सुजन चापागाईं : रियालिटी शोमा फ्लप, सांगीतिक करिअरमा सुपरहिट

A+ A A-

हिजोआज प्रतिभावान् व्यक्तिलाई प्रतिभा देखाउन गाह्रो छैन । गाउन जान्नेलाई गायन रियालिटी शोका अनेक मन्च उपलब्ध छन् । नाच्न जान्नेलाई नृत्यका रियालिटी शो छन् । हँसाउनेदेखि साहसिक काम रुचाउने व्यक्तिहरूका लागि पनि रियालिटी शोको प्लेटफर्म उपलब्ध छन् ।

रियालिटी शोमा पुगेका प्रतियोगीहरूको एउटै चाहना हुन्छ- 'आफूलाई चिनाउने ।' त्यो दौरानमा कतिपयले आफ्नो सपना पूरा गर्न सक्छन् । कतिपयको चाहना सपना मात्र बनिदिन्छ ।

अरु प्रतियोगीजस्तै चितवनका सुजन चापागाईं नेपाल आइडलको पहिलो सिजनमा भाग लिन पुगे । तर, अडिसनपश्चात् परीक्षाका कारण उनले पहिलो सिजनमा प्रतिस्पर्धा गर्न पाएनन् ।

प्रतिस्पर्धा नै नभई बाहिरिनुपर्दा सुजनलाई रियालिटी शोको भोक मरेको थिएन । त्यसैले, सुजनले थप मिहिनेत गरेर तेस्रो सिजनमा सहभागी हुने सोच बनाए । डिजिटल अडिसनमा राम्रो तारिफ पाएर छनोट पनि भए । विडम्बना, तेस्रो सिजनको अन्तिम ३० मा पुगेपछि उनी बाहिरिए ।

जित्छु नै भन्ने सोच बनाएर नेपाल आइडल पुगेका सुजनले रियालिटी शोको प्रतिस्पर्धाबाट केही सिक्न भने पाए । उनी भन्छन्, 'स्टेजमा पुगेर जजहरूको अगाडि गाउनु भनेको एक लेभल अप हुनु हो । त्यहाँको अनुभवले धेरै कुरा सिकाउँछ । प्रोत्साहित गर्छ ।'

यति भन्दै गर्दा सुजन रियालिटी शोमा फ्लप भएको कुरालाई नकार्दैनन् ।

रियालिटी शोको प्रतिस्पर्धामा फ्लप बनेका सुजन उनै हुन्, जो अहिले सांगीतिक क्षेत्रमा आफूलाई अब्बल रूपमा प्रस्तुत गरिरहेका छन् । 'तीनपाते', 'गाला पुक्क', 'लजाएर', 'वाफ' जस्ता गीत सार्वजनिक गरेका सुजन सांगीतिक करिअरमा सुपरहिट भइसकेका छन् । उनका गीतले युट्युबमा करोडौँ भ्युज बटुलिसकेका छन् ।

नसोचेको सफलता

सुजनले 'तीनपाते' बोलको गीतबाट संगीतिक क्षेत्रमा डेब्यु मारे । उनको डेब्यु नै धमकेदार भइदियो ।

'तीनपाते'को म्युजिक भिडियो युट्युबमा अपलोड भएसँगै यसको चौतर्फी चर्चा सुरु भयो । दर्शक/स्रोतादेखि सांगीतिकक्षेत्रकै व्यक्तिहरूले गीत र भिडियो दुवै पक्षको तारिफ गरे । गीतमा हर्क साउदले शब्द लेखेका थिए भने संगीतको काम सुजनले नै गरेका थिए । गायनमा सुजनलाई विद्या तिवारीले साथ दिएकी छिन् ।

के सुजनले गीत बनाउँदा यो चर्चा सोचेका थिए त ?

'अहँ, सफल वा असफलबारे केही सोचेको थिइनँ', सुजनले भने, 'गीत र भिडियोमा हामीले मिहिनेत गरेका थियौँ । मिहिनेतअनुसार राम्रै काम भएको थियो । त्‍यसैले मन पराउनुहुन्छ होला भन्नेचाहिँ लागेको थियो ।'

सुजनका लागि सफलता उति महत्त्वपूर्ण पनि थिएन । उनको ध्येय टिमवर्क गरेर राम्रो काम दिऊँ भन्ने थियो । अडियो र भिडियो दुवैमा टिमवर्क जम्यो । फलत: हिट भयो, 'तीनपाते' । जसले युट्युबमा २ करोडको हाराहारीमा भ्युज बटुलेको छ ।

रिलिजको हिसाबमा 'गाला पुक्क' सुजनको दोस्रो गीत हो । तर, यो गीत सुजनले 'तीनपाते'भन्दा अगाडि नै बनाएका थिए ।

'गाला पुक्क' चलिआएको पपशैलीका गीतभन्दा भिन्न थियो । सैलेश गिरीले लेखेको शब्दलाई सुजनले लोकलय मिलाएर मीठो धुन तयार गरे । अनि आफैँले आवाज दिए । लिरिकल भिडियो मात्रै बनेको यस गीतले पनि युट्युबमा १ करोड ६० लाखभन्दा बढी भ्युज पाएको छ ।

सुजनको तेस्रो गीत हो, 'लजाएर' ।

'लजाएर' पनि दर्शक/स्रोताको प्रिय बन्यो । रोमान्टिक शैलीमा बनेको यस गीतलाई धेरैले रुचाए । यस गीतको चर्चासँगै सुजनले सफलताको ह्याट्रिक मारे ।

