क्यूभीसीको ढिलासुस्ती: दुई साताको काम तीन महिना लगाउँदा गुम्दै कतारको रोजगारी

क्यूभीसीको ढिलासुस्ती: दुई साताको काम तीन महिना लगाउँदा गुम्दै कतारको रोजगारी

A+ A A-

कतार भिसा सेन्टर (क्यूभीसी) सञ्चालनमा आएपछि कतार रोजगारीमा जाने कामदारको भिसा प्रक्रिया तीन महिनाभन्दा धेरै लाग्ने गरेको छ । विगतमा भिसा प्रमाणीकरण भएपछि अथवा पूर्वश्रम स्वीकृति जारी भएको २० देखि २५ दिनमा कामदार रोजगारीमा कतार पुग्ने गरेका थिए ।

तर, क्यूभीसी सञ्चालनमा आएपछि दुई सातामा हुँदै आएको सामान्य काम तीन महिनासम्म कुर्नुपर्ने बाध्यता भएको वैदेशिक रोजगार व्यवसायीहरूले जानकारी दिएका छन् । क्यूभीसीले सेटिङमा भित्रभित्रै पैसा लिएर ‘आजको आजै’ समेत कामदारको मेडिकल गरिरहेको विषयमा रोजगार व्यवसायीहरूले चर्को विरोध गरिरहेका छन् ।

हाल क्यूभीसीमा ४० हजारभन्दा बढी रोजगारीका लागि कतार जान भिसा प्रक्रिया पूरा भएका कामदारहरूको मेडिकल हुन बाँकी रहेको व्यवसायीहरूले बताएका छ्न् । यो संख्या दुई महिनाअघि नै कामदारको मेडिकल गर्न लिएको समय हो ।

क्यूभीसीले भिसा प्रक्रियामा बढी समय लगाउँदा भिसाको अवधि सकिँदा कामदारको डिमाण्ड गुम्ने गरेको भन्दै वैदेशिक रोजगार व्यवसायी संघले आवाज उठाउँदै आएको छ ।

कतारका कम्पनीले साढे एक महिनाभित्र कामदार ल्याउने समय राखेर भिसा दिएका हुन्छन् । तर, क्यूभीसीले सबै प्रक्रिया पुगेका कामदारको मेडिकल समयमा नगरिदिँदा भिसाको म्याद सकिने, डिमाण्ड गुम्ने, म्यानपावरको खर्च हुने र कामदारले राजधानीमा धाउनुपर्ने बाध्यता रहेको म्यानपावरहरूले जानकारी दिएका छन् ।

क्यूभीसीसँग सम्पर्क र सेटिङ नगर्ने म्यानपावरहरूको दुई सातामा हुने काम तीन महिनासम्म अड्काइदिने गरेको वैदेशिक रोजगार व्यवसायी संघका महासचिव सुजितकुमार श्रेष्ठले जानकारी दिए ।

क्यूभीसीले मेडिकल र अन्य प्रोसेसिङ गर्दा रोजगार व्यवसायीहरूलाई धेरै दु:ख दिइरहेको संघका महासचिव श्रेष्ठले बताए । ‘क्यूभीसीले सेटिङ गरेका म्यानपावरको काम मात्र चाँडो गर्दै आएको छ । कतार वैदेशिक रोजगारीमा कामदार पठाउँदै आएका म्यानपावरहरूको दुई सातामा हुने मेडिकल परीक्षण तीन महिनासम्म अडकाउँछ,’ उनले भने, ‘सरकारले चासो नदिँदा क्यूभीसीले मनपरी गरिरहेको छ । हुँदाहुँदै नियम मिचेर कामदारसँग पैसासमेत उठाउन थालेको छ । खोई सम्बन्धित निकाय किन बोल्दैन ?’

क्यूभीसीले दिएको दु:ख र सेटिङका बारेमा म्यानपावर व्यवसायीहरूले खुलेर नबोल्ने गरेको उनको भनाइ छ । क्यूभीसी सेटिङमै चलेको र सोहीअनुसार कतारको रोजगारीमा सिण्डिकेट लगाउन राजनीतिक सम्बन्ध विस्तार गरिरहेको रोजगार व्यवसायीहरूले आरोप लगाउँदै आएका छन् ।

कतार रोजगारीमा जाने कामदारको मेडिकल गर्दै आएको क्यूभीसीले सेटिङभन्दा बाहिरको काम तीन महिनासम्म लम्ब्याउने गरेको म्यानपावर व्यवसायीले आरोप लगाउँदै आएका छन् । यो विषयमा वास्तविकता के हो भनेर शिलापत्रले बुझ्न खोज्दा क्यूभीसीका अध्यक्ष हेम गुरुङ सम्पर्कमा आएनन् ।

यो क्षेत्रलाई नियमन गर्दै आएको निकाय वैदेशिक रोजगार विभागले अहिलेसम्म क्यूभीसीको सिण्डिकेट र अन्य समस्याका बारेमा कुनै आधिकारिक निर्णय गरेको छैन । सरकारले वैदेशिक रोजगार ऐनभन्दा बाहिर गएर काम गर्दै आएका म्यानपावरमाथि कानुनी कारबाही गर्दै आएको वैदेशिक रोजगार विभागका निर्देशक तथा सूचना अधिकारी कमल ज्ञवालीले बताए ।

क्यूभीसीले प्रोसेसिङका नाममा ढिलासुस्ती गरिरहेको विषयमा उजुरी नपरेको सूचना अधिकारी ज्ञवालीले बताए । ‘रोजी–रोटीको खोजीमा विदेशिने कामदारलाई कुनै पनि संस्थाले समस्या सिर्जना गर्नु हुँदैन । कानुनभन्दा बाहिर गएर काम गर्ने छुट कुनै व्यक्ति र संस्थालाई छैन,’ उनले भने, ‘वैदेशिक रोजगारीका नाममा भइरहेका ठगी र कुनै संस्थाले अनैतिक तरिकाले पैसा उठाएको भए कारबाही हुन्छ । वैदेशिक रोजगारी क्षेत्रको विकृति रोक्न प्रयास भइरहेको छ ।’

विभागका सूचना अधिकारी ज्ञवाली कानुनी कारबाही गर्ने भने पनि क्यूभीसीले कामदारको समयतालिकाअनुसार मेडिकल र अन्य प्रोसेसिङको काम समयमा नगर्दा ३० हजारभन्दा धेरै कामदारको भिसाअवधि सकिएको म्यानपावरहरूले जनाएका छन् ।

क्यूभीसी सञ्चालनमा आएदेखि म्यानपावरभित्र सिण्डिकेटजस्तै गरी काम गर्दा ३० हजारभन्दा धेरै कामदारको डिमाण्ड गुमाउनुपरेको एक रोजगार व्यवसायीले बताएका छन् । क्यूभीसीका कारण ठूलो संख्यामा कतारको रोजगारी गुमेको छ भने आगामी दिनमा अरु पनि रोजगारी गुम्ने उनले जानकारी दिए ।

श्रम मन्त्रालयले २९ वैशाख २०७६ मा परराष्ट्र मन्त्रालयलाई पत्र लेख्दै कतार भिसा सेन्टरबाट नेपाली कामदारहरूले बायोमेट्रिक डाटा, थम्ब प्रिन्ट, हेल्थ प्रोसेड्योर, वर्क कन्ट्याक्ट, एटेस्टेसनजस्ता प्रक्रियाको काम गर्न र भिसा प्रोसेसिङ चार्जको लागत तथा शुल्क रोजगारदाताले बेहोर्ने जानकारी भएको श्रम, रोजगार तथा सामाजिक सुरक्षा मन्त्रालयले जनाएको छ ।

क्यूभीसी कतार रोजगारीमा जाने कामदारको सबै प्रक्रिया एकै ठाँउबाट गर्ने सर्तमा २ वर्षअघि सञ्चालनमा आएको हो । यो संस्था सञ्चालनमा आएदेखि नै विवादमा तानिँदै आएको छ ।

क्यूभीसीले कतारको रोजगारीमा सिण्डिकेट लगाउन खोजेको भन्दै म्यानपावर व्यवसायीहरूले बन्द गर्नसमेत माग गर्दै आएका छन् ।

यो पनि...

क्यूभीसीको मलेसियामा जस्तै सिण्डिकेट, निःशुल्कका नाममा कामदारसँग पैसा असुल्दै

क्यूभीसीको चलखेलमा सरकार रमिते बन्दा कतार प्रहरी र सुरक्षा गार्डको रोजगारी अन्योलमा (भाग–२)

क्यूभीसीले लिएको छैन सरकारसँग अनुमति, छानबिन समितिले दिएको थियो बन्द गर्न निर्देशन (भाग–३)

मेडिकल जाँचका नाममा कतार भिसा सेन्टरकाे बदमासी : सम्झौताविपरीत १५ हजारसम्म असुल्दै

प्रकाशित मिति: मंगलबार, कात्तिक ३०, २०७८ १३:३१