अस्पतालमा कोरोना संक्रमितको चाप बढ्दै, कति छन् बेड, आईसीयू र भेन्टिलेटर ?

A+ A A-

मंगलबार कोरोनाको संक्रमणदर १८.६ प्रतिशत पुग्यो । अघिल्लो सातासम्म संक्रमणदर २.६ प्रतिशत थियो । स्वास्थ्य तथा जनसंख्या मन्त्रालयको यो तथ्यांकले कोरोनाको नयाँ भेरियन्ट ओमिक्रोन तीव्र गतिमा फैलिइरहेको छ । हाल समुदायमा ओमिक्रोन भेरियन्ट नै घुमिरहेको मन्त्रालयको निचोड छ ।

‘पछिल्लो समय आशंका लागेकोमा ओमिक्रोन देखिएको छ । समुदायमा डेल्टा भेरियन्ट पनि हुनसक्छ । तर, त्यो अनुपात कम होला । छिमेकी देश भारतमा पनि ओमिक्रोन फैलिएको छ । त्यसैले नयाँ भेरियन्टअनुसार व्यवहार गर्नुपर्छ । अब ओमिक्रोन भनेर नै जान्छौँ । यसले रोकथाम र नियन्त्रणमा सहयोग पुग्छ,’ सहप्रवक्ता डा. अधिकारीले भने, ‘हालसम्म २७ जनामा ओमिक्रोन भेरियन्ट पुष्टि भएको छ ।’

ओमिक्रोनलाई रोकथाम गर्न नसकिए चुनौतीपूर्ण अवस्था आउने बताउँछन्, उनी । ‘अस्पतालमा भर्ना हुनेको संख्या बढेको छ । तर जटिल बिरामी भर्ना भएका छैनन् । संक्रमण बढ्दै गयो भने रोग प्रतिरोधात्मक क्षमता कम भएका पनि संक्रमित हुन्छन्,’ उनले भने, ‘समुदायमा संक्रमण रोक्न सकिएन भने चुनौतीपूर्ण अवस्था आउँछ ।’

स्वास्थ्यकर्मीहरू समेत संक्रमित हुने र अस्पतालमा चाप बढ्ने मन्त्रालयको प्रक्षेपण छ । ‘स्वास्थ्यकर्मी पनि संक्रमित हुन्छन् । कोभिड र ननकोभिडको व्यवस्थापन गर्नुपर्ने हुन्छ । त्यस्तो अवस्थामा चुनौती हुन्छ भन्ने प्रक्षेपण छ,’ डा. अधिकारीले भने, ‘रोकथामका लागि जनस्वास्थ्यको मापदण्ड र खोपलाई प्राथमिकता दिने हो । खोपले अस्पताल पुर्‍याउने र मृत्यु हुनलाई कम गराउँछ ।’

तेब्बरले बढे कोरोनाका बिरामी, जतिबेला पनि आउटब्रेक हुन सक्छ

कति छ बेड, आईसीयू र भेन्टिलेटर

अस्पतालहरूमा बिरामीको संख्या बढ्दै गएको छ । संक्रमितको संख्या बढ्दै गएमा संचरना अपुग हुने भन्दै पूर्व तयारी गरिरहेको स्वास्थ्य मन्त्रालयले जनाएको छ । अस्पतालमा बेड, आईसीयू, एचडीयू, भेन्टिलेटर र जनशक्ति तयारी अवस्थामा राखिएको सहप्रवक्ता अधिकारी बताउँछन् ।

मन्त्रालयका अनुसार काठमाडौं उपत्यकामा २ हजार ४ सय ८४ वटा आइसोलेसन बेड, ३ सय २४ वटा एचडीयू बेड, ४ सय ४५ वटा आईसीयू बेड र २५४ वटा भेन्टिलेटर रहेको छ । देशभर आइसोलेसन बेड ८ हजार २ सय २, एचडीयू बेड ३ हजार ८ सय ४६, आईसीयू बेड २ हजार ७ सय ९७, भेन्टिलेटर १ हजार ८, अक्सिजन सिलिन्डर १३ हजार ९ सय ३९, अक्सिजन कन्सन्ट्रेटर ६ सय ९३ वटा, अक्सिजन प्लान्ट १ सय ७ वटा र अक्सिजन ट्याङ्क २५ वटा रहेको मन्त्रालयको तथ्यांक छ ।

संक्रमण बढ्दै गए संरचनाले धान्दैन

यही गतिमा संक्रमण बढ्दै गए अहिलेको संरचनाले नधान्ने बताउँछन्, विज्ञहरू । दिनको १ हजारले बढिरहेको छ । अहिलेको संरचनाले धन्न सक्दैन,’ इपिडिमियोलोजी तथा सरुवा रोग नियन्त्रण महाशाखाका पूर्व निर्देशक डा. बाबुराम मरासिनीले भने, ‘दोस्रो लहरको जस्तै स्थिति नआउला भन्न सकिन्न । औषधि, अत्यावश्यक औषधिको अभाव हुन सक्छ ।’

संक्रमण फैलन नदिन सीमा नाकामा खोप र परीक्षण बढाउनु पर्नेमा उनको जोड छ । ‘सीमामा छाडा छोडिएको छ । यसले ठूलो जोखिम निम्त्याउँछ । सीमामा खोप र पीसीआरको व्यवस्था गर्नुपर्छ,’ उनले भने, ‘मास्क नलगाउनेलाई दण्डित पनि गर्नुपर्छ ।’

जनस्वास्थ्यविद् डा. शरद वन्त तयारीलाई अनावश्यक खर्चका रूपमा सोच्न नहुने बताउँछन् । ‘तयारीलाई अनावश्यक खर्च भनेर सोच्नु हुँदैन । हिजोका दिनमा महामारी कहिले आउँछ, अहिले नै आईसीयू बनाएर बस्ने हो र भन्ने अभिव्यक्ति सुनियो । त्यो गैरजिम्मेवारीपन हो । हस्पिटल बनाउनुपर्छ, आईसीयू बनाउनुपर्छ भनेको होइन । जब अस्पतालमा चाप बढ्न थाल्छ, त्यतिबेला चाहिने आवश्यक संरचनालाई विकास गरेर बस्ने भनेको हो,’ उनले भने ।

यो पनि पढ्नुस् :

प्रकाशित मिति: बुधबार, पुस २८, २०७८ १३:४३