतार भइसकेको थियो ।

साँच्चिकै अहिले रचनाको व्यस्तता व्यापक नै छ । उनलाई रेकर्डिङदेखि भिडियो छायाङ्कनसम्म दौडधुप छ ।

०००

झापा भद्रपुरको सामान्य परिवारमा जन्मिएका रचनालाई सानो उमेरदेखि नै गायनमा रुचि थियो । कक्षा ४ मा पुगेपछि रचनाले विद्यायस्तरीय प्रतियोगितामा ५ सय रुपैयाँ पुरस्कार पाइन् ।

उक्त ५ सय रुपैयाँ पुरस्कारले रचनालाई सङ्गीतमा विशेष आकर्षित गरायो । त्यसपश्चात् उनले विद्यालयस्तरीय विभिन्न प्रतियोगिताहरूमा गाउन थालिन् ।

कक्षा ८ मा पुगेपछि रचनाले हार्मोनियम जितिन् । त्यसपश्चात् झनै सङ्गीतको भूत चढ्यो उनमा । उनी हार्मोनियमा 'सरेगमप...' गाउन थालिन् ।

परिवारका सबै सदस्य काममा व्यस्त हुन्थे । रचना पनि बिर्तामोडको एउटा चोकमा चटपटे बेच्न थालिन् ।

चटपटे बेच्ने रचनाले राम्रो र मीठो गाउने केही युट्युबरहरूले पत्तो पाए । त्यसैले रचनाले चटपटे बनाइरहेको समयमा नै त्यहाँ पुगेर युट्युबरले अन्तर्वार्ता लिए अनि रचना 'चटपटेवाली गायिका' नामले भाइरल भइन् ।

उनले केही युट्युबमा 'चटपटेवाली' गायिका भएर नै अन्तर्वार्ता दिइन् तर उनको रहर चटपटेवाली गायिका बन्ने होइन, 'नेपालको नम्बर १ गायिका रचना' बन्ने छँदै थियो ।

यात्रा नेपाल आइडलतर्फ

रचना चटपटे बनाइरहेकी थिइन् । त्यहीँबाट एक जना व्यक्तिले नेपाल आइडलका जज न्ह्यू बज्राचार्यलाई फोन गरेर रचनाको विषयमा जानकारी दिन्छन् । रचना र न्ह्यूबीच फोनवार्ता हुन्छ ।

रचनाले फोनबाट नै न्ह्यूलाई गीत सुनाउँछिन् । गीत नसकिँदै न्ह्यू रचनाकै अगाडि आइपुग्छन्, 'राम्रो छ राम्रो । तिमीले राम्रो गायौ ।'

आफूलाई मनपर्ने जज नै आफ्नो अगाडि देख्दा रचना आश्चर्यमा पर्छिन् । हेरेको हेर्‍यै हुन्छिन् । नेपाल आइडलको सेटमा मात्र भेटिने जज पहिलो पटक कोही प्रतियोगीको घरसम्म पुगेका थिए ।

रचनालाई भेटेपछि न्ह्यूले गितार बजाए । रचना केही गुनगुनाइन्- 'मन, किन रुन्छ यो मन... ।' न्ह्यूले रचनालाई स्टुडियोमा भेट्ने प्रतिवद्धता जनाएर फर्किए ।

स्टुडियोमा अडिसन दिँदा रचना केही डराइन् । जजहरूले भने, 'तिमी गोल्डेन माइक पाउने प्रतिभा हौ तर डरायौ ।'

जे होस्, रचना छनोट भने भइन् ।

नेपाल आइडल तेस्रो सिजनको दाबेदारका रूपमा भित्रिएकी रचनाको नेपाल आइडलको यात्रा लामो भने भएन । तर, छोटो यात्राबाट नै रचनाले धेरै फ्यान-फलोअर्स कमाइसकेकी थिइन्, जुन कुराको पुष्टि उनी बाहिरिनुभन्दा अगाडि आएको सबैभन्दा धेरै भोटले नै पुष्टि गर्छ ।

नेपाल आइडलको टप ८ बाट बाहिरिएकी रचनालाई बाहिरिँदा कुनै पछुतो भने छैन । आफ्नै गल्तीले बाहिरिएकाले आफूलाई पछुतो नभएको रचना बताउँछिन् ।

उनले भनिन्, 'पछिल्लो समय ममा कन्फिडेन्स नै थिएन । गाउन थाल्यो कि डरले काँप्न थाल्थेँ, जसले गर्दा राम्रोसँग गाउन सकिनँ । त्यसैले निस्किएँ । यसमा मलाई गुनासो छैन ।'

रचना जतिजति माथि पुगिन्, उतिउति डरको पारो पनि बढ्दै गएको थियो । त्यसैले रचनाले पछिल्ला केही एपिसोडहरूमा राम्रो प्रस्तुति दिन सकेकी थिइनन् ।

