निर्माण गर्दागर्दै ढल्यो खानेपानीको ‘बण्डीवाल’

A+ A A-

मोरङको जहँदा गाउँपालिका –३ भातिगछमा निर्माण सुरु भएको बृहद खानेपानी आयोजनाको बण्डीवाल ढलेको छ ।

प्रदेश १ सरकारको प्राथमिकता भित्र रहेको तराई–मधेश कार्यक्रम अन्तर्गत निर्माण सुरु भएको आयोजनाको वाल निर्माण गरेको दुई दिनपनि वित्न नपाउदै भत्किएको हो । आयोजनाको निर्माण कार्यमा कमसल निर्माण सामाग्री र गलत डिजाइनका कारण भत्किएको हुनसक्ने स्थानीयबासीले आशंका गरेका छन् ।

अनियमितता गर्ने उदेश्यले कमसल निर्माण सामग्री प्रयोग गरेकै कारण वाल लडेको स्थानीयको आरोप छ । ईन्द्रानन्द रायको अध्यक्षतामा बनेको सात सदस्यीय उपभोक्ता समितिले ठेक्का लगाएर खानेपानी आयोजना निर्माणको कामलाई अघि बढाएको थियो । तर खानेपानी तथा सरसफाई डिभिजन कार्यालय डिभिजन नम्बर ४ झापाको मातहतमा सुरु भएको आयोजनामा गुणस्तरहीन इँटा, लेदो मिसिएको बालुवा र कम मूल्यको पीपीसी सिमेन्ट प्रयोग गरिएका कारण वाल लगाउन नपाउँदै लडेको स्थानीयको दाबी छ ।

पिकेट इँटा, कमसल बालुवा र जोडाईमा प्रयोग गरिएको सिमेन्ट सही नभएका कारण बनाएको दुई दिन पनि वित्न नपाउँदै आयोजनाको वाल लडेको कामदारको भनाइ छ ।

आयोजना निर्माण गर्न जग उठाउन लागाइएको वालमा स्थानीय खोलाको लेदो मिसिएको बालुवा र सस्तो मूल्यको पिकेट इँटाको प्रयोग गरिएको स्थानीय भागवत राजवंशीले बताए । तीन वर्ष भित्रमा करिव आठ करोड लागतमा खानेपानी आयोजनाको काम सम्पन्न गर्ने तयारी गरिएको थियो ।

चालु आर्थिक वर्षमा १४ लाख २५ हजार आयोजनाको कामका लागि निकासा भइसकेको छ । करिव ६ कट्ठा क्षेत्रफलमा आयोजनाका लागि आवश्यक पर्ने एक सय ६३ मिटर लामो वाल लगाउने काम सुरु भएको थियो । आयोजनाले हालसम्म कामका बारेमा कुनै पनि जानकारी सूचना बोर्डमा राखेर सार्वजनिक गरेको छैन ।

आयोजनाका इन्जिनीयर ज्योतिषकुमार मिश्रका अनुसार जमिन मुनी दुई फिट १५ इन्चको वाल लगाउनु पर्ने सम्झौता रहेको बताए । मिश्रका अनुसार जमिन मुनी पिकेट इँटा प्रयोग गर्ने र जमिनमाथिको पाँच फिट वाल उठाउँदा नम्बरी इँटा प्रयोग गर्नु पर्ने सम्झौता छ । तर ठेकेदारले भने जमिनमाथिको वालमा पनि पिकेट इँटा नै प्रयोग गरिररहेको पाइएको हो ।
यता ठेकेदार तिलक मास्के आयोजनामा कुनै पनि अनियमितता नभएको दावी गरे । धेरै समयपछि परेको वर्षाका कारण वाल लडेको उनको दावी छ । उनले लडेका ठाउँमा पुनः वाल उठाएर आयोजनाको काम सुरु गरिने बताए ।

प्रकाशित मिति: सोमबार, माघ २८, २०७५ २१:३१