गण्डकीका मन्त्रीको सम्पत्तिः मुख्यमन्त्रीको २५ लाख रुपैयाँ ऋण, सञ्चारमन्त्रीसँग जग्गैजग्गा

गण्डकीका मन्त्रीको सम्पत्तिः मुख्यमन्त्रीको २५ लाख रुपैयाँ ऋण, सञ्चारमन्त्रीसँग जग्गैजग्गा

A+ A A-

गण्डकी प्रदेशका मुख्यमन्त्री र मन्त्रीहरूले आफ्नो सम्पत्ति विवरण सार्वजनिक गरेका छन् । सरकार गठनको साढे दुई महिनापछि गण्डकीका ११ मध्ये ९ मन्त्रीले आफ्नो सम्पत्ति विवरण सार्वजनिक गरेका हुन् ।

युवा तथा खेलकुदमन्त्री राजीव गुरूङ (दीपक मनाङे) र भूमि, व्यवस्था, कृषि, सहकारी तथा गरिबी निवारणमन्त्री चन्द्रबहादुर बुढाले सम्पत्ति विवरण बुझाएका छैनन् । भ्रष्टाचार निवारण सम्बन्धी ऐन, २०५९ ले सार्वजनिक पद धारण गरेको व्यक्तिले त्यस्तो पद धारण गरेको ६० दिनभित्र आफ्नो वा परिवारको सम्पत्ति विवरण सार्वजनिक गर्नुपर्ने व्यवस्था छ ।

गण्डकी प्रदेशको मुख्यमन्त्री तथा मन्त्रीहरूको आचारसंहिता २०७८ मा पनि ६० दिनभित्रै सम्पत्ति विवरण सार्वजनिक गर्नुपर्ने व्यवस्था छ । गत २९ जेठमा गण्डकीमा कांग्रेस संसदीय दलका नेता कृष्णचन्द्र नेपाली पोखरेलको नेतृत्वमा गठबन्धन सरकार बनेको थियो । सरकार गठनको दिन मुख्यमन्त्री नेपालीसहित मन्त्रीमा कुमार खड्का, मधुमाया अधिकारी गुरूङ, हरिशरण आचार्य र राजीव गुरूङले शपथ लिएका थिए । दोस्रोपटक ८ साउनमा मणिभद्र शर्मा, विन्दुकुमार थापा, रामजीप्रसाद बराल, चन्द्रबहादुर बुढा, मेखलाल श्रेष्ठ, दिपक थापा मन्त्री बनेका थिए ।

सरकार गठनका बेला मन्त्री बनेकाले कानुनी व्यवस्थाबमोजिम सम्पत्ति विवरण सार्वजनिक गरेनन् । दोस्रोपटक मन्त्री बनेकासँग भने विवरण बुझाउन अझै समय छ । तर, कृषिमन्त्री बुढाबाहेकले सम्पत्ति विवरण सार्वजनिक गरिसकेका छन् । निकै विवादित पृष्ठभूमिबाट राजनीतिमा आएका राजीव गुरूङले मन्त्री बनेको ७० दिन भइसक्दा पनि विवरण सार्वजनिक गरेका छैनन् ।

पृथ्वीसुब्बा गुरूङ नेतृत्वका मन्त्रीको सम्पत्ति विवरण भने सरकार गठनको दुई वर्षपछि २०७६ साल चैतमा सार्वजनिक भएको थियो ।

मुख्यमन्त्रीसँग कति छ सम्पत्ति ?

मुख्यमन्त्री कृष्णचन्द्र नेपाली पोखरेल आफू २५ लाख रुपैयाँ ऋणमा रहेको देखाएका छन् । कृषि विकास बैंकबाट २५ लाख ऋण लिएको उनको सम्पत्ति विवरणमा उल्लेख छ ।

त्यस्तै उनको चार ठाउँमा जग्गा छ । जन्म जिल्ला तनहुँको तीन ठाउँ र काठमाडौंमा जग्गा रहेको उनले सार्वजिनक गरेका छन् । नवलपुरको गैंडाकोटमा उनको घर छ । मुख्यमन्त्री पोखरेलसँग पाँच तोला सुन (पैतृक)छ । त्यस्तै एभरेष्ट बैंकमा तलबबापत प्राप्त पाँच लाख रुपैयाँ मौज्दात छ ।

अर्थमन्त्री एक करोड ऋणमा

अर्थमन्त्री रामजीप्रसाद बरालको नाममा पोखरा २२ पुम्दीभुम्दीमा पैतृक सम्पत्तिबाट प्राप्त घर छ । पुम्दीभुम्दीमै उनको जग्गा छ भने श्रीमतिको नाममा पोखरामा ४७ लाख रुपैयाँमा किनेको जग्गा छ । उक्त जग्गा जेठो छोराको वैदेशिक रोजगारीबाट प्राप्त आम्दानीबाट किनिएको उनले बताएका छन् ।

