सम्पत्ति विवरण खोइ ? मन्त्री मनाङे भन्छन्- केटाहरूलाई दिएको पैसा आइसकेको छैन (भिडियोसहित)

सम्पत्ति विवरण खोइ ? मन्त्री मनाङे भन्छन्- केटाहरूलाई दिएको पैसा आइसकेको छैन (भिडियोसहित)

A+ A A-

मन्त्री नियुक्त भएको तीन महिना भइसक्दा पनि गण्डकीका युवा तथा खेलकुदमन्त्री राजीव गुरूङ (दीपक मनाङे) ले सम्पत्ति विवरण सार्वजनिक गरेका छैनन् ।

मन्त्री मनाङेले अरूलाई दिएको पैसा नआएकाले विवरण बुझाउन ढिलाइ भएको बताएका छन् ।

‘पहिला बिजनेस गर्दा केटाहरूलाई लगानी गर्दिन्थेँ । धेरै यस्तो पैसा छ मसँग जुन आएको छैन । आउनेवाला छ भनेर लेख्न पनि गाह्रो,’ आइतबार मन्त्रालयमा आयोजित पत्रकार सम्मलेनमा उनले भने, ‘रामेले दुई लाख, श्यामेले तीन लाख लगेको छ भनेर कसरी लेख्ने ? मेरो नाममा केही छैन । मेरो नाममा केही छैन भनेर अरूको नाममा राखेको भन्ने होइन ।’

भ्रष्टाचार निवारण सम्बन्धी ऐन, २०५९ ले सार्वजनिक पद धारण गरेको व्यक्तिले त्यस्तो पद धारण गरेको ६० दिनभित्र आफ्नो वा परिवारको सम्पत्ति विवरण सार्वजनिक गर्नुपर्ने व्यवस्था छ । गण्डकी प्रदेशको मुख्यमन्त्री तथा मन्त्रीहरूको आचारसंहिता २०७८ मा पनि ६० दिनभित्रै सम्पत्ति विवरण सार्वजनिक गर्नुपर्ने व्यवस्था छ ।

मन्त्री गुरूङको सचिवालयले सम्पत्ति विवरण सोमबार मुख्यमन्त्री तथा मन्त्रिपरिषद् कार्यालयमा बुझाइने जनाएको छ । तर, अझै पैसा आउन बाँकी रहेकाले विवरण नपठाउन मन्त्री गुरूङले पत्रकार सम्मेलनमै सचिवालयका कर्मचारीलाई निर्देशन दिए । पहिलो श्रीमतिलाई सम्पत्ति दिएको भन्दै मन्त्री मनाङले थपे, ‘सम्पत्ति छ । तर, पहिलो श्रीमतिलाई दिइसकेको छ, छोराहरूको नाममा राखिसकेको छ । मेरो भनौँ मलाई एक आना जग्गा पनि दिने होइन ।’ आफ्नो केही जग्गा मुद्दामामिलामा रहेको उनले सुनाए ।

गत २९ जेठमा गण्डकीमा कांग्रेस संसदीय दलका नेता कृष्णचन्द्र नेपाली पोखरेलको नेतृत्वमा गठबन्धन सरकार बनेको थियो । सरकार गठनको दिन मुख्यमन्त्री नेपालीसहित मन्त्रीमा कुमार खड्का, मधुमाया अधिकारी गुरूङ, हरिशरण आचार्य र राजीव गुरूङले शपथ लिएका थिए । त्यतिबेला शपथ लिएका मन्त्री मनाङेबाहेक बाँकीले सम्पत्ति विवरण सार्वजनिक गरिसकेका छन् ।

गण्डकीका मन्त्रीको सम्पत्तिः मुख्यमन्त्रीको २५ लाख रुपैयाँ ऋण, सञ्चारमन्त्रीसँग जग्गैजग्गा

८ साउनमा मन्त्री बनेकाहरूसँग विवरण सार्वजनिक गर्न १० दिनको समय बाँकी छ । ६ जनाले शपथ लिएकोमा पाँच जनाको सम्पत्ति विवरण सार्वजनिक भइसकेको छ । मनाङेसँगै भूमि, व्यवस्था, कृषि, सहकारी तथा गरिबी निवारणमन्त्री चन्द्रबहादुर बुढाले सम्पत्ति विवरण बुझाएका छैनन् ।

भिडियो हेर्नुस् :