मन्त्री मनाङेको सम्पत्तिः स्रोतबिनाका जग्गा, गाईभैँसीमा लगानी

A+ A A-

गण्डकी प्रदेशका युवा तथा खेलकुदमन्त्री राजीव गुरुङ (दीपक मनाङे) को सम्पत्ति विवरण सार्वजनिक गरिएको छ । २७ भदौमा मन्त्रालयमा आयोजित पत्रकार सम्मेलनमा आफ्नै सम्पत्तिबारे अनभिज्ञता जनाएका मनाङेको सम्पत्ति मुख्यमन्त्री तथा मन्त्रिपरिषद् कार्यालयको वेबसाइटमार्फत सार्वजनिक गरिएको हो ।

सम्पत्ति विवरण खोइ ? मन्त्री मनाङे भन्छन्- केटाहरूलाई दिएको पैसा आइसकेको छैन

भ्रष्टाचार निवारण सम्बन्धी ऐन, २०५९ ले सार्वजनिक पद धारण गरेको व्यक्तिले त्यस्तो पद धारण गरेको ६० दिनभित्र आफ्नो वा परिवारको सम्पत्ति विवरण सार्वजनिक गर्नुपर्ने व्यवस्था छ । गण्डकी प्रदेशको मुख्यमन्त्री तथा मन्त्रीहरूको आचारसंहिता २०७८ मा पनि ६० दिनभित्रै सम्पत्ति विवरण सार्वजनिक गर्नुपर्ने व्यवस्था छ । तर, मन्त्री मनाङेले चार महिनापछि गत असोज पहिलो हप्ता सम्पत्ति विवरण बुझाएका हुन् ।

मनाङेले काठमाडौं र मकवानपुरका आधा दर्जन ठाउँमा विभिन्न व्यक्तिको नाममा भएको जग्गामा लगानी गरेका छन् । काठमाडौंको धर्मस्थलीमा प्रकाश, श्याम र कृष्ण महर्जनको नाममा जग्गा बैनाबट्टा गरेका हुन् । ती जग्गामा प्रतिआना ९ लाख रुपैयाँ आफ्नो परेको मन्त्री मनाङेले बताएका छन् । त्यस्तै मकवानपुरमा श्रीमती र छोराको नाममा पनि जग्गा छ । तर, उनले कुनै पनि जग्गामा भएको लगानीको स्रोत खुलाएका छैनन् ।

२२ तोला सुन, गाईभैँसीमा लगानी

मनाङेसँग २२ तोला सुन छ । २०५४ सालमा १५ र २०७० सालमा सात तोला सुन क्रमशः वैदेशिक रोजगारी र व्यवसायबाट किनेको मनाङेले खुलाएका छन् ।

मंगलबारको सुनको भाउअनुसार उनीसँग भएको सुनको मूल्य २० लाख २४ हजार रुपैयाँ हुन्छ । मन्त्री मनाङेसँग ४५ तोला चाँदी छ । २०६८ सालमा व्यावसायिक आम्दानीबाट उक्त चाँदी किनेको मनाङेले उल्लेख गरेका छन् । त्यसको आजको बजार मूल्य ५६ हजार २५० रुपैयाँ हुन्छ । उनीसँग ८३ तोला मुगाको माला छ । पैतृक सम्पत्तिबाट ती माला प्राप्त भएको मनाङेले विवरणमा खुलाएका छन् ।

मनाङेसँग एभरेष्ट बैंक पोखराको खातामा साढे १० लाख रुपैयाँ छ । मनाङेका अनुसार त्यो मन्त्री र सांसद भएबापत प्राप्त तलबभत्ता हो । मन्त्री मनाङेले गत वर्ष गाईभैँसीमा पनि लगानी गरेका छन् । संघर्ष गाईभैँसी प्रालिमा उनको ४० प्रतिशत शेयर छ । मनाङेका अनुसार फार्ममा २०वटा भैँसी र पाँचवटा गाई छन् ।

मनाङेले २०७० सालयता व्यक्ति र संस्थाबाट ६ करोड १० लाख रुपैयाँ ऋण लिएका छन् । त्यसमध्ये चार करोड ७० लाख रुपैयाँ तिरेका छन् भने एक करोड ४० लाख रुपैयाँ तिर्न बाँकी छ । मनाङ फलफूल सप्लायर्सबाट २०७३ सालमा ६० लाख, सोही वर्ष कर्म गुरुङबाट ४० लाख रुपैयाँ र २०७७ सालमा रमेश रानाबाट ४० लाख रुपैयाँ ऋण लिएका छन् । ६ वर्षअघि दुई व्यक्तिसँग लिएको चार करोड ७० लाख रुपैयाँ ऋण तिरिसकेको मनाङेको विवरणमा उल्लेख छ । विवरणअनुसार मनाङेसँग निजी सवारीसाधन र कुनै कम्पनीको शेयर, ऋणपत्र छैन ।

मन्त्री मनाङेको सम्पत्ति विवरण हेर्नुस्ः

गत २९ जेठमा गण्डकीमा कांग्रेस संसदीय दलका नेता कृष्णचन्द्र नेपाली पोखरेलको नेतृत्वमा गठबन्धन सरकार बनेको थियो । सरकार गठनको दिन मुख्यमन्त्री नेपालीसहित मन्त्रीमा कुमार खड्का, मधुमाया अधिकारी गुरुङ, हरिशरण आचार्य र राजीव गुरुङले शपथ लिएका थिए । दोस्रोपटक ८ साउनमा मणिभद्र शर्मा, विन्दुकुमार थापा, रामजीप्रसाद बराल, चन्द्रबहादुर बुढा, मेखलाल श्रेष्ठ, दिपक थापा मन्त्री बनेका थिए ।

गण्डकीका ११ मध्ये ९ मन्त्रीले भदौ पहिलो हप्ता नै सम्पत्ति विवरण सार्वजनिक गरेका थिए । तर, खेलकुदमन्त्री मनाङे र कृषिमन्त्री चन्द्रबहादुर बुढाले सम्पत्ति विवरण सार्वजनिक गरेका थिएनन् । मन्त्री बुढाको सम्पत्ति पनि हालै वेबसाइटमार्फत सार्वजनिक भएको छ ।

यो पनि पढ्नुस् :

गण्डकीका मन्त्रीको सम्पत्तिः मुख्यमन्त्रीको २५ लाख रुपैयाँ ऋण, सञ्चारमन्त्रीसँग जग्गैजग्गा

प्रकाशित मिति: मंगलबार, कात्तिक १६, २०७८ १४:०२