त्यस्तै चल सम्पत्ति अन्तर्गत पैतृक तीन लाख रुपैयाँ नगद, चार तोला सुन, एभरेष्ट बैंकमा तलबबापतको तीन लाख रुपैयाँ छ । मन्त्री बराल शेयर बजारका ‘१० कित्ते’ लगानीकर्ता रहेको खुलेको छ । प्राथमिक बजारका सदस्य उनीसँग विभिन्न कम्पनीको ४० कित्ता र नेपाल इन्फास्ट्रक्चर बैंकको ६० कित्ता सेयर छ ।

उनले एनआइसी एसिया बैंकबाट गत वर्ष एक करोड रुपैयाँ ऋण लिएका छन् । उनको परिवारमा दुई छोरासँग मोटरसाइकल र बुहारीसँग स्कुटर छ । मन्त्री बरालसँग ६० हजार लगानीमा किनेको एउटा गाई छ ।

भौतिकमन्त्रीसँग के–के छ ?

भौतिक पूर्वाधार, सहरी विकास तथा यातायात मन्त्री कुमार खड्काको नाममा पोखरा १६, मा एउटा घर छ । त्यस्तै पोखरा ३३, मा जग्गा छ । घर स्वआर्जनबाट जोडेको र जग्गा साटफेरबाट प्राप्त भएको मन्त्री खड्काको विवरणमा उल्लेख छ ।

विभिन्न बैंकमा गरेर उनीसँग ९५ लाख रुपैयाँभन्दा बढी मौज्दात छ । त्यो रकम तलब, विदेशबाट छोराले पठाएको र जग्गा बेचेर जम्मा गरेको मन्त्री खड्काले बताएका छन् । उनले दुई जनाबाट गरेर ८५ लाख ऋण लिएका छन् । मन्त्री खड्कासँग ४२ लाख रुपैयाँमा किनेको कार र ९५ तोला सुन छ । सुनको स्रोत उनले पैतृक र खरिद उल्लेख गरेका छन् ।

ऊर्जामन्त्रीलाई फर्निचर उद्योगले फलिफाप

ऊर्जामन्त्री हरिशरण आचार्यले चार वर्षअघि बैंकबाट २० लाख ऋण लिएर आमुल फर्निचर खोलेका थिए । उनको अन्य सम्पत्ति विवरणको स्रोत हेर्दा त्यसबाट राम्रै आम्दानी भएको देखिन्छ । उनले श्रीमतिको नाममा जग्गा जोडेका छन् भने आठ तोला सुन र पाँच तोला चाँदी किनेका छन् । यी दुवै सम्पत्तिको स्रोतमा त्यही उद्योगलाई देखाएका छन् ।

चार वटा बैंकमा उनको ५० हजार रुपैयाँ मौज्दात छ । उनले कृषि विकास बैंक र प्रभु बैंकबाट ५० लाख रुपैयाँ ऋण लिएका छन् । १० लाख रुपैयाँ तिरिसकेका छन् । बुवा पुष्पराज आचार्यको नाममा गोरखाको पालुङटारमा घर रहेको ऊर्जामन्त्री आचार्यले सम्पत्ति विवरणमा उल्लेख गरेका छन् । त्यसमा तीन भाइ अंशियार छन् ।

पर्यटनमन्त्री ऋण खोज्दै जग्गा किन्दै

पर्यटन, उद्योग, वाणिज्य तथा आपूर्ति मन्त्री मणिभद्र शर्माले व्यक्ति र वित्तीय संस्थाबाट ऋण लिएका छन् । ऋणबाट प्राप्त रकम उनले जग्गा र शेयरमा लगानी गरेका छन् । ऋणबाट उनले चितवनको कुमराज, बागलुङको नुरेठाँटी र रूपन्देहीको पडसरीमा जग्गा किनेका हुन् ।

मन्त्री शर्मासँग गृहजिल्ला बागलुङका विभिन्न संस्थाको करिब ९४ हजार कित्ता सेयर छ । उनकी श्रीमति इन्द्रकलीसँग पनि करिब तीन हजार कित्ता छ । ऋण, मुनाफा, दाइजोबाट शेयर किनेको मन्त्री कँडेलको सम्पत्ति विवरणमा उल्लेख छ । त्यसबाहेक उनीसँग २५ तोला सुन र अन्दाजी एक केजी चाँदी छ । पुख्र्यौली, दाइजो र खरिदबाट सुनचाँदी जोडेको उनले बताएका छन् ।

शिक्षामन्त्रीसँग सुन्तला बगैँचा

शिक्षमन्त्री मेखलाल श्रेष्ठसँग स्याङ्जाको भिरकोट र काठमाडौं नागार्जुनमा गरी दुई वटा घर छ । व्यापार र पैतृक सम्पत्ति ती घरको स्रोत रहेको उनले सम्पत्ति विवरणमा उल्लेख गरेका छन् । स्याङ्जा, काठमाडौं र कास्कीमा व्यापार र पैतृक सम्पत्तिबाटै किनेको जग्गा छ ।

