विराटनगर विमानस्थलमा ५४ जना यात्रु बोकेको विमानमा आगो लागेपछि..

A+ A A-

घटना बुधबार बिहान ८ बजेको हो । काठमाडौंबाट हिमालय उडानका लागि गएको ३०१ कल साइन भएको अरनिको एयरलाइन्सको जहाजबाट धुवाँको मुस्लो निस्केको देखियो । इन्जिनमा खराबी आएपछि विराटनगर विमानस्थलमा अवतरण गर्नुपर्ने अवस्था आयो । तर, अवतरण गरेको केही समयमै विमानमा आगो दन्किन थालेकाे थियाे ।

विमानमा चालक दलका सदस्यसहित ५४ जना यात्रु थिए ।

विमानस्थलभित्र रहेका मानिस आत्तिए । याताउति दौडिन थाले । विमानस्थलको वरपर घर भएकाहरु तन्कीतन्की घटना हेरिरहेका थिए । विमानस्थलका कर्मचारीको दौडधूप तीव्र देखिन्थ्यो । साइरन बजाउँदै दमकल र एम्बुलेन्स मुस्लो देखिएको ठाउँतिर हुइँकिँदै थिए । नेपाल प्रहरी, नेपाली सेना, सशस्त्र प्रहरी र रेडक्रसकर्मीहरु पनि हतारिएर घटनास्थलतिर जाँदै थिए । उद्धारकर्ताहरु युनिफर्मसहित घटनास्थलतिर दौडिरहेका थिए ।

त्यो दृश्य हेर्ने जो कोही नआत्तिनै कुरै थिएन ।

धुवाँको मुस्लो भर्खरै अवतरण भएको जहाजबाट निस्किएकाे थियो । काठमाडौंबाट हिमालय उडानका लागि गएको ३०१ कल साइन भएको अरनिको एयरलाइन्सको जहाज इन्जिनमा खराबी आएपछि विराटनगर विमानस्थलमा अवतरण गर्नुपर्ने अवस्था आएको विमानस्थलका अधिकारीले बताए ।

आपतकालीन अवतरण गराउँदा हुन सक्ने जोखिम न्यूनीकरणका लागि विमानस्थलमा सबै कुरालाई तयारी अवस्थामा राखिएको थियो । ती सबै उपकरणको प्रयोग गर्ने प्रयास भइरहेको थियो ।

धेरै समयमा आगो नियन्त्रणमा आए पनि जहाजको धेरै जसो भाग जलेको देखिन्थ्यो । साे नक्कली दुर्घटनामा चार जना यात्रुको मृत्यु, २० जना गम्भीर घाइते एवं १५ जना मध्यम र १५ जना सामान्य घाइते भएको जानकारी गराइयो । विमानस्थलका अधिकारीहरुले घाइतेहरुको नोबेल शिक्षण अस्पताल र हाम्रो अस्पतालमा उपचार भइरहेको बताए । घटनाबारे ५/५ मिनेटमै विमानस्थलले जानकारी दिएको थियो ।

तर, पूरै समाचार नपढी धारणा नबनाउनुहोला ।

विराटनगर विमानस्थलमा देखिएको यो सबै दृश्य वास्तविक नभएर नाटकीय हो । जहाज दुर्घटना भएका बेला धेरै यात्रु आत्तिन्छन्, जसले क्षतिको सम्भावना थप बढाउँछ । त्यसैले बढी मात्रामा हुन सक्ने मानवीय एवं भौतिक क्षति न्यूनीकरणका लागि के कस्ता सावधानी अपनाउने भनी गरिएको पूर्वअध्यास थियो यो ।

तर, यस्तो अभ्यास हुँदै गरेको कुरा धेरैलाई थाहा थिएन । जसले गर्दा त्यहाँ एक छिन धेरै मानिस आत्तिए । विमानस्थल वरपरका बासिन्दा डराए । अभ्यास भन्ने थाहा पाएपछि धेरैले लामो श्वास फेरे ।

पूर्वअभ्यास हेर्नका लागि प्रदेश १ का आन्तरिक मामिला तथा कानूनमन्त्री हिक्मत कार्की, मोरङका प्रमुख जिल्ला अधिकारी रमेशकुमार केसी, मोरङ प्रहरी प्रमुख एसपी विश्व अधिकारीलगायतका अधिकारी पनि उपस्थित थिए ।

प्रकाशित मिति: बिहीबार, असार ५, २०७६ ०१:३३