०००

नेपाल आइडलबाट बाहिरिएसँगै रचना झनै हिट भइन्, त्यो पनि आफ्नै गीतबाट ।

सञ्चारकर्मी शिशिर भण्डारी एउटा गीत निकाल्ने तयारीमा थिए । त्यसका लागि शिशिरले को गायिका राख्ने भनेर सामाजिक सञ्जालमा प्रश्न गरेका थिए, जसमा धेरैले रचनाको नाम सुझाए ।

नेपाल आइडलबाट भर्खरै बाहिरिएकी रचनालाई लिएर गीत गरे राम्रै हुने सोचेर शिशिरले रचनालाई अफर गरे । रचनाले पनि निर्धक्क गाइन्, 'फोटो फिरिममा, कहिले मिलन कहिले बिछोड माया पिरिममा... ।'

यो गीत सर्वाधिक हिट भयो । धेरैले रचनाको प्रशंसा गरे ।

दर्शक/श्रोताको मात्र होइन, रचनाले सङ्गीत क्षेत्रकै व्यक्तिहरूको मन जितिन् । त्यसैले पनि अहिले धेरै सङ्गीतकारको रोजाइमा परेकी छन्, रचना ।

'फोटो फिरिममा' नै रचनाको पहिलो गीत भने होइन । रचनाले यसअघि पनि गीत रेकर्ड गराइसकेकी थिइन् । रचनाले वसन्त सापकोटाको सङ्गीतमा तयार भएको 'रुमाल चिनो' बोलको गीतबाट गायनमा डेब्यू गरेकी हुन् ।

०००

एक दिन रचनाको फेसबुकमा म्यासेज आयो । उक्त म्यासेज अरू कसैको नभएर सङ्गीत क्षेत्रका प्रतिष्ठित सङ्गीतकार वसन्त सापकोटाको थियो । वसन्तले रचनालाई गीत रेकर्ड गराउने अफर गरेका थिए ।

रचनाको नेपाल आइडलको यात्रा सुरु भएको थिएन तर 'चटपटेवाली गायिका' भनेर नाम बनिसकेको थियो । सापकोटाले पनि रचनाको जादूमयी स्वर सुन्न भ्याएका थिए । त्यसैले रचनालाई अवसर दिने सोच पलाएको थियो सापकोटामा ।

रचनाले 'नाइँ' भन्ने कुरै थिएन । 'हुन्छ' भनेर जवाफ फर्काइन् ।
त्यस समय रचना १० कक्षाको त्रैमासिक परिक्षा दिइरहेकी थिइन् । उनले बाँकी परिक्षा नै नदिई काठमाडौं छिरिन् । मनमा छुट्टै उत्साह थियो- 'म पनि अब गीत रेकर्डिङ गराउन पाउँछु' भन्ने ।

रचनालाई स्टुडियोका बारेमा खासै जानकारी थिएन । कसरी गीत रेकर्डिङ हुन्छ भन्नेसमेत पत्तो थिएन । तर पनि भित्रैदेखि गर्न सक्छु भन्ने आँट थियो ।

आखिर के नै गाह्रो रहेछ र ? रचनाले केही बेरमा नै गीतको रेकर्डिङ सकिन् । सङ्गीतकारबाट प्रशंसा पनि पाइन् ।
रचना भन्छिन्, 'धेरै नै गाह्रो होला भन्ने सोचेकी थिएँ तर दुई-तीन पटक गाउनेवित्तिकै ओके भएको थियो ।'

रचनाले देखेको सपना

धेरै समय भएको छैन, रचनाको दैनिकी बिर्तामोडको चोकमा चटपटे बनाउँदैमा बित्थ्यो । अहिले उनलाई रेकर्डिङ स्टुडियोमा बितिरहेको छ ।

रचनाले यति छिट्टै यस्तो व्यस्त हुन्छु भन्ने सोचेकी थिइनन् । उनी भन्छिन्, 'नेपाल आइडलमा नै गएपछि पनि १-२ वटा गीत पाउँछु होला भन्ने थियो । तर, मैले त अहिले दिनमा नै २-३ वटा गीत रेकर्ड गराउनुपरेको छ । यस्तो होला भन्नेचाहिँ सोचेकी थिइनँ ।'

रचनालाई आफ्नो परिचय फेर्ने सपना थियो । उनलाई 'चटपटेवाली गायिका'बाट 'गायिका रचना रिमाल' बन्नु थियो । अहिले त्यो सपना पनि पूरा हुँदै गरेको रचनाले बुझेकी छन् ।

'मैले नेपाल आइडलमा आउँदा पनि मेरो नामले चिनाउने मन छ भनेको थिएँ । अहिले त धेरैले रचना रिमाल नै भनेर चिन्न थाल्नुभएको छ', रचना केेेही खुसी सुनिन्छिन् ।

रचनाको केही सपना पूरा भए पनि उनले देखेका २ वटा सपना पूरा भएका छैनन् । पहिलो- चलचित्रमा गीत गाउने र दोस्रो- आमाबुबाका लागि ठूलो घर बनाउने ।

कलिलो उमेरमा नै यतिको सफल र व्यस्त रहेकी रचनाका लागि बाँकी २ सपना पनि पूरा हुन्, कामना !

प्रकाशित मिति: शनिबार, साउन १०, २०७७ ०८:१४