अस्पतालबाट चिकित्सकको चेतावनी : तेब्बरले बढे कोरोनाका बिरामी, जतिबेला पनि आउटब्रेक हुन सक्छ

अस्पतालबाट चिकित्सकको चेतावनी : तेब्बरले बढे कोरोनाका बिरामी, जतिबेला पनि आउटब्रेक हुन सक्छ

A+ A A-

कोभिड युनिफाइड केन्द्रीय अस्पताल (वीर अस्पताल) को नयाँ भवनमा अघिल्लो साता कोरोनाका आठ जना बिरामी भर्ना भएका थिए । तर यो साता भर्ना हुनेको संख्या बढेर २५ पुगेको छ । ‘संक्रमितको संख्या तेब्बरले बढेको छ । २५ जनामध्ये पाँच जनामा कडा लक्षण छ । एक जना भेन्टिलेटरमा हुनुहुन्छ,’ अस्पतालका उपनिर्देशक डा. प्रज्ज्वल श्रेठले भने, ‘यसले कोरोनाको तेस्रो लहरको सँघारमा पुगेको देखाउँछ ।’

अस्पतालमा कोरोनाको परीक्षण गर्न आउनेको संख्या पनि बढेको छ । ‘अघिल्लो साता ८० देखि १०० जना पीसीआर गराउन आउँथे । आज आइतरबार १२ बजेसम्म १४० जनाले पीसीआर गराए । पीसीआर गराउनेको लाइन पनि बढेको छ,’ उनले भने । सशस्त्र प्रहरीको एपीएफ अस्पतालमा अघिल्लो सातासम्म दिनमा दुई जनाको हाराहारीमा कोरोनाका बिरामी भर्ना हुन्थे । तर, यो सातामा आइपुग्दा दैनिक सात जना बिरामी भर्ना हुन थालेका छन् । ‘ग्राफ बढेको छ । एक सातामा बिरामीको संख्या बढेको छ,’ अस्पतालका कोभिड फोकल पर्सन डा. प्रविन नेपालले भने ।

त्रिवि शिक्षण अस्पताल महाराजगञ्जमा पुसको पहिलो सातामा संक्रमितको संख्या शून्यमा झरेको थियो । हाल भर्ना हुने कोरोना संक्रमितको संख्या बढेको छ । ‘इमर्जेन्सीमा रुघाखोकी लागेका र अक्सिजन कम भएका बिरामीको संख्या बढेको छ । बीचमा भर्ना हुनेको संख्या शून्य थियो,’ अस्पतालका कोभिड फोकल पर्सन डा. निरज बमले भने, ‘छ जना आईसीयूमा, दुई जना भेन्टिलेटरमा र १२ जना वार्डमा छन् । कुनै पनि दिन ‘आउट ब्रेक’ हुन सक्छ । तयारी अवस्थामा बसेका छौँ ।’

पाटन अस्पतालमा हाल ३८ जना कोरोनाका बिरामी उपचाररत छन् । अबको दुई सातामा संक्रमितको संख्या बढ्ने बताउँछन्, अस्पतालका निर्देशक डा. रवि शाक्य । ‘उच्च सतर्कताका साथ तयारी अवस्थामा बसेका छौँ । अबको दुई सातामा संख्या बढ्न सक्छ,’ उनले भने, ‘यो लहरमा जनशक्तिको अभाव हुन सक्छ । तीव्र गतिमा संक्रमण फैलिँदा ग्रुपमा स्वास्थ्यकर्मी संक्रमित हुने जोखिम छ । पोजिटिभ भए पनि काम गर्नुपर्ने स्थिति आउन सक्छ ।’

स्वास्थ्य तथा जनसंख्या मन्त्रालयको तथ्यांकले पनि तेब्बरले संक्रमण बढेको देखाउँछ । गत आइतबार कोरोनाको संक्रमण दर २.८३ प्रतिशत थियो । तर, सोमबारदेखि उकालो लागेको संक्रमण दर आइतबार आइपुग्दा ९.२३ प्रतिशतमा पुग्यो ।

प्रशासनको निष्कर्ष : उपत्यकामा जोखिम उच्च

कोरोना संक्रमण बढेको निष्कर्ष निकाल्दै प्रशासनले काठमाडौं उपत्यकामा सुरक्षा मापदण्ड पालनामा कडाइ गर्ने भएको छ । काठमाडौं, ललितपुर र भक्तपुरका प्रमुख जिल्ला अधिकारीहरूले मापदण्ड पालनामा कडाइ गर्ने रणनीति बनाएका छन् ।

‘जोखिम बढेको छ । संक्रमण बढ्न नदिन अहिले नै पूर्वतयारी गर्न थालेका छौँ,’ भक्तपुरकी प्रमुख जिल्ला अधिकारी रुद्रादेवी शर्माले भनिन्, ‘मापदण्ड पालनामा कडाइ गर्ने, मास्क अभियान चलाउने, परीक्षण र खोपको दायरा बढाउँछौँ । अस्पतालहरूलाई तयारी अवस्थामा राख्छौँ ।’ तीन जिल्लाका प्रमुखहरूको छिट्टै बैठक बसेर थप निर्णय गरिने उनले बताइन् ।

संक्रमण फैलिन नदिन के गर्ने ?