मन्त्री श्रेष्ठसँग बहुमूल्य धातु हिराको औँठी पनि छ । त्यस्तै एक किलो ९९ सय तोला सुन, सात किलो दुई तोला चाँदी र १५ लाख रुपैयाँ नगद मन्त्री श्रेष्ठसँग छ । हिराको औँठी, सुनचाँदी र १५ लाख नगद पैतृक तथा पेवा रहेको विवरणमा उल्लेख छ । उनले आफ्ना दुई व्यापारिक कम्पनीको नाममा सिटिजन्स बैंकबाट करिब आठ करोड रुपैयाँ ऋण लिएका छन् ।

मन्त्री श्रेष्ठ र उनको परिवारसँग एउटा कार र दुई वटा स्कुटर छ । स्याङ्जाको भिरकोट नगरपालिका, १ मा मन्त्री श्रेष्ठको सुन्तला बगैँचा छ । त्यहाँबाट वार्षिक ६ लाख रुपैयाँको कारोबार हुन्छ ।

स्वास्थ्यमन्त्रीसँग तीन तोला सुन

स्वास्थ्यमन्त्री मधुमाया अधिकारी गुरूङको नाममा लमजुङको दुधपोखरीमा घर छ । शहीद पत्नी उनले शहीद भएबापत प्राप्त साढे १० लाख रुपैयाँले चितवन र मकवानपुरमा जमिन किनेकी छन् । उनीसँग प्रभु, सानिमा र एभरेष्ट बैंकमा क्रमशः ३० हजार, ६ लाख ५० हजार र एक लाख ८० हजार रुपैयाँ छ । उनीले दुई लाख १५ हजार रुपैयाँमा गत पुसमा स्कुटर किनेकी छन् । उनीसँग पैतृक सम्पत्तिबापत प्राप्त तीन तोला सुन छ ।

सञ्चारमन्त्रीसँग जग्गैजग्गा

सञ्चारमन्त्री विन्दुकुमार थापाको सम्पत्ति विवरण हेर्नेहरू उनीसँग भएको जग्गा देखेर चकित पर्न सक्छन् । पोखराका ३३ मध्ये १२ वटा वडामा थापाको जग्गा छ । पोखरामा थापा परिवारको ६ वटा घर छ । । श्रीमतिको नाममा रहेको दुई घर पैतृक र बाँकी चार वटा ऋणबाट किनेको थापाले विवरणमा उल्लेख गरेका छन् । ६ संरचनामध्ये एउटा होटल र एउटा मल हो ।

दुई श्रीमति मनलक्ष्मी र राधाको नाममा पोखराका ३३ मध्ये १२ वटा वडामा जग्गा छ । ती जग्गा व्यवसाय र पैतृक आर्जन भएको मन्त्री थापाको विवरणमा उल्लेख छ । त्यस्तै छोरा सौगातको नाममा पनि जग्गा किनेका छन् । ऋण गरेर त्यो जग्गा किनेको मन्त्री थापाले बताएका छन् ।

थापा परिवारसँग ९० तोला सुन, ५० तोला चाँदी र १० तोला हिरा छ । व्यापारिक पृष्ठभूमिबाट आएर छोटो समयको राजनीतिक जीवनमै मन्त्री बन्ने अवसर पाएका उनको होटल, रिसोर्ट, मलमा ठूलो लगानी छ । उनले माछापुच्छ्रे, एनएमबी, नबिल, सानिमा र नेपाल इन्भेस्टमेन्ट बैंकबाट ऋण लिएका छन् । उनीसँग कुल दुई करोड २५ लाख रुपैयाँमा किनेको दुई गाडी छन् ।

वनमन्त्रीसँग बाख्रा र सुन्तलाको बोट

वनमन्त्री दिपक थापाको नाममा स्याङ्जाको विरुवा गाउँपालिकामा दुई वटा घर छ । स्याङ्जामा उनको जग्गा छ भने पोखरामा पनि तीन करोड ४० लाख रुपैयाँमा घर किनेका छन् । छोराको व्यवसाय, छोराछोरीको वैदेशिक आम्दानीबाट त्यो घर किनेको उनले विवरणमा उल्लेख गरेका छन् ।

थापासँग ३० तोला सुन र २० तोला चाँदी छ । विभिन्न वित्तीय संस्थाबाट उनले २५ लाख ऋण लिएका छन् । उनीसँग २८ वटा बाख्रा र ७५० वटा सुन्तलाको बोट छ । सरकारी अनुदान सहयोगमा उनले चर्ती नर्सरी चलाइरहेका छन् ।

प्रकाशित मिति: बुधबार, भदौ ९, २०७८ १५:५३