राष्ट्रसंघको महासभामा अफगानिस्तानबाट कसैले पनि सम्बोधन नगर्ने, गनी सरकारका राजदूतले फिर्ता लिए नाम

राष्ट्रसंघको महासभामा अफगानिस्तानबाट कसैले पनि सम्बोधन नगर्ने, गनी सरकारका राजदूतले फिर्ता लिए नाम

A+ A A-

संयुक्त राष्ट्रसंघको महासभा बैठकमा यसपटक अफगानिस्तानका तर्फबाट कुनै पनि प्रतिनिधिले सम्बोधन नगर्ने भएका छन् ।

असरफ गनी नेतृत्वको सरकारको कार्यकालमा संयुक्त राष्ट्रसंघका लागि आफगानिस्तानका राजदूत रहेका गुलाम इसकजईले महासभा बैठकको वक्ताको सूचीबाट आफ्नो नाम फिर्ता लिएका छन् । यो जानकारी संयुक्त राष्ट्रसंघका एक प्रवक्ताले दिएका छन् ।

गुलाम इसकजईले संयुक्त राष्ट्रसंघको महासभा बैठकमा सम्बोधन गरेर तालिबानलाई चुनौती दिन सक्ने अनुमान गरिएको थियो । तर यस्तो अनुमानकाबीच उनले आफ्नो नाम फिर्ता लिएका छन् ।

संयुक्त राष्ट्रसंघका प्रवक्ता मोनिका ग्रेलीले अफगानिस्तानका तर्फबाट वक्ताको सूचीमा रहेकाे नाम फिर्ता लिइएको जानकारी दिएकी छन् । यसको कारणबारे भने उनले केही बताएनन् ।

अघिल्लो हप्ता तालिबान सरकारले संयुक्त राष्ट्रसंघका महासचिवलाई पत्र लेखेर महासभा बैठकमा आफ्ना प्रतिनिधिलाई सम्बाेधन गर्ने अवसर दिन आग्रह गरेको थियो । उक्त पत्रमा गनी सरकारका प्रवक्ताले अब अफगानिस्तानको प्रतिनिधित्व नगर्ने उल्लेख थियो ।

पत्रमा तालिबानले आफ्ना प्रवक्ता सुहैल शाहीनलाई संयुक्त राष्ट्रसंघको स्थायी प्रतिनिधिका रुपमा मनोनित गरिएको पनि उल्लेख थियो ।

तालिबानको उक्त आग्रहबारे अमेरिका, रूस र चीनसमेतका प्रतिनिधि सम्मिलित ९ सदस्यीय एक समितिले निर्णय लिनुपर्ने थियो । तर उक्त समितिको बैठक अहिलेसम्म बस्न सकेको छैन ।