मुख्य रूपमा नेपाल–भारत सिमानामा निगरानी, परीक्षण गर्ने र संक्रमितको व्यवस्थापन चुस्त गतिमा गर्नुपर्नेमा जोड दिन्छन् जनस्वास्थ्यविद् डा. शरद वन्त । ‘हिजोका गल्ती कमीकजोरीबाट सिक्ने हो । अब परीक्षणको विधिलाई पुनरावलोकन गर्ने बेला भएको छ । कन्ट्याक्ट ट्रेसिङ र जोखिममा रहेका नागरिकको परीक्षणको दायरा बढाउने हो । अर्को आइसोलेसनको व्यवस्थापन महत्त्वपूर्ण हुन्छ । संक्रमित व्यक्तिबाट अर्को व्यक्तिमा नसरोस् भनेर आइसोलेसनको निगरानी गर्नैपर्छ,’ उनले भने ।

मपदण्ड पालना नगरेमा आवश्यक पर्‍यो भने दण्ड सजायको पनि व्यवस्था गर्न उनको सुझाव छ । ‘हिजोका दिनमा कतिपय नागरिकले थाहा नपाएर पनि लापर्वाही गरे । आज त्यो स्थिति छैन । अब जिम्मेवार भएर कार्यान्वयन गर्ने पाटो मात्र हो । राज्यले अनुगमन गर्ने र निर्देशित गर्ने हो । भारतमा मास्क नलगाए जरिवाना गर्ने भनेको छ । त्यसैले आवश्यक पर्‍यो भने दण्ड सजायको पनि व्यवस्था गर्नुपर्छ,’ उनले भने ।

सरकारको तयारी के छ ?

तीव्र गतिमा ओमिक्रोन भेरियन्ट फैलिइरहेको स्वास्थ्य तथा जनसंख्या मन्त्रालयको विश्लेषण छ । ‘ओमिक्रोन तीव्र गतिमा फैलिएको छ । नेपालमा हालसम्म २७ जनामा ओमिक्रोन पुष्टि भएको छ,’ मन्त्रालयकी प्रवक्ता डा. संगिता मिश्राले भनिन्, ‘सबै अस्पतालमा अक्सिजन, आईसीयू, भेन्टिलेटर र स्वास्थ्यकर्मीलाई तयारी अवस्थामा राखेका छौँ ।’ स्थानीय सरकार र सातै प्रदेशको स्वास्थ्य निर्देशनालायमा परीक्षणको दायरा बढाउन, क्वारेन्टाइनको व्यवस्थापन गर्न र सीमानाकामा परीक्षणलाई थप सशक्त बनाउन निर्देशन दिइएको उनले बताइन् ।

ओमिक्रोन भेरियन्ट फैलिएसँगै अस्पतालहरूमा अक्सिजन प्लान्टलाई तयारी अवस्थामा राखिएको मन्त्रालयले जनाएको छ । ‘प्रदेश १ मा ११, प्रदेश २ मा ६, बागमतीमा २१, गण्डकीमा १७, लुम्बिनीमा १८, कर्णालीमा ७ र सुदूरपश्चिममा पाँचवटा अक्सिजन प्लान्ट स्थापना गरिएको छ,’ प्रवक्ता मिश्राले भनिन् ।

स्वास्थ्यकर्मीलाई बुस्टर डोज

सरकारले आगामी माघको पहिलो साता सबै स्वास्थ्यकर्मीलाई कोरोनाविरुद्धको बुस्टर डोज खोप दिने भएको छ । माघको दोस्रो साता तेस्रो लहरको उच्च बिन्दुमा पुग्ने प्रक्षेपण गरेको स्वास्थ्य तथा जनसंख्या मन्त्रालयले चिकित्सकलाई जोखिमबाट जोगाउन बुस्टर डोज दिन लागेको हो । चिकित्सक संक्रमित भएमा अस्पतालमा जनशक्तिको आभाव हुने निचोड निकाल्दै मन्त्रालय चिकित्सकलाई बुस्टर डोज दिने निर्णयमा पुगेको हो ।

‘माघको पहिलो सातादेखि अग्रपंक्तिमा खटिएका स्वास्थ्यकर्मीलाई बुस्टर डोज प्रदान गर्ने गरी काम भइरहेको छ,’ प्रवक्ता डा. मिश्राले भनिन् । रोग प्रतिरोधात्मक क्षमता कम भएकालाई आगामी माघ दोस्रो साता अतिरिक्त खोप दिइने तयारी भइरहेको उनले बताइन् । ‘कोभिड–१९ विरुद्धको पूर्ण मात्रा खोप लगाएको तीन महिना पुगेका, रोग प्रतिरोधात्मक क्षमता कम भएका र भेरोसेल खोप लगाएका ६० वर्ष र सोभन्दा माथि उमेरका व्यक्तिहरूलाई थप एक अतिरिक्त मात्रा माघको दोस्रो साता दिने तयारी गरेका छौँ,’ उनले भनिन् ।

याे पनि‍‍‍‍‍ ...