पछिल्लो समय सर्वाधिक रुचाइएको गीत हो, 'वाफ' । यो सुजनको चौथो गीत हो ।

'वाफ'ले पनि अडियो र भिडियो दुवै पक्षबाट तारिफ पाइरहेको छ । गीतका शब्द र भिडियोमा देखाइएको कथालाई दर्शक/स्रोताले रुचाएका छन् । सुजनले तयार गरेको मीठो धुनले धेरैको मन जितेको छ । यस गीत गायनमा पनि सुजनलाई विद्याले साथ दिएकी छिन् ।

युट्युबमा अपलोड भएको एक महिना पुग्दा भिडियोले युट्युबमा २५ लाख भ्युज पार गरिसकेको छ ।

लगातार आफ्ना गीतहरू सफल हुँदा को खुसी नहोला र ? आफूले गरेको कामलाई दर्शक/स्रोताले रुचाइदिँदा सुजन पनि दंग छन् । उनी भन्छन्, 'हाम्रा गीतहरूलाई ढिलो-चाडो दर्शक/स्रोताले रुचाइदिनुहुन्छ । त्यसले मलाई एक किसिमको ऊर्जा दिन्छ । दर्शकको मायाले नै अझ राम्रो काम गर्ने प्रोत्साहन मिलिरहेको छ ।

सफलतामा दंग परेर मात्र हुन्न, त्योसँगै आउने चुनौतीलाई पनि झेल्नुपर्छ । सुजनमाथि अहिले चुनौतीका चाङ छन् ।

फरक स्वादका गीतहरू पस्किएर दर्शक/स्रोताको मन जितेका सुजनलाई केही नौलो गर्नुपर्ने चुनौती छ । सुजनले पनि यो कुरालाई बुझेका छन् । ‘ममाथि दर्शकको अपेक्षा बढेको छ । त्यसैले मबाट भएका केही कमीकमजोरीहरू सुधार्दै नयाँ राम्रो काम गर्नेछु', सुजनले भने ।

सुजन आगामी दिनहरूमा पनि फरक शैलीका गीतहरू बनाउने कुरामा कटिबद्ध छन् । उनी भन्छन्, ‘मैले काम गर्दा मार्केटलाई हेरेर काम गर्दिनँ । मार्केटले के खोज्छ भन्दा पनि मैले के फरकपन दिन सक्छु भन्ने कुरामा जोड दिने प्रयास गर्नेछु ।’

०००

प्रसंग जोडिहालौँ, सुजन अहिले एक लोकगीतको तयारी गरिरहेका छन् ।

सुजनका अनुसार यो गीत चलिआएका गीतभन्दा फरक छ । उनैले गरेका सिर्जनाहरूभन्दा पनि भिन्न छ । उनी भन्छन्, 'लोकगीतमा पनि केही नौलो गर्न सकिन्छ कि भनेर त्यसको तयारीमा लागिरहेको छु । अहिले चलिरहेको लोकगीतभन्दा पक्कै फरक रूपमा उक्त गीत बन्नेछ ।'

यस गीतका लागि सुजनले तीन महिनादेखि होमवर्क गरिरहेका छन् । लोकगीत नै सुनिरहेका छन्, तीनै गीतहरू गाइरहेका छन् । उनी भन्छन्, 'अहिले त म गाइने नै भएको छु ।'

सुजनलाई लोकगीतमा केही गरौँ भन्ने सोच अहिले आएको होइन । उनलाई पहिलादेखि नै लोकगीतमा केही नयाँ गर्ने रहर थियो । त्यसैलाई साकार पार्न उनी अहिले मिहिनेत गरिरहेका छन् ।

आममानिसको दिमागमा लोकगीतको एउटा छाप बसिसकेको छ । अहिले चलिआएका गीतहरूजस्तो मात्रै लोक हुन्छ भन्ने आमबुझाइ छ । त्यही भिडमा सुजन केही फरक शैलीमा प्रस्तुत हुँदैछन् ।

'लोकगीत हो भन्ने थाहा दिन पनि मानिसमा परेको छापलाई भेट्नैपर्‍यो । त्यो भेट्न खोज्दा कसैसँग मिल्ने हो कि भन्ने कुरामा डर लागिरहेको छ', सुजनले भने, 'लोकगीत बनाउन त साह्रै गाह्रो कुरा हो नि ।'

बचपनदेखिको गायक बन्ने सपना

सुजनलाई बचपनदेखि नै संगीतमा रुचि थियो । गीत सुन्न खुबै रुचाउँथे । आफू पनि गाउन सक्छु भन्ने कुरा उनले त्यो बेला थाहा पाए, जब स्कुलमा भएको गायन प्रतियोगितामा उनी प्रथम बने ।

परिवारदेखि साथी-भाइसम्मले उनको तारिफ गर्थे । आमा आफैँ संगीतप्रेमी भएकाले सुजनलाई आमाले नै गाउन प्रोत्साहित गर्थिन् ।

सुजनले सपना देख्न थाले- 'ठूलो स्टेजमा माइक समातेर गीत गाउने ।'

एसएलसी सकिएलगत्तै सुजनले संगीतका औपचारिक कक्षाहरू लिन सुरु गरे । चिनवनमा नै उनले संगीत सिक्न सुरु गरेका थिए । त्यो समय चितवनमा आयोजना भएको ‘चितवन आइडल’मा सुजन दोस्रो भए । त्यो उपाधिले झनै सुजनमा संगीतको भुत चढाइदियो ।

१२ कक्षाको परीक्षा सकेर सुजन काठमाडौं आए । उनले चण्डी गुरुसँग लामो समय संगीत सिके । गुरुसँग सिकेको ज्ञान उनले गीत बनाउन खर्चिए । अनि त्यहीँ गीत बनाउँदा पनि धेरै कुरा सिक्न पाए ।

सिकाइ, भोगाइ र अभ्यासबाट नै सुजन सांगीतिकक्षेत्रमा स्थापित हुन सके