बाेर्डिङ स्कुल निलम्बन गर्न प्रेम सन्जेलको पत्र

A+ A A-

बाेर्डिङ स्कुलकी शिक्षिकको तलब नदिएको भन्दै विराटनगरका श्रम अधिकृत प्रेमप्रसाद सन्जेलले बाेर्डिङको इजाजत निलम्बन गरिदिन राष्ट्रिय परीक्षा बाेर्डलाई पत्राचार गरेको पाइएको छ ।

विराटनगर महानगरपालिका–१२, खनारस्थित सनसाइन इंग्लिस सेकेन्डरी स्कु्लले एक शिक्षिकाको तलब र सुविधा नदिएको भन्दै सन्जेलले एसईईकाे नजितासमेत निलम्बन गर्न पत्र लेखेका छन् ।

गत ७ जेठमा उनले लेखेको पत्र सामाजिक सञ्जालमा सार्वजनिक भएपछि सन्जेलको यो कार्यको चर्को आलोचना भइरहेको छ ।

सन्जेलले शिक्षा मन्त्रालय, शिक्षा विभाग, विराटनगरस्थित परीक्षा बाेर्ड शाखा कार्यालय र शिक्षा विकास तथा समन्वय इकाइ इनरुवालाई समेत पत्राचार गरी २३ वर्ष सेवा गरेकी एक शिक्षिकाको तलब सुविधा नदिएसम्म सो विद्यालयको एसईई परीक्षाको नतिजा रोकिदिन र स्कुलको इजाजतपत्र निलम्बन गरिदिन माग गरेका छन् ।

विराटनगर श्रम कार्यालयका प्रमुख सन्जेललाई यसअघि सरकारले सरुवा गरेपछि उनी अदालतको आदेशले हाल विराटनगरमै थमौतीमा छन् ।

श्रम हेर्ने अधिकारीका रुपमा उनले एक शिक्षिकालाई सेवा सुविधा दिलाउन गरेको प्रयास असफल भएको भन्दै स्कुलको इजाजत नै निलम्बन गर्न सिफारिस गर्नुपरेको बताएका छन् ।

उनको यो कार्यले विद्यार्थीको पढ्न पाउने हकमा आघात पुर्याएको भन्दै अभिभावक संघका अध्यक्ष सुप्रभात भण्डारीले विरोध जनाएका छन् ।

उनले मध्यस्थताका माध्यमबाट वा अन्य कारबाहीबाट शिक्षिकालाई न्याय दिलाउनैपर्ने भन्दै नतिजा रोक्ने र इजाजत रोक्ने गरी सन्जेलले लेखेको पत्र गलत भएको बताए ।