लुम्बिनीका पालिकामा ‘दायित्व’को प्रशिक्षण

A+ A A-

दायित्व नामक गैरसरकारी संस्थाले लुम्बिनी प्रदेशका स्थानीय तहमा ‘आर्थिक सुशासनका लागि नेतृत्व’ विषयक प्रशिक्षण प्रदान गरेको छ । लुम्बिनीका तिलोत्तामा, मुसिकोट र सुनवल नगरपालिकाका ४० जना स्थानीय जनप्रतिनिधि र कर्मचारीलाई प्रशिक्षण दिएको संस्थाद्वारा जारी विज्ञप्तिमा जनाइएको छ ।

स्थानीय तहमा असल सार्वजनिक नीति, सार्वजनिक सेवामा व्यावहारिक दृष्टिकोण, आन्तरिक युवा रोजगारी, तथ्यमा आधारित नीति निर्माण, सार्वजनिक–निजी साझेदारी, स्थानीय सरकारको वित्त व्यवस्थापन, सदाचार संस्कृतिजस्ता विषयमा प्रशिक्षणमा दिइएको विज्ञप्तिमा बताइएको छ ।

मेयर, उपमेयर, प्रमुख प्रशासनिक अधिकृत र अन्य कर्मचारीलाई दिइएको तालिम समापन कार्यक्रममा संघीय मामिला तथा सामान्य प्रशासनमन्त्री राजेन्द्रप्रसाद श्रेष्ठले राजनीतिक र प्रशासनिक नेतृत्व मिलेर स्रोतसाधनको उचित व्यवस्थापन गर्नसके देशलाई उत्पादनशील अर्थतन्त्र र दिगो विकासको बाटोमा लैजान सकिने बताएका थिए ।

समारोहमा सर्वोच्च अदालतका पूर्वप्रधानन्यायाधीश कल्याण श्रेष्ठ, राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवाली, त्रिभुवन विश्वविद्यालयका पूर्वउपकुलपति केदारभक्त माथेमा लगायतको उपस्थिति थियो । काठमाडौं विश्वविद्यालयका उपकुलपति भोला थापाले विश्वविद्यालयहरुले पनि स्थानीय शासनसम्बन्धी नयाँ पाठ्यक्रम बनाउने गृहकार्य गरिरहेको जानकारी दिएका थिए ।

दायित्वले स्थानीय तहको क्षमता अभिवृद्धका लागि प्रशिक्षणसम्बन्धी पाठ्यक्रम बनाएरै काम गरिरहेको छ, जसको ६ वटा भाग छन् । लुम्बिनीमा दिइएको प्रशिक्षण भाग ३ अन्तर्गतको रहेको संस्थाले जनाएको छ ।

पहिलो र दोस्रो भाग गण्डकीको पोखरामा भएको थियो । युवा रोजगारी प्रवर्द्धनका लागि स्थानीय सरकारको सक्रियता बढाउन पालिका तमा परियोजना सञ्चालन गरिएको संस्थाले जनाएको छ ।

प्रकाशित मिति: आइतबार, पुस ११, २०७८ १६:१२