मेडिकल जाँचका नाममा कतार भिसा सेन्टरकाे बदमासी : सम्झौताविपरीत १५ हजारसम्म असुल्दै

मेडिकल जाँचका नाममा कतार भिसा सेन्टरकाे बदमासी : सम्झौताविपरीत १५ हजारसम्म असुल्दै

A+ A A-

कतार भिसा सेन्टरले रोजगारीका लागि कतार जाने तयारीमा रहेका कामदारसँग मनपरी शुल्क लिएर मेडिकल परीक्षण गरिरहेको पाइएको छ । कतार रोजगारीमा जानुअघि कामदारले सेन्टरमा अनिवार्य मेडिकल परीक्षण गराउनुपर्छ । तर उसले मनपरी शुल्क असुल्न थालेपछि कामदार मर्कामा परेका छन् ।

विगत केही दिनयता सेन्टरले म्यानपावर कम्पनीका एजेन्टको मिलोमताेमा मेडिकलका लागि समय नलिएका कामदारलाई समेत मेडिकल परीक्षणको रिपोर्ट प्रति–कामदार ५ देखि १५ हजार रुपैयाँसम्म लिएर वितरण गरिरहेको पाइएकाे हाे ।

सेन्टरले कार्यालयको समय तालिका परिवर्तन गरी सेटिङमा मेडिकल परीक्षणका लागि समय नलिएका र कागजातसमेत पेश नै नगरेका कामदारसँग नियमविपरीत रकम असुल्दै मेडिकल रिपोर्ट वितरण गरिरहेको पाइएको हाे ।

विगत दुई सातादेखि प्रविधिक समस्या भएका कारण मेडिकल परीक्षण आउने कामदारको चाप बढेको सेन्टरकी नर्स नज्मा महर्जनले बताइन् । बढी रकम असुल भइरहेकाे सम्बन्धमा उनले आफूलाई जानकारी नरहेकाे प्रतिक्रिया दिइन् । यसबारे बुझ्न खाेज्दा सेन्टरका अक्ष्यक्ष हेम गुरुङ सम्पर्कमा आएनन् ।

भिसा सेन्टरले सेटिङमै कागजात नभएका कामदारलाई भित्र–भित्रै मेडिकल परीक्षण गरिरहेको सूचना आएकाे वैदेशिक रोजगार व्यवसायी संघका महासचिव सुजित श्रेष्ठले बताए । भिसा सेन्टरले आफूले गरेको सम्झौता विपरीत काम गरिरहेको उनले बताए ।

भिसा सेन्टरकाे बदमासी र केही म्यानपावर सञ्चालकको स्वार्थका कारण कतारको रोजगारी गुम्ने खतरासँगै त्यहाँबाट आउने डिमाण्ड कटौती हुन सक्ने म्यानपावर व्यवसायीहरूले बताएका छन् ।

आज बिहान धदिङबाट आएका एक जना कामदारले १५ हजार तिरेर दिउँसो ३ बजे मेडिकल परीक्षणको रिपोर्ट लिन कुरेर बसेको श्राेतले बतायाे । उनी आगामी साता कतार रोजगारीमा जाँदै छन् । उनीसँग जनकपुरका अर्का एक जना कामदारले पनि मेडिकल रिपाेर्टका लागि आजै १५ हजार तिरेकाे श्राेतले बताएकाे छ । एजेन्टले उनीसँग आजै मेडिकल रिपोर्ट आउँछ भनेर १५ हजार असुलेका हुन् ।

दुई वर्षअघि श्रम, रोजगार तथा सामाजिक सुरक्षा मन्त्रालयको अनुमतिबिनै परराष्ट्र मन्त्रालयलाई पत्र लेखेर कतार भिसा सेन्टर सञ्चालनमा आएको थियो । सेन्टरले नेपाली कामदारहरूले कतार जान पूरा गर्नुपर्ने प्रक्रियाहरु थम्ब्स प्रिन्ट, बायोमट्रिक डाटा, हेल्थ प्रोसिड्योर, वर्क कन्ट्याक्ट, एटेस्टेसन र भिसा प्रोसेसिङको काम गर्दै आएको छ । यी कामका लागि नेपाली कामदारलाई कुनै पनि शुल्क नलाग्ने व्यवस्था भए पनि सेन्टरले एक वर्षयता कामदारसँगै रकम लिँदै आएको छ ।

कतार भिसा सेन्टरका अध्यक्ष तथा एसओएस म्यानपावरका सञ्चालक हेम गुरुङले कतार कामदार पठाउनका लागि सिण्डिकेट लगाउने प्रयास गर्दै आएका छन् । कतारको आन्तरिक मामिला मन्त्रालयले सन् २०२२ मा हुने विश्वकपका लागि ५ हजार नेपालीलाई कतार प्रहरीमा र करिब ३ हजार सुरक्षा गार्ड गरी ८ हजार कामदार लिने घोषणा गरेको थियो । तर नेपाली श्रमिक पठाउने तयारी चलिरहेका बेला नेपालका म्यानपावर व्यवसायीबीच विवाद हुँदा कामदार कतार लैजाने प्रक्रिया नै स्थगित भएकाे छ ।

प्रकाशित मिति: बुधबार, कात्तिक २४, २०७८ १